¹ Nkala muono uononoke kumashiko akama, muomu yahiko mpoko mpano noho yakutunda kuli Kalunga. Mpoko ije yakala ho Kalunga ua ihangula. ² Keho honi ou enda vungungu mpoko yacho a luitha lishiko lia Kalunga; voshe lalo vai vianetha va ka li nehela chihitho chavo vavenia. ³ Moumu vaka kushika keti vaka ku teuetha vaka kupanga via chili, vunoni vaje va panga via kuvihia. Eni mue kuliveyela kujeneka liova liovaje vali na mpoko ndi? Pangeni vije via chili, keho muka uana vishangala viendi. ⁴ Muomu ikeye ngamba ya Kalunga kuli yeni mu vuchili. vuno honi ambe mupanga mulonga, kaleni na liova; muomu endi ke kuambata ngocho muele. Muomu endi ngamba ya Kalunga, endi vukalu vuendi kuvoshe ava vapanga mulonga. ⁵ Keho honi ononoka, keti muomu lia vukalu vuendi lika, vunoni muomu liji lia mumbunge yove. ⁶ Muomu lievi neni muekufueta lithimu. Muomu vaje vali na mpoko vakevo va ngamba vaKalunga, vakevo va hetethamo viuma evi kushua kumo. ⁷ Nkala uoshe mufueteni vije vina mu tiama: lishimu kuli vavenia, mulambu kuje kuuna tiama, nakathingimiko kuje kuka na tiama. ⁸ Kumwa kala na makongo kumuntu, kutunditha ko kuliyongola umo na mukuavo. Muomu uoshe ayongola mukuavo ikeye nahetethamo lishiko. ⁹ Mashiko, "Keti ulinge vukuizhi, keti uthsihe, keti upuanje, keti uliveyele," keho ambe ku lishiko lieka lalo vali kutila omu, "Yongola mukueni ngue yove vavenia." ¹⁰ Chilemo kuche kuvuitha mukueni kuvavala. Keho honi, chilemo kupuitha mo lishiko. ¹¹ Muomu lievi muna zhivuka nthimbu, ije ina hete mo vene linga muhinduke ku tulo. Muomu ngechi vuovoke vuetu vulu hamu yehi-yehi kutuvakana mutua tavele mbangelo. ¹² Vunthsiki vuna hiti, na mutania ulingila kuija. Keho ngechi tuetheleni vipanga via mumuthithi, na kuzhala vitua via cheke. ¹³ Tuendeni mua chili, ngue mumutania, keti muvilika via muyoyo ndi vunkolue; keti lalo tuende mu vukuizhi ndi mumashungu akuvihia, keti lalo mu vimpata ndi lifuua. ¹⁴ Vuno honi zhaleni Muene Yesu Kilistu, keti lalo mutalelele nthitu, linga ipange mashungu ayo.