¹ Ange njihandeka nguange, Kalunga naviana vantu vendi ndi? Kuahi keti mukemuo. Mukonda nange lalo njika Isaleli njimbuto ya Avilahama njimukua mushovo ua Mbenjamini. ² Kalunga kombilile kuti vantu vendi, vaje vavangenge kuthuka jala. Njika mudthivuka ngue omo mathona atumbula via Eliya? Vati mualambelele kuli Kalunga kuli vaka nkole yavo vaIsaleli? ³ "Muene vana thsihi vapolofeto vove, vana uithila hanthsi mitula yove; ngocho yange lika njina thalaho, nange ua thetela kunji tunditha muono uange." ⁴ Vuno honi ku kuania cha Kalunga nguendi vati? nguendi, "njina lipunguila makulukathi atanu na avali kuli vantu vaje kova thsika menene kamponia". ⁵ Nambe mualolo vene kuna thala vi thupo ngue kuku hangula cha kavumbi. ⁶ Vuno nga chili mu kavumbi, keti cha vipanga, kuahi; nga ngocho, ku kavumbi keti mu kavumbi lalo. ⁷ Keho vati honi? vuima evi via thetelele Isaleli, kova vi uanene, na vakuavo vaka kukola vimbunge. ⁸ Ngue omo vana thono nguavo: "Kalunga kava hanene Spilitu ua kuheva na mesho aku jeneka kumona, na matui aku jeneka kuvua, naku lelo vene. ⁹ Na Ndaviti nguendi, "Echele ni mesa yavo yipue nganjo na vuanda, na chishevuitho, nakulingula chavo. ¹⁰ Mesho ana vuvila vui, linga keti vamone, na miongo ikulumane ku tuolilelaho. ¹¹ Ange njihandeka nguange, "Vashevukile linga va ue ndi?" Kati mukemuo. Vunoni ku ua chavo, kuovoka kuneja kuli va ka vifuti, linga vovue lifuua. ¹² Mualolo nga kulihana chavo china lingitha vufuko kuli va ka vifuti, kuzhimbaletha china tuvakana muakama-kama,ndi? ¹³ Vuno mualolo ange njihandeka neni eni vaka vifuti, omo yange kapostolo ua va ka vifuti, ngocho nji shangala vipanga viange. ¹⁴ Nga chitava njika lingitha va vushoko vuange lifuua. Ku ovola vamo ha kati kavo. ¹⁵ Muomu nga vava vianene nga china pu ku liechela cha vaka hanthsi, kuva tambula chavo chika kala ngue vika? Keti ngue muomo ua ku kutsha ndi? ¹⁶ Nga omo vushuka vua kulivanga vua chili, novu vuna thalaho vua chili lalo. Nga muzhi ua chili, na mintango lalo ya chili. ¹⁷ Vuno nga mintango imo vayi vatuile, nove u muntango ua Olivela ya kumuthenge, vaku jotekeya ku ikeyo, keho utambula hamo lika na yikuavo ndzili ku mizhi ya Olivela, ¹⁸ keti ulihamethe na mintango. Moumu nga ulihametha, keti ngue yove ua kuata muzhi, vuno muzhi ukeuo uaku kuata yove. ¹⁹ Vika uka handeka, nguove, "Mintango vayi vatuile linga ange vanji tokakaneko." ²⁰ Mua vuchili. Omo kova thselelele vava va tuile ko, keho ove ua mana ha luthselelo luove. Keti ulihamethe, vunoni kala na liova. ²¹ Nga Kalunga ka tetelele muntango ua chithemua, nove kaku tetela. ²² Taleni ngocho, thinganieka ngothi na ku kaluua cha Kalunga: ku kaluua che zhile kuva Yundeya vaje va uile, vuno kuli yove ngozhi ya Kalunga nga vaka ku vatula lalo. ²³ Na vakevo lalo, nga kova tualelelaho naku jeneka kuthselela, vaka va jotekeya. Mukonda Kalunga atha kuva jotekeya lalo. ²⁴ Mukonda ove nga vaku vatuile ku Olivela ya kumuthenge ku chithemua chove, keho vaku jotekeya kuchiti cha Olivela ya chili, oyo ko ua themukile nayo, eyi ya themukilako ku ijotekelako lalo ku Olivela yayo vene, ko chi tuvakana muakama-kama ndi? ²⁵ Vunini vakuetu konji yongola nguange, keti mukale kundzimba ya lihungu eli, keti na linia-niamena lia vithinganieka vieni vavenia: Muku lihametha cheni, ngechije ku kaluua chino china uana va Isaleli, noho kumanetha cha vaka vifuti chikecho chineja. ²⁶ Keho va Isaleli voshe va kovoka, ngue omo mathona a handeka nguao: "Ku Siono kukekuo kuka tunda Muovole, aka tunditha via kushaula Kalunga ka Yakomba, ²⁷ eli likelio litavathano liange navo, mukemuo njika tunditha milonga yavo." ²⁸ Omo lia muzhimbu ua chili vana lingi vitothi omo lieni. Vuno honi kuku hangula, vava yongola mukonda va shokuaina. ²⁹ Omo vuana na kuthana cha Kalunga ku che ku aluluka. ³⁰ Ngue omo yeni lajamua kele na lishiko kuli Kalunga, vunoni mualolo muna uana chikeketima omo lithino lieni. ³¹ Mungila eyi vene, mualolo ngechi va Yundeya vakala na lithino. Vitundamo linga va uane chikeketima ha chikeketima chije chimu na mono yeni. ³² Mukonda Kalunga na shoko voshe mukonda lithino, linga ovuile voshe chikeketima. ³³ Naaa, vua lova vumovu fuko kumo na mangana na mana a Kalunga! Vati chapua kuhandekela chendi ko chitava ku izhivuka, na vingila viendi ko chitava kuvi shuamangeya! ³⁴ Moumu iya a zhivuka mbunge ya Muene? nambe iya ouo ua pua mukakumu leka zhinguli? ³⁵ Nambe iya ua kulivanga ua hana nkala chuma kuli Kalunga, linga Kalunga a mu hiluithile vio? ³⁶ Mukonda vuima vioshe via tunda kuli ikeye, na kuli ikeye kukekuo kua shula vuima vioshe, na vuima vioshe linga vi hane vumpahu ku miaka yoshe. Amen.