¹ Kanelo ua mucitanu uembile muaso uendi lalo. Njamuene ntangantanga ya uililile hanthi kutunda kuilu. ² Vamuhanene sapi ya cina ije kuyethi na mathima. Ije ntangantanga ya xokoluele cije cina kucethi na mathima, muinthi ua tuhukilemo ngue muinthi ua kutunda mulutengo luakama. Mixa ya litangua na mpundthi ya dthivalele na muinthi uje uatundile mucina cije kucethi na mathima. ³ Vimbimba makumbi via tuhukile muje mumuinthi hanthi va vahanene ndthili ngue vije vene. ⁴ Vavathikile keti vavihithe muila nambe viti nambe cuma cimo cakumema, vanapande kuvulumuna lika vantu vaje kuvethi na cithivukitho ca Kalunga ku maluholo avo ⁵ Vaje vimbimba makumbi kuva vatavethele kuthsiha vantu, vunoni vavayandethe lika vingonde vitatanu. Kuvavala kua kuvayandetha kuavo kunapu ngue muntu na xumua ku inye. ⁶ Ku matangua aaa vantu vakathetela kuthsa vunoni kuva kaciuana. Vakayongola kuthsa, vunoni kuthsa ku kavateua. ⁷ Vaje vimbimba vafuile ngue tukambe vaje vovana vuahethela nthita. Hamitue yavo hakele viuma via kufua ngue vilongo via Olu na vihanga viavo ngue vihanga via vantu. ⁸ Vinkambu viavo ngue vinkambu via vakentu, na mathzo avo afuile ngue mathzo avindumba. ⁹ Hantulo yavo hakele via kulifuika ngue ntelo ya vikungu, nthindo ya kutunda ku vimbava viavo mova pulula viafuile ngue muyoyo ua tukambe vavengi movaxatuka na matemba akuya kunthita. ¹⁰ Vali na mikila namambimbo akufua ngue inye, namikila yavo ili nandthzili yakuvulumuna nayo vantu havi ngonde vitanu. ¹¹ Vali namuene muka kuvathika ikeye kangelu mukacina kacethi namathima. Lithina liendi mucihevelu liapua Ambandoni, mucingelungu nguavo Apolionic kulangula nguavo muka kunongetha. ¹² Kayando kakulivanga. Taleni! Munima yevi tuyando tuvali lalo tuli nakuindja. ¹³ Keho kangelu uamucitanu naumo uathikile cindindimo cendi, ndjiovuile lijui litunda kumutula ua olu unemana kumexo aKalunga. ¹⁴ Nakuhandeka kuli uje kangelu uamucitanu naumo ngualio thitula tungelo vauana vaje vavanakutu kundonga yaYufulate.'' ¹⁵ Ngoco vene vaje tungelo vatani naumo va vavutuile, "laja vana vavuahethela lumo kunthimbu ino ya litangua lino na ngonde ino kumuaka uno mukunthsiha mutamba ua mucitatu ua vantu voxe. ¹⁶ Vanjileke vuingi vua maxualale vandthita vaje valondele hatukambe. Vapuile 200 000 000. ¹⁷ Mucimona cange njamuene tukambe navaje valondeleho: Vakele na vintelo via kuvenga ngue tuhia, via kuthzivuluka ngue Safile. Mitue ya tukambe ya fuile ngue ya vindumba. Mu tunua vuavo muatuhukile tuhia, na muinthi, ua fofo. ¹⁸ Mutambela ua mucitatu ua vantu va vathsihile na tuyando tuje tutatu: tuhia, na muinthi, na fofo via tuhukile mutunua tuavo vaje tukambe. ¹⁹ Omo nthili ya vaje tukambe yakele mutunua tuavo na kumikila yavo mikila yavo inapu ngue manoka, vali namitue vaipangetha mu kuyandetha vantu. ²⁰ Vaje vantu vathaleleho voxe vaje kuvathsile na tuyando, kuva tengulukile tukunda kuvije vio valingile vakevo vavena, kuva likelele kulemetha vithithimbi via kujuala nambe tumponia tua ngonde, siliva, vunengu, mavue na viti, vije kuviatha kumona nambe kuthivuka nambe kuenda. ²¹ Nambe kutenguluka kutunda kukuthsiha kuavo, nambe kuvulothzi vuavo, nambe ku vupangala vuavo, nambe kuvuithi vuavo.