¹ Yehova ua mu jombolokelele Avilahama miti ya kaluvaliu ya Mamele, omo ua tumamene mu chikolo cha mbalaka omo ntuima ya mutania. ² Keho ua anduile mesho endi na kutala, keho ua muene vamala vatatu vanemana musinia lije kulutue liendi. Keho omo ua va muene ua puikile ku ka liuana navo mu kutunda ku chikolo cha mbalaka, keho ua thsikile mavuli hanthi. ³ Ua kuaniene, "Muene uange, vuno nga njina uana kavumbi kumesho ove kati utuvakane ngamba yove njina ku lombela." ⁴ Vuno va ka shake tumo tumema muli tanese ku mikono yeni, keho mu huime muinthi lia chiti. ⁵ Nange njineha tu viakulia tua tundende, linga mu chi shelelethe ko. Amba uoshe muka tuvakana, muomu mukemo vene muneza kuli ngamba yeni. "Keho vakevo nguavo, "Linga omo mu una kuania." ⁶ Keho Avilahama ua shatukile vuathi ua ya mu mbalaka kuli Sala, naku kania nguendi, "Linga vuathi, tambula vi eja vitatu via vunga vua chili, uvu tike, upange mbolo." ⁷ Keho Avilahama ua puikilile kuvutanga, ua hangula ho muna ngombe ua kuhindala, ua muhana kuli ngamba, keho uendelela kumu vuahetha. ⁸ Keho ua tambuile mazhi na mahini, na muna ngombe uje yana vuahetha, keho ua va jumbuile, keho uemanene muhiehi navo muinthsi lia chiti omo valile. ⁹ Keho va kuaniene nendi nguavo, "Sala mukentu uove ali kuiko?" Keho ikeye nguendi, "Taleni muje, mumbalaka." ¹⁰ Keho ikeye nguendi, "Vuchili vene njika hiluka kuli ove mu nthimbu ya ntondue, keho tala, Sala mukentu uove aka kala na mona." Keho Sala uo vuileko mu chikolo cha mbalaka ikeyo ya kele kunima yendi. ¹¹ Vuno Avilahama na Sala vana kulupa honi, vakulupe vene, na Sala na tundu mu miaka ya kukala na vanike. ¹² Keho Sala ua jolele mu mbunge yendi nguendi, "Omo njina kulupa laja nji kevua lishungu shukulu yange lalo ua kulupa?" ¹³ Keho Yehova ua kuaniene na Avilahama nguendi, "Vika Sala na jolela naku kuania nguendi, 'Chili vene ange njika thema munike, ange njina kulupa laja'? ¹⁴ Kuchili echi cha hona Yehova ndi? Kunthimbu oyo inja hanguile, mu ntondue, njika hiluka kuli ove. Omo muaka una hiti keho Sala aka kala na kanike." ¹⁵ Keho Sala ua vianene nguendi,"Ka nja jolele" muomu uevuile liova. Keho ikeye nguendi, "Kuahi, una jolo." ¹⁶ Keho vamala vaje va katukile kuje vatalele ku Sandoma. Keho Avilahama ua ile navo muku va thindikiya. ¹⁷ Keho Yehova nguendi, "Njika mu shuekela Avilahama echi chi njikapanga, ¹⁸ omo mua vuchili Avilahama akapua mushovo ua kama ua nzili na mishovo yoshe yahano hanthsi yika vethika muli ikeye? ¹⁹ Muomu njina muhangula linga ashike vana vendi na vakua njivo yendi munima yendi linga va niunge ngila ya Yehova, valinge vuchili na vuoloke , linga Yehova anehele Avilahama chije cha na mutumbuila." ²⁰ Keho Yehova nguendi, "Muomu mutambi ua Sandoma na Ngomola ua kama, muomu milonga yavo ya vukalu vua kama, ²¹ njika shelela mualolo na kumona nga vana lingi ngechije ngue mutambi uavo uje una hete kuli ange, nga chili vana vilingi. Keho nga kuahi, njika thivuka." ²² Keho vamala vaje vatundile kuje na kuya ku Sandoma na Ngomola, vunoni Avilahama uemanene kumesho a Yehova. ²³ Keho Avilahama ua shueneneko naku kuania nguendi, "Uka thsiha muka vuchili mumo lika na muka kupiha?" ²⁴ Mpano muva li makumi atanu avakua vuviuke muimbo olio. Uka thsiha na kuohiela muhela ouo kuahi omo makumi atanu ava kua vuviuke valimo ndi? ²⁵ Chikale hale nove kulinga ngechije, uka thsihe vakua vuviuke hamo lika nava vavapi, linga vakua vuviuke va lifue mumo lika nava vavapi. Chikale hale nove! Ngaji ya hanthi hoshe ka lika linga vuchili ndi?" ²⁶ Keho Yehova nguendi, "Nga nji uana mu Sandoma makumi atanu avakua vuviuke muimbo, keho nji kohiela muhela uoshe omo vakevo." ²⁷ Keho Avilahama ua kuaniene nguendi, "Tala, njina kupatula kukuania na Muene, chipue omo ange likungu na lito! ²⁸ Vati nga kukajela vatanu ku makumi atanu ava kua vuviuke? Uka thsiha limbo lioshe omo lia kujeneka vaje vatanu ku makumi atanu?" Keho ua kuania nguendi, "Kanji ka va thsihi, nga njika uana mo makumi auana na atanu." ²⁹ Keho ua kuaniene nendi lalo,nguendi, "Vati nga vaka uana mo makumi auana muje?" Ua kuania ko nguendi, "Kanji ka chilinga omo lia vaje makumi auana." ³⁰ Ua kuania lalo nguendi, "Kati unji tenukile njina kulombela, Muene, vunoni linga njika kuanie. Hamo makumi atatu uka uana mo muje." Ua kuania nguendi, "Kanji ka chilinga, nga njika uana mo makumi atatu muje." ³¹ Ua kuania nguendi, "Tala, njina tuvakana mo kukuania na Muene uange! Vunoni hamo makumi avali uka uana mo muje" Ua kuania nguendi, "Kanji ka chilinga omo lia vaje makumi avali." ³² Ua kuania lalo nguendi, "Kati unji tenukile njina kulombela, Muene, vunoni njika kuania echi cha kumanesa. Hamo Likumi uka uana mo muje." Keho ua kuania nguendi, "Kanji ka chilinga omo lia vaje likumi." ³³ Yehova ua yile na ngila yendi omo ua manene ku kuania na Avilahama, na Avilahama ua hilukile kuimbo.