¹ Na muEngeli ghani neghedhire rware ro meyu gho moyo, roshenene yira kristari. Rwapukire rutunde kudipuna dya Nyambi no dya Ndjwighana. ² Kupitera mumukara gho mbara . kehe kumbadi dho rware kwa karire thitondo moyo , thokwima mbuyo dhokuku tjaka tjaka dikumi no dhiwadi, ayone kwima mbuyo yadho mukehe kaghonda, mahako ghokuyitondo yapo ne gho merukithero gho mishovo. ³ Thikuto mbadi mbothikaramo karo. Ddipuna dya Nyambi no dya ndjwighana mbodikara mumbara dhi, no hapikendi ne mbohana muruwanena. ⁴ No mbohanamono rupara rwendi , no dina dyendi mbodinakra patuhungupara twagho. ⁵ Ghuthiku mbadi mboghukarako, mbadi mwanyanda munyenge gho ramba endi ghodiyuwa yoyishi fumu Nyambi yomboghakaraghura kuroruhe no kuroruheya. ⁶ Mu Engeli ghaningire kukwange ''eshi, manando gha ne ghamakurupero no ghushemwa. Fumu Nyambi ghodhi mipepo dha waporofeta ghana tumu mu Engeli mukuneghedha hapikendi eyi mboyihokoka pawangu. ⁷ Mone nakumu wangu! mukafiyaghudhi kumanando gho ghupumbi ghomupmbapira dhi''. ⁸ Yame Johanesi, oyu ghayiyuvire no kuyimona yinu yi.Apa nayiyuvire nokuyimona ne, nakuvamine kumapadhi gha mu Engeli nitape fumwa dhomakughero koyu ghanineghedhire yinu yi. ⁹ Aye ghaniningire eshi wayitenda ! Ame namene no muraghuri muyedhoye , no hayendhoye haporofita ndani nowa hadi ghutawedhi kumanando ghomu mbapira dhi. Karere Nyambi. ¹⁰ Noghanitongwerire ''eshi wafika manando ghoghupumbi ghomumbapira dhi. yoyishi ruvedhene pepi rudi. ¹¹ Mukakupira ghuhungami, ghawedherereko kupira ghuhungami. Koyu ghapotathana, ghawedherereko kupotathanena, muhunga gha hungamenene. Oyu ghana pongoka, ghapongokerere. ¹² Mone! nakumu pawangu. yiruwera ne nayo nidi me, eyi shoniruwere kwa kehe yu kukutha kuyiruwana yendi. ¹³ Yame Alfa na Omega, matangero no mahurero, mashimurukero no mamanithero.. ¹⁴ Hakafiyaghudhi awa hana kuyogha yivata yaghoyoyi mboghana wana matawedhero mukudya kuthitondo tho moyo no kwingena mumakorogho ghombara. ¹⁵ Ene panunda podhidi mbwa na warodhi , nawakarungu, nawapayi, nawa kaNyambi gho mbango nakeheyu ghahaka no kutenda ghumbango. ¹⁶ Yame Jesusi natumu muEngeli wange mukunongonona kukoye yokuhamena kuyinu yo mangirishe. Amene yame mudhi no mwanahoka wa Davita, nota ghomurughura. ¹⁷ Mupepo namwenga kughamba ''éshi Wiye!'' mukakuyuva ghaghambe eshi ''Wiye!'' mukakufa dinota , ninge gheye no kwa kehe yu ghana shana , ninge heye nawane meyu gho moyo nyara-nyara. ¹⁸ Nakunongonona kwakehe yu ghanakuyuva manando ghoghupumbi ghomu mbapira dhi: ngeshi ghumwe ghawedhererako , Nyambi mbwana kamuwedhererako kuyinyandekitha eyi hatjanga mu mbapira mu. ¹⁹ no ngeshi ghumwe ghatundithako kumanando ghomumbapira dhi dhoghupumbi, Nyambi mbwana katepura kuyiyora yendi kuthitondo tho moyo noyo mumbara eyi hatjanga mumbapira dhi. ²⁰ Oyu ghanongononine yinu yi, ghaningire eshi yoghushemwa amene nakumu wangu.''Amen! wiye fumu Jesusi. ²¹ Thineke thaNyambi thikare nenu mwaheya.Amen.