¹ Ponamonine muEngeli ghana kushuruka mudiwiru. Ghakarire no matjapi ghokukudikwina dyo dyokupira mahurero , Aye ghakwatererire dyenge dishokuru munyara dhendi. ² Ghakwatire dikongoro , thiyoka thokare , athone yo shatani endi shadipinyi no ghapwire kughanga myaka mayovi. ³ Ghapwire kuvukumena mudikwina dishihuru. Ghayandhereriko no ghamungangeriremo. Yakarire kemo podigho eshi ghapire kupemukitha mihoko karo kare myaka diyovi dhikapwe. Munyima pombo hamu hutura pa kapupi kamanana. ⁴ Ponamonine mapuna . apa hahungumanine po awa hapire ngcamu dho kupangura . Namonine karo mudhimu dhowa hapwire kuteta mitwi pamurandu ghokunongonona yokwa Jesusi no kunando dha Nyambi. Awo mbadi hakotamenine thishereka endi thishwi thatho , no haswenine kutambura thitareka pamarupara ghagho endi pa nyara. Hatumukire mukufa , no haraghurire na kristusi myaka mayovi. ⁵ Wingi wawafu nbadi hatumukire mukufa kare ndani dha pwire myaka diyovi. Oghune ghomuvumbukero ghokutanga . ⁶ Mukafiyaghudhi no mupongoki oyu ghana kukuhamithera mu muvumbukero ghokutanga . kuyifa yoghuwadi ne mbadi yakara no ngcamu . Nanyi hakukare hapristeri waNyambi nowa kristusi nombo hana karaghura myaka diyovi. ⁷ Apa dhapwire myaka diyovi , shatani mbogha mushutura munotwa . ⁸ Mboghana yendi ghakapemukithe mihoko mumitara dhine dhokaye gogo na magogo mukareta pofotji harweyita wingi wagho mbohana kara yira muve gho mudikuruviya. ⁹ Awo hadhinine padyango diya ghuyupa pakaye no hadhingwemwetekedhirire kamba dhohanu ha Nyambi hokupongoka mbara dhoruhakitho . Ene mudiro watundire mudiwiru no kuwambandawera . ¹⁰ Shatani ghoyu ghawa pemukithire , ghapwire kuvukumena mudiviya dyo mudiro , ghomu mo havukumenine thishereka na muporofeta gho mbango . hawa nyandekire mutenya no ghuthiku kuroruhe no kuroruheya. ¹¹ Pona monine dipuna dishokuru dyodikenu noyu ghahungumaninepo . Kaye no mawiru yamuyakunukire, ene mbadi hawanine dyango kushohayende. ¹² Hani mono hafu hakamakuto no hokupira dikuto hanemana kughutho ghodipuna . nohafikurire mbapira hanayandhuruka . no hafikurire mbapira dhimweya , mbapira dho moyo. Hafu hawa pangururire kukutha koyi hawa tjangeramo muma mbapira , kukutha kuyitenda yagho. ¹³ Dikuruviya dyatapire hafu awa hakariremo. Yifa no dyango dyawafu yatapire hafu wa hakariremo , no hafu hawa pangurire kukutha kuyirughana yagho. ¹⁴ Yifa no dyango dyawafu yapwire kumwaghera mudiviya dyo mudiro . Eyine yoyifa yoghuwadi diviya dyo mudiro . ¹⁵ Ngeshi kuwana ghumweya eshi dinadyendi ne mbadimo mumbapira dho moyo , ghapwire kumwaghera mudirara dyo mudiro.