¹ Yinyanda kumbara dho kuyara no hapayi! Dha yara noghumbango ndani no yinu yo widhi; hanu ho hayi ne ha yara mo. ² Ene pano ne dhi muyoyo dhomatjupa no dhi muyoyo dhomakosho, dho tukambe, no tukara twato. ³ Hakafumu hotukambe ne waya, no mamende ghawo ghokurwedhima, no maghonga ghawo, no marundungoma gho mwimba. Mbadiko ghuhura kumwimba; hapayi wawo ne kupunduka mumwimba. ⁴ Kuna kuhokoka yoyihe yi pamurandu gho didovo dyombuyama gho rungu ghomuwa, gha dimuka thikuma ghurodhi, oyu gha ghuritha matunga kupiterera murungu rwendi, no hanu kupiterera mughurodhi wendi. ⁵ Mumone, ame ne na mwimanganyena- oyi ne yo gha ghamba FUMU wawamshurundate ghomudiwiru- mbo na yeyura ndhoroko dhoye kurupara roye no kuneghedha yirama yoye yokwishi kwawanu, honyi dhoye kumaghufumu. ⁶ Nanyi na kuneghedhe dinyatho dyange dyo koye, yira kenge gha vukumanga munu yinu yo yimango kwa ghumwe; nanyi na kukutende gho munu yu ha kukenga wahe. ⁷ No kehe yu gha kukukenga ne nanyi gha kutjire ghu ghamba eshi, 'Ninive ne ghana ghu; yidye sho gha mudirere?' Kupi shoniwane yu shogha muhengaghure?'' ⁸ Ninive, wa pitakana we dikuma dyaTebe, odi ha tendere parware rwaNile, odi dya pwire kudhingumwetwedha no meyu, no dikuma dyadyo dyokushingeka hanyathi ne dikuruviya, no dikuruviya ne dyo dikuma dyadyo? ⁹ Kushi na Egiptena ne ghomangcamu ghadyo, no mbadiko ghuhura gho ngcamu dhadyo; Puti na Libiya ne ha karire hakwatithi wadyo. ¹⁰ Ngambi kemo, awa ha rwithire Tebesi ne hashimbire hanu; hawa twarire kunotwa; hana wo ho hambiru ne hawa tetaghurire muyipindhi kumutwi gho kehe thitarata; ha nyathi wendi ha tendire fungu-fungu kwawakamakuto wendi, no hamashurundate wendi wahe ne hawa wangire no menge. ¹¹ Nowe nanyi wa kuterere; nanyi wa kuyereke kunda, no nanyi wa kushane dyango dyomondo kwawanyathi woye. ¹² Hanyathi wenu mbo hana witha makuma ghenu noghuredhu yira kenge gha nyunganga munu thitondo thoghukuyu no kudya mbuyo dhokupya dhokutanga kuwa ko. ¹³ Mumone, hanu wenu ne yira wahe hakamadi ho kukasha no mbadiko kukughamwena hathinda. Ma thero ghodyango dyenu ne gha yandhurukera hanyathi wenu; mitambo dho kumathero ghenu ne mbo dhina pi kumudiro. ¹⁴ Mupungure meyu mwa kurughanitheko apa ha kumudhingumwetwedha hanyathi; muthime ghuma no mughudjate ghukare ghuredhu, no gho mughutende yitina muroyithitheko makuma ghenu. ¹⁵ Hanyathi wenu nanyi ha kutumeke mbara dhenu, nanyi ha kumupaye nomamende. Nanyi ha kumupaye yira kenge dha dyanga mbathi-mbathi yimena yenu. Mukwingipithe mwathinda yira mbathi-mbathi dhidhimbiru, no wingi yira mbathi-mbathi dhodhikuru. ¹⁶ Hengipa ha ghurithi hokumatunga ghamwe mumbara dhenu kupitakana tutumwedhi tomuwiru; ene ha kara yira mbathi-mbathi, kuyipitha mapya no kutuka yika yende. ¹⁷ Hapiterithi wenu ne hengi yira mbathi-mbathi dhodhikuru, no hakamakuto wenu ne yira dikuta dyadho dhina pongo kumakuma mudiyuwa dyo mepo. Pakuva diyuwa ne kutuka dho no mbadiko ghokudimuka eshi kupi dhina yendi. ¹⁸ Fumu ghomuAsiriya, ha dithi wenu ne hana fu; hapiterithi wenu ne hana fu. Hanu ghoye ne hana kuhanyena pamarundu, no mbadiko gho kuwa pongeka. ¹⁹ Yitombo yoye ne mbadiko kwiruka. Yitombo yoye yi yikuru. Wahe wa hakuyuva mbudhi dho kuhamena kukoye ne nanyi ha kukande nyara dhawo muyihafa. Mbadiko yu gha tjire ghuyi ghoye.