¹ Ndapero dhaHabakuku muporofeta: Fumu, nayuvu yitundamo yoye, nonayapa. ² Fumu, pinduthe yirughana yoye mukatji koghano manako; mukatji koghano manako yidimukithe, vuruke kukara noneke mughupata ghoye. ³ Nyambi gha tundererire kuTemani, no Oyu ghoKupongoka Kundundu dhaParani. Ghuyerere wendi wakarerera mudiwiru, nokaye kayarire makughero ghendi. ⁵ No thishe yira munyenge, munyenge ghushokuru kushwagha mumoko ghendi, omo moghondeka ngcamu dhendi. ⁴ Mahamba ghomakuru gha kuruka kughutho wendi nogha rawere yifa yimukuthe. ⁶ Ghemanine no gha kengurure kaye ghu ka varera; Gha kengerire nogha tutumithire kaye. Ngambi marundu gho kukarererapo gha tutumine, kemo karo nomandundu ghothikadyo ghakurumanine ghamukughe. Ndhira dhendi edhi ghapita ne dhakarererapo kuroruhe. ⁷ Hani mono kwange matende ghaCushani mukunyanda, ndani dipayi endi dikehe dyomatende gho muthiko thawa Midiyani ghututuma. ⁸ NaNyambi endi Yahweh ghapatire nomarware ndi? Endi ghughadhi ghoye ne gho kumakuruviya sha, apa mwadhinine patukambe nomatemba ghenu mumawineno sha? ⁹ Wa hokora ndamba dhoye edhi dhapira thifika; nowatura maghonga mundamba dhoye! Fumu wataghura muve kumarware. ¹⁰ Marundu gha kunongonana nogha piruka muyinyanda. Meyu gha poposhera papagho; dikuruviya dyodidhungi nadyo dyatanara. Mangumbi ghadyo ghayeyuka. ¹¹ Diyuwa nokaghonda yemana ndjikiti mumango ghayo muwiru mumavyathero ghomaghonga ghoye edi ghana kandandama, mumavyathero gho mushoro ghomaghonga ghoye. ¹² Wadjavura pakaye popahe noghupata. Mughughadhi wahumbitha matunga. ¹³ Wayendire kumakomweneno ghawanu hoye, kwawanu awa watungeka. Wahanyaghura mukuru wawaka maharwero no wahanyaghura wahe awa hamukuthanga. ¹⁴ Wahumbitha mukuru wawamashurundate ghendi apa gha tudhudhutukere eshi nogha tuhanyaghure; rudiritho rwagho rwapitura royu ghana kushamberera mukupetha hahutu mughudhindo. ¹⁵ Wa tjinaghana padikuruviya notukambe toye, nowavundurure meyu. ¹⁶ Na yiyuvire, nonatutukwire! No muromo wange wakungangere kuwoma. Yirama yange ya kukokangere omu na kutakerera diyuwa edi ha kuhumba hakanore dhetu mukutuhomokera. ¹⁷ Ngambi kemo eshi thitondo tho ghukuyu mbadi thema mbuyo no mbadiko mandjembere mumamapya; no shime ngambi eshi yitondo yo oliveri mbadi nga yi tu nyanyuna mukupira kwima mbuyo; ngambi kemo eshi yimuna yoyihe kufa no mahambo ghongembe mukunguru ghadi, eyi ne yo mbo ni tenda. ¹⁸ Shime mbo na shamberera mwaFumu. Mbo na shamberera pamurandu waFumu gho ma komweneno ghange. ¹⁹ Fumu Nyambi ne yomukamangcamu ghange no ghatenda mapadhi ghnge yira gho diya. Aye gha ni tura thiwana pamandundu. -Kwamupiterithi ghomembo, pakitari wange.