¹ Munyima Petrusi naJohanesi hayendire kuwiru dhongirishe paviri dhomandapero, paviri dhoghukwoko nodhoghune. ² Munyima katughuru oyu gha karire murema kushwayera mumukogha wanyina oyu nga ha retanga kungirishe paheka apa hethangire eshi, Ghuwa. Awo nga ha muturanga popo kehe nadiyuwa eshi ngo gha kumbere masherenyi kwawa hana kwingena mungirishe. ³ Apa gha monine Petrusi naJohanesi hana kushana kwingena mungirishe, gha wepure ko maghamweno. ⁴ Petrusi, gha topere meho ghendi papendi, naJohanesi gha ghambire eshi, ''Tukenge.'' ⁵ Katughuru gho murema gha wa kengire, ghutaterera kuwana maghamweno kukwawo. ⁶ Ene Petrusi gha ghambire eshi, ''Siriveri no ngorondo mbadi nidi nayo, ene eyi nidi nayo nanyi nikupe. Mudina dyaJesusi Kristus ghomuka Nasareti, yende.'' ⁷ Hamukwatire kudyoko dyorudyo, Petrusi gha mwimekire, popo vene maghuru nomangongotji gha katughuru yu gha tanarire. ⁸ Katughuru yu ghemanine no kuregha muwiru no gha tangire kuyenda; ghengenine naPetrusi naJohanesi mungirishe, ghuyenda no kukugha Nyambi. ⁹ Hana wahe ha mumonine ghana kuyenda noha kuyire Nyambi. ¹⁰ Ha nongononine eshi yo katughuru oyu nga karanga ghukumbera hanu maghamweno kuheka dhodhiwa dhongirishe.'' Awo hayarire nothitetu yoyishi koyoyi ya hokokire kukwendi. ¹¹ Kenge gha gorere paPetrus nopaJohanesi, hanu wahe ha tjirere kukwagho mukara oghu hethangire eshi, Solomon ghukuru ghothitetu. ¹² Apa gha yi monine Petrusi, gha wa huthire eshi, ''Amwe mwa hanu waIsreali, pashanye muna kutetukera? Pashanye muna kutu nungurukera twe, yira yatwe tuna mu ningitha eshi gha yende pamangcamu ghetu endi paghukushuki wetu? ¹³ Nyambi waAbraham, no waIsaaki, no waJakop, Nyambi wawakerekandongo wetu, ghana fumaneka muruwaneni wendi Jesusi. Oyu mwa tapire no kuhamura kughutho waPilatus, apa gha tokore eshi gha mu shuture. ¹⁴ Mwa shwenine mupongoki nomuhungami, no mwa kumberire hamushwayithere mupayi mudyango dyendi. ¹⁵ Mwa payire mutangeri gho yipara, oyu gha vumburire Nyambi mwawafu, no atwene twashupi kuyinu yi. ¹⁶ Nopa didhi dyomatawero mudina dyendi, dina dyendi dina shutura yu katughuru mwa kumona no kudimuka. Matawero gho kupitera mwaJesusi ghana mupa ghundjewa-ndjewa wendi gho kuyarerera kughutho wene mwahe. ¹⁷ Keho, mwashere, na dimuka eshi mwa yitendere mukunyatha, thika edi mwa tendire kwawaraghuri wenu. ¹⁸ Ene yinu yaNyambi eyi ha mu tongwera kupitera mutunwa twawa pumbi wahe, eshi Kristusi wendi gha kona kunyanda ne, ghana yikumithamo. ¹⁹ Mupiruke, podigho eshi mirandu dhenu dhipwe kuthiyerera, podigho eshi dha kwiye nako dho kupeperera kughutho waFumu. ²⁰ no gha kutume Kristus oyu ghapwa kutorora kukwenu Jesusi. ²¹ Aye yodiye ghofotji oyu dya kona katambura diwiru kate ruvedhe romarughuthururo gho yoyiheya, koyi gha ghambire Nyambi pakare kupitera mutunwa twawaporofeta wendi ho kupongoka. ²² Mosesi ghushemwa gha ghambire eshi, 'Fumu Nyambi mbo ghana yeyura muporofeta yira yame mukatji kenu mwashere. Mwa kona ka tegherera kuyoyihe eyi mbo ghaka mu ghambitha. ²³ Mbo yina kahokoka eshi kehe yuno munu gha ka pira kategherera muporofete yu mbo ghana pu kuharanganya mukatji kawanu.' ²⁴ Nhii, noha porofeta wahe kutunderera kwaSamuwel nowa heyire munyima dhendi, ha ghambire no kuyuvithya ghano mayuwa. ²⁵ Yamwe mwahana wawaporofeta noho ghundambo oghu gha tendire Nyambi nawa kerekandongo wenu, dyodi gha ghambire kwa-Abraham eshi, ''Murunanda roye mako ghomahe pamuve mbo ghana pukutungeka.' ²⁶ Nyambi munyima gha yeyurire murughani wendi, gha mu tumine kuwenu pamutango, podigho eshi mu pwe kutungeka mukushwayitha kehe yu gho papenu kughuyi wenu.''