¹ Yo kuhatera kuyirughana yo hanu waNyambi hokupongoka, mbadi mudyo kukwange eshi ni mu tjangere. ² Na dimuka yokuhatera kuyirumbera yenu, eyi na kutanawere kwawanu ho muMesadoniya. Nawa tongwerire eshi Akaye ne ghana kuroyitheranga kutunda mwaka ghuya ghuna kapita. Ghu hima wenu watjokedhire hengi ha rughane. ³ Pano na tumu hayendhetu podiyo eshi yi kutanaghura yange yo kukwenu ne mbadi yi kare yanyara-nyara, no podiyo eshi mukuroyithere, thika di na ghambire eshi dyo mwa kukara. ⁴ Shimengwa, ngeshi kehe yuno mukaMesadoniya gheye nange no kuna kuma ne shime mbadi mwakuroyithera ne, ngo nanyi twa kuna fe honyi-Ame mbadiko na kughamba yo kukwenu-mumakurupero ghange mumwenu. ⁵ Na ghayarire eshi mudyo mukutjokedha hayendha mukwiya kukwenu no kuna royitha yoyiheya kuthitapa thi mwakuruperithire. Oyi ne podiyo eshi ngo yiroghe eshi matungekero, no mbadi yira thinu thimweya thokuthiyeneka. ⁶ Thitambo ne thi; Oyu gho kukuna ghupu ne mbo ghana pokora ghupu, no yu ghokukuna pamurandu ghomatungekero ne mbo ghana pokora matungekero. ⁷ NInge kehe yu gha tape thika di ghana yi rongeka mumutjima wendi, mbadi mumathineneko endi muyitokota, Nyambi ne gha haka yu ghokutapa muruhafo. ⁸ No Nyambi kukona gha tendithe fumwa dhidhihe dhi muvurere, podiyo eshi, kehe pano, mu kehe yinu, mu wane yoyihe eyi mwa nyanda. Oyi yina kukara kemo podiyo eshi mwingipithe kehe yino yirughana yoyiwa. ⁹ Kemo yidi thika di ha yi tjanga: ''Gha taperire ghushwi wendi no kughutapa kwawahepwe. Ghuhungami wendi ne ghokuroruheya.'' ¹⁰ Oyu gha tapa mbuto kwamundjimi oyu gha kuna no ghuroto ghokudya mbo ghana tapa no kuwedherera muyangu ghoghuhungami wenu. ¹¹ Mbo muna pu kutungeka mukehe ndhira podiyo eshi mwakukare ghutapi. Oyi ne mbo yina reta matapero ghomatumero kwaNyambi kupiterera mumwenu. ¹² Mukerughana yinu yi ne mbadi ngenyu yina kukumutatha mo yo hanu waNyambi ho kupongoka, ene nayo kuna kukuwedherera muyirughana yo yingi yomatapero ghondangi kwaNyambi. ¹³ Pamurandu gho kumuyereka no kumutawedhera pathirughana thi, mbo muna kughu Nyambi mughutawedhi kumanongweneno ghenu ghombudhi dhodhiwa dhaKristusi. Mbo muna kughu karo Nyambi paghutapedhi wenu kukwagho no kwa kehe yuno. ¹⁴ Awo kuna kumurura, no kuna kumuraperitha. Awo kutenda yi pamurandu ghithineke thothikuru thaNyambu ethi thidi papenu. ¹⁵ Ngo matumero gha kare kwaNyambi kuyitapa yendi yoyikuru.