¹ Oru ne roghuhatu nakwiya kwenu. ''kehe ghuno kukukutu twakona kughuturapo paghushupi ghohawadi endi hahatu.'' ² Na ghambire kare kowa haharurire kare no kwawaheya apa nanakarire ko roghuwadi, no nakuyighamba karo eshi: Apa mbo niya, mbadi mbo no niwa thiyerera. ³ Ame na kumutongwera yinu yi yoyishi muna shana ghushupi eshi Kristusi ne kuna kughamba kupiterera mumwange. Aye ne mbadi mukashu kukwenu. Ene, ghatanara mumwenu. ⁴ Aye ne hamupamarerire mughukashu, ene muyumi pangcamu dhaNyambi. Atwe natwe ne twakashu mumwendi, ene mbo tuna para nendi pangcamu dhaNyambi mumwenu. ⁵ Mukukengurure mwathinda, mumone eshi mumatawero mudi. Mukukonakone mwathinda. Mbadi muna kuyi nongonona yi mwathinda, eshi Jesusi ne mumwenu ndi?-shimengwa, yashemwa, mwawa makonakono. ⁶ No nakurupera eshi mbo muna nongonona eshi mbadi twawa makonakono. ⁷ Pano twakurapera kwaNyambi eshi ngo mbadi mutende ghuyi. Mbadi nakurapera eshi ngo tumoneke yira tuna piti makonakono. Ene, Na kurapera eshi ngo mutende eyi yahungama, ngambi tu moneke yira tuna ghu makonakono. ⁸ Atwe ne mbadiko yokutenda yokwimanganyena muragho, ene yoghushemwa vene. ⁹ Atwe ne kushamberera ngeshi tuna kasha nomuna tanara. Tuna kurapera karo eshi ngo hamutende mukumenenemo. ¹⁰ Na kutjanga yinu yi oku me ne kayenda nenu podiyo eshi ngeshi nenu nidi ne mbadi nimutokomene thikuma mumarughanithero ghoghuraghuri wange- oghu ghani pire Fumu podiyo eshi ngo ni mutendurure, ene mbadi nimughurumune. ¹¹ Paghuhura, mwayendha, mushamberere! Murughanene marughuthwero, mupwe kutjokedha, mukutawitheko, mupare muthiraro. NoNyambi ghoruhakitho nothiraro nanyi ghakare nenu. ¹² Mukumorore nodirumeritho dyokupongoka. ¹³ Hanu waNyambi wahe hokupongoka hana mumorora. ¹⁴ Neke dhaFumu Jesusi Kristusi, ruhakitho rwaNyambi, no makupakerero ghaMupepo Ghokupongoka ghakare nenu.