¹ Ame na himi ngo muniture kukwange mughuthuta. Ene yoghushemwa muna kunitura nange. Ame ne difupa kukwenu. ² Na kara no difupa dyoghunyambi kukwenu, kutunda pa namukuruperithire muyiyeka kwakatughuru ghofotji. Na kuruperithire mukumutapa mukare mwane ghokupira kukara rumwe panyama na kehe yu kwaKristusi. ³ Ene nayapa eshi pamwe, thika di thangere thiyoka Eva noghundondoro watho, yighayara yoye ne kukona hayitware yiyemburuke kughushemwa no kuthirughana thokukushuka thaKristusi. ⁴ Ngo ngeshi ghumwe gheye no kuna kuvitha Jesusi ghumwe mbadi yu twa yuvitha twe. Endi tuninge shi ghutambure mupepo ghumwe mbadi ghu twatambura. Endi ghutambure mbudhi dhimwe mbadi dhi watamburire. Amwe kukupakerera noyinu yi thiwana. ⁵ Ame na kughayara eshi nomumbiru wo wa hedha eshi ngo ho ha apostoli. ⁶ Ene ngambi kenge shi mbadi hani deghura mughamba, Ame ne hani deghura mughudimuki. Mukehe ndhira no mukehe yino ne twa yi mudimukitha yi. ⁷ Naharurire pakukumbirupitha noyhinda podiyo eshi ngo mupwe kuyerura ndi? Ame ne nayuvithire mbudhi dhodhiwa kukwenu nyara-nyara. ⁸ Nedhire mangirishe ghamweya mukutambura maghamweno kukwagho podiyo eshi ni mughamwene. ⁹ Apa na karire nenu no natjandire thinu, mbadi napire ghumweya rupokotwa. Yinyanda yange ne hayi kumithire mo hayendhange awa ha tunderire kuMesadoniya. Mukehe yino nakushwayithire ko nothinda podiyo eshi mbadi ni kare mupango kukwenu, no nanyi ni twikere kutenda kemo. ¹⁰ Thika di ghudi ghushemwa waKristusi mumwange, yikununeka yange ne mbadi mbo hayiporeritha kudhimutara dhaAkayiya. ¹¹ Pamurandu munye? Yoyishi mbadi namuhaka ndi? Nyambi ghayidimuka. ¹² No oyi natendanga ne nanyi ni twikere kuyitenda, podiyo eshi ngo ni shwayithepo yi ghamba yo kunisherera no yighamba eyi hana kushana kukununeka-eshi ghawa wananga hana kutenda yirughana yofotji noyi twakutenda. ¹³ Hanu ho kenge wa ne haapostoli hombango no harughani hoghumbango. Kukutura hathinda eshi haapostoli waKristusi. ¹⁴ Ethi ne mbadi thitetu, ngambi Satani thinda ghakuneya yira muengeli ghomunyenge. ¹⁵ Mbadi thitetu thothikuru ngeshi hapikendi hakuneghe nagho yira hapika gho ghuhungami. Ndjambi dhagho ne mbo dhina kara yoyi yaroghera yitenda yagho. ¹⁶ Ame kuna kughamba karo: Mbadiko yu shogha ghayare eshi ame ne nomuyero. Ene ngeshi mughayare kemo, munitambure kenge podiyo eshi nikutanaghure kamanana. ¹⁷ Eyi nakughamba nokukununeka noghutjima-mbadi na kughamba kenge gha ghambanga Fumu-Ame kuna kughamba yira nomuyero. ¹⁸ Kenge yidi shi hanu hohengi hakutanaghura kukutha kunyama, name mbo na kutanaghura. ¹⁹ Amwe ne kukutura ghushamberera nohayero. Amwe mwathinda ne mwanyanyami! ²⁰ Kukutura na ghumweya ngeshi ha mutendi mwapika wendi, ngeshi hamumini, ngeshi ha wana maghuwa mumwenu, ngeshi ha kukengi thinda shi hasha kupiterera mwe, endi ngeshi gha kupumure murupara. ²¹ Mbo naghamba kuhonyi dhetu eshi twa karire twakashu mukuyitenda. Ene ngeshi ghumwe ghakutanaghura-Ame keho ne kuna kughamba yira muyero-Name mbona kutanaghura. ²² Awo ne haHeburayi ndi? Name karo. Awo ne hakaIsragheli ndi? Name karo. Hanahoka waAbrahamu ndi? Name karo. ²³ Hapika waKristusi ndi? (Ame kughamba yira napira maghano.) Name karo. Na kara muyirughana yoyikuru kupiterera yenu, mumanotwa ghomengi, muyipuma yokupeterera, mukukuwanekera no ma ghukukutu ghomengi ghoyifa. ²⁴ KwawaJuda ne nawanine muyendero kwoko gho ''matjupa makumi mane kutundithamo dhofotji.'' ²⁵ Ruhatu hani pumurire nomburo. Pamwe ghani fukumine no mawe. Paruhatu na rowere nothikepa. Na kara diyuwa dyofotji noghuthiku ghofotji kudikuruviya. ²⁶ Na kara mumaruyendo kehe pano, mughukukutu kumarware, mughukukututu kwawamatjotji, mughukukutu kwawanu wanu, mughukukutu kwawa kupira haJuda, mughukukutu mumbara, mughukukutuku mumamboreya, mughukukutu kudikuruviya, mughukukutu kwawayendha hombango. ²⁷ Na karire nothiruwana thothikuru no mumaghukukutu, mumaghuthiku ghomengi ghokupira kurara, mundhara nodinota, rorwingi mumadhidhimekero, mumepo nothiheha. ²⁸ Kutundithako yoyihe, koyidi yikudhekera yange yo kehe diyuwa yomangirishe. ²⁹ Yidye gha kasha, Ame ne mbadi na kasha ndi? Yidye yu ha tendithire gha putunde, no mbadiko kupya? ³⁰ Ngeshi nikutanaghure, nanyi nikutanaghure koyi yaneghedhanga ghukashu wange. ³¹ Nyambi noWiha waFumu Jesusi, oyu hakugha kuroruheya, gha dimuka shi Ame mbadi nakughamba ghumbango. ³² KuDamasikusi, nguvuru yu gha karire kwishi dhaFumu Aretasi naye ghakungire mbara dhaDamasikusi gha ni kwate. ³³ Ene hani ghurumuthere muthikote kupiterera padikende dyomudikuma, no naparire mumoko ghendi.