¹ Ame, Paghulusi, kuna kumutjokedha, mughukumbirupitha nomakuturero ghaKristusi. Ame kukumbirupitha ngeshi pofotji nenu nidi, ene ame kukara ghutjima nenu ngeshi kayenda nenu nidi. ² Ame kuna kumu kumbera eshi, ngeshi nenu nidi, mbadi nanyanda kukara ghudhughutjima no kutjimapa papange nothinda. Ene kuna kughayara eshi mbona nyanda kukara ghutjima apa mbo nimanganya nowa haghayaranga eshi atwene kuna kupara panyama. ³ Ngambi kenge eshi atwene kuyenda panyama, mbadi twa rwanga yita panyama. ⁴ Yoyishi yirwitha eyi twa rwithanga ne mbadi yopanyama. Ene yakara nongcamu dhishokuru dho kuharanganya mangcamu ghomahe. Agho kuwitha yikuanyeka yoyihe yokupemukitha. ⁵ Atwe karo kuharanganya kehe thino thinu thokukuyeyura thimanganyene ghudimuki waNyambi. Atwe kutura mukashitiko kehe yino yighayara mukukuhema kwaKristusi. ⁶ No atwe kuna kukuriyithera mukuhumbitha kehe yino yirughana yokupira kukuhema kwaFumu, makuhemeno ghenu ghayarerere. ⁷ Mukenge eyi yina kenenena kughutho wenu. Ngeshi ghumwe ghana tawa mukuyarerera eshi ayene mwaKristusi ghadi; ninge gha kuvurukithe eshi thika edi ghadi ye mwaKristusi, natwe karo kemo. ⁸ Ngambi ngo ni kutanaghure kamanana kumangcamu agha twakara nagho, agha gha tupa Fumu mukumu tenda nombadi kumuyipitha, mbadi sho ni kuyuve honyi. ⁹ Mbadi na kushana yimoneke yira kuna kumuyapitha nomambapira ghange. ¹⁰ Hanu hamwe kughamba eshi, ''Mambapira ghendi ne kutokomena nongcamu shemwa, ene panyama ne mukashu. Manando ghendi ne mbadi ghakara mudyokughagherera.'' ¹¹ Ninge hanu ho kemo hakare nokudimuka eshi edi twa kara mumanando gho yitjanga ngeshi mbadi tuna moneka yombo yikara karo muyitenda yetu ngeshi potudi. ¹² Mbadi tuna yendanga kayenda eshi tuka ponge pofotji endi tuku rikanyithe nowa hokukukugha hathinda. Ene apa hana kumetanga hathinda hathinda no kukurikanyitha kwawayendhagho, mbadiko hakara noghunongonodhi. ¹³ Atwe, mbadi wa kukutana kupitakana. Ene, kuyitenda kemo kukutha marawero agha gha tupa Nyambi, marawero gho kukuma kukwenu. ¹⁴ Yoyishi atwe mbadi twa kukutaghura thikuma twa thinda apa twa muwanine. Yatwe twa tangire kuna kuma kukwenu nombudhi dhodhiwa dhaKristusi. ¹⁵ Mbadi twa kutanaghura thikuma ghupira mahurero kuyirughana yawamwe. Ene, makurupero ghetu ne thika kenge ghana kukura matawero ghenu, yirughana yetu mumwenu mbo yina kuhanya yingipe. ¹⁶ Atwene kuna kukurupera yi, podigho eshi mbo tuka yuvithe mbudhi dhodhiwa mumatunga gho kayenda nenu. Mbadi sho tukone kukutanawera yirughana eyi hana kurughana kudyango dimweya. ¹⁷ ''Ene ninge oyu ghana kukutana, ghakutane mwaFumu.'' ¹⁸ Yoyishi mbadi oyu ghokukushupera thinda ghokutambura. Ene, ene oyu gha shupera Nyambi.