¹ Oyu gho kutawa eshi Jesusi ne yo Kristusi ne ghapwa kushamuruka kwaNyambi, nokeheyu gho kuhaka wiha kemo ghahaka karo mwana oyu ghawana. ² Omu motwayidimuka eshi twahaka hana Nyambi: pakuhaka Nyambi no kukumithamo miragho dhendi. ³ Oru ne roruhakitho kwaNyambi: eshi tukumithemo miragho dhendi. Nomiragho dhendi ne mbadi dhikukutu. ⁴ Kwakeheyu ghapwa kushamuruka kwaNyambi ne ghafunda kaye. agha ne gho mawino agha ghafunda kaye, nomatawero ghetu. ⁵ Yidye keho gho kufunda kaye? Oyu gfho kutawa eshi Jesusi ne Mwana Nyambi. ⁶ Aye ne oyu gheyire pameyu nopamanyinga: Jesusi Kristusi. Mbadi gheyire pameyu ngenyu, ene pameyu nopamanyinga. ⁷ Yoyishi apo pakara hahatu awa hatapanga ghushupi: ⁸ Mupepo, meyu, nomanyinga. Yinu yihatu yi yakara mumakutjwathaneno. ⁹ Ngeshi hatuwana ghushupi wawanu, ghushupi ghokwaNyambi ne ghukuru. Ghushupi waNyambi ne ghuno, Gha tu yarekera ghushupi kuhatera kwamwanendi. ¹⁰ Keheyu ghana kutawa mwa mwana Nyambi ghushupi ne kukara mumwendi thinda. Oyu ghokupira kutawa ne kakara thinda eshi mukambango, yoyishi mbadi mbadi ghatawa ghushupi oghu ghatapa Nyambi kuhatera kwaMwanendi. ¹¹ Noghushupi ne ghuno: Nyambi ghatupire moyo ghororuheya, nomoyo ghune mwaMwanendi. ¹² Oyu ghakara naMwana ghakara nomoyo ghororuheya. Oyu ghapira kukara naMwana Nyambi mbadi ghakara nomoyo ghororuheya. ¹³ Namutjangera yinu yino podigho eshi mudimuke eshi mwakara nomoyo ghororuheya-kukwenu amwe mwatawa mudina dyaMwana Nyambi. ¹⁴ Shime, oghu ne ghoghutanavu twakara nagho kughutho wendi, ngeshi kukumbera kukwendi keheyi kukutha kumahimeno ghendi, aye ghana kutuyuvera. ¹⁵ Karo, ngeshi kudimuka eshi aye kutuyuvera-keheyi tuna kwipura mumwendi-tuna dimuka eshi tuna wana yoyihe eyi tuna mwipura. ¹⁶ Ngeshi ghumwe ghamono muyendhendi ghana kutenda diharwero edi dina kupira kutwara kuyifa, ghakona kuraperera, noNyambi ghana kumupa moyo. Kuna kutambithera kudiharwero dyokupira kureta yifa. Podidi diharwero dyo kureta yifa; mbadi na kughamba eshi ghakona kuraperera koyo. ¹⁷ Kehe kupira ghuhungami ne diharwero, ene podidi diharwero edi dyapira kutwarithera kuyifa. ¹⁸ Twa dimuka eshi keheyu ghapwa kushamuruka kwaNyambi mbadi wa kuharura shime. Ene, oyu ghapwa kushamuruka kwaNyambi ne ghakara mumakungero, nomukanore mbadi wakumuyipitha. ¹⁹ Twa dimuka eshi atwe ne kwaNyambi twa tunda, no twa dimuka eshi kaye kokahe kakara mumangcamu dhananure. ²⁰ Ene twadimuka eshi Mwana Nyambi ne gheyire no ghana tupire matjwathaneno podigho eshi tumudimuke aye ghoghushemwa. Twa kara mumwendi ye ghoghushemwa, mwaMwanendi Jesusi Kristusi. Oyu ne yoNyambi ghoghushemwa, nomoyo ghororuheya. ²¹ Hanuke, muyakunuke kwawanyambi hombango.