¹ Twawna madimukithero eshi yipara yorungu yidi mukatji kenu, rudhi rorungu oru hadhira kutawedhera ngambi mwawahayidena eshi mwana ghashimbe didhiko dyawihe. ² Yomunakukumonekitha! ngomwa kona kuguva, podiyo munu yu gharuwanine kemo mumushwayithemukatji kenu. ³ Ngambi kenge nidi mbadi nenu panyama, ene pamupepo nenu nidi. Ame kare napita matateroghoyu ghatendire yinu yokemo, yira name pona karire. ⁴ Pamakonganeno ghenu ghomudina dyafumu Jesusi name nenu pamupepo, nongcamu dhahekudyetu Jesusi modhidi mukatji . ⁵ Tutape murume yu kwa shatani kumahanyaghukero ghoyirama,podiyo mudhimu wendi mboghupwe kughamwena mudina dyafumu. ⁶ Yikununeka yenu ne mbadi yiwa,mbadi mwadimuka eshi tuhingo totupu ne kuhahitha ghuroto ghoghuhe? ⁷ Mukukenithe mwathinda kuhingo dhodhikuru-kuru, podiyo mukare mwaghuroto ghoghupya, ghomukare yamwe shemwa Kristusi, ndjwighana wetu gho paska ghapwa kuyamba kare. ⁸ Podiyo tushamberere mukandi mbadi no hingo dhodhikuru-kuru, hingo dho dishamu no ghukashu, ene tukushamberere noghuroto ghoghukushuki noghushemwa. ⁹ Namutjangerire mumambapira eshi norofotji temba mukupakerere nawakarungu. ¹⁰ Yino mbadi nakuninga eshi hakarungu homukaye ,haka ghunu ngambi kwakambango ngambi kwa kareri hawa Nyambi hombango hokaye kano, mukashwagha kuyinu yoyiheya yine shimengwa muyakunuke koyo kaye. ¹¹ Pano nakumutjangera podiyo mbadi mwakona kukupakerera nawa hakutoya eshi hayendha ene agho ne pakupara murungu ,ngambi mu ghumu, ngambi haka yishewe, no hadakwi. Nomwadya pofotji namunu ghokemo. ¹² Ngepi di nakupakererea mukutetera wa hakara panunda dhongirishe? Kene mbadi twakona kutetera wa hadi mwishi dhongirishe. ¹³ Nyambi ne kutetera awa hadi panunda dhongirishe, mushwayithe hanu hokemo mukatji kenu.