¹ Apa neyire kwenu mwayendhange, mbadi neyire nomanando ghomakuru ngambi yitwetha yoyikuru apa nana muyuvithire ghushemwa oghu wonda kuhamena kwaNyambi. ² Ponanatokwerire eshi mbadi nakona kughamba nenu kehe thinu shimengwa Jesusi Kristusi oyu hanapamarire. ³ Nakarire nenu mughukashu, nomughoma, ndani natutukwire thikuma. ⁴ Mbudhi edhi namuyuvithire mbadi dhakarire muyighamba mwene endi muyitwetha, ene pathirughana tha mupepo no ngcamu. ⁵ Podiyo matawero ghenu mbadi ghakare paghudimuki wamunu, ene pa ngcamu dhaNyambi. ⁶ Pano kunakughamba no ghudimuki mukatji kawa hatawa mumatawero, mbadi noghudimuki gho kaye, mbadi noghudimuki wawa raghuri ho nako dhino, awa hankutundapo pano. ⁷ Ene tunakuyuvitha ghudimuki ghoshemwa waNyambi oghu wonda, ghudimuki oghu ghondekireNyambi no ghaghuturekere kudifumanekero dyetu. ⁸ Mbadiko muraghuri yu ghatjwathanine yi, yoyishi ngohatjwathanine ne ngombadi hapamarerire fumu gho difumanekero. ⁹ Dyodi yenema yitjanga eshi, "mbadiko diho edi dyamonine, no mbadiko ditwi dya yuvire, nombadiko mutjima wandhundhire koyi gharoyithera Nyambi wa hamuhaka. ¹⁰ Ene Nyambi ghahokorire yi kupitera mumupepo, Mupepo warondonona yoyiheya, ngambi yoghudhungi waNyambi. ¹¹ Yidye yu ghadimuka yighayara ya munu ,shimengwa mupepo wa munu wakara mumwendi?Kemo karo mbadiko yu ghadimuka eyi yonda mwaNyambi, shimengwa mupepo waNyambi. ¹² Kemo atwe mbadi twawana mupepo ghokaye kano, ene mupepo ghu watunda kwaNyambi, podigho tukone kudimuka yinu eyi ghatupa Nyambi nyara-nyara. ¹³ Tunakughamba yinu yino mumanando agha ghapira kushwagha payihonga yoghunyanyami wamunu, ene pamupepo oghu ghunakupathurura yinu yopamupepo kwawanu ho pamupepo. ¹⁴ Oyu ghakara mbadi pamupepo ne mbadi ghakona kuwana yinu eyi yahatera kumupepo waNyambi, yoyishi mbadiko mudyo kwendi, mbadi yatjwathana ye yoyishi mumupepo yemana. ¹⁵ Oyu ghakara pamupepo nekutetera yinu yoyiheya, ene mbadiwakupwa kutetera ye. ¹⁶ Yidye ghadimuka yighayara ya Nyambi, noyidye ghokumupa maghano? Ene atwe twakara no yighayara ya Kristusi.