¹ Mukare mwa temununi wange thika edi nidi no mutemununi waKristusi. ² Pano kuna kumukugha yoyishi mwa kwaterera thikuma kuyitjo thika edi na yimupire. ³ Pano nashana mutjwathane eshi Kristusi ne yo mutwi wa kehe katughuru, no katughuru ne yo mutwi wambuyama, noNyambi ne yo mutwi waKristusi. ⁴ Kehe katughuru gho kuraperera endi kupumba nomutwi wendi ghana ghufiki ne ghana nyatha mutwi wendi. ⁵ Ene kehe mbuyama gho kuraperera endi kupumba no mutwi wendi mbadi ghana ghufiki ne ghana nyatha mutwi wendi. Ayo yinu yofotji yira mutwi wendi ha ghukurura. ⁶ Ngeshi mbuyama mbadi sho ghafike mutwi wendi, gha kona kuteta huki dhendi dhifupipe. Ngeshi honyi thikuma kwambuyama gha tete huki dhendi endi gha kurure mutwi wendi, ninge gha fike mutwi wendi. ⁷ Katughuru mbadi gha kona kufika mutwi wendi, aye ne yo thishwi tho difumanekero dyaNyambi. Ene mbuyama ne difumanekero dyakatughuru. ⁸ Katughuru ne mbadi ha mu tendire kutunderera kwambuyama. Ene, mbuyama ha mutendire kutunderera kwakatughuru. ⁹ Shime karo katughuru mbadi ha mu tendere mbuyama, ene mbuyama kwamutendere katughuru. ¹⁰ Eyi ne yo ya ningitha mbuyama ghakare no thineghedhitho thongcamu pamutwi wendi, pamurandu wawaengeli. ¹¹ Ngambi kemo, mwaFumu, mbuyama mbadi gha kukurupera papendi kwakatughuru, endi katughuru naye mbadi gha kukurupera papendi kwambuyama. ¹² Thika edi gha shwagha mbuyama kwakatughuru, thikadyo naye katughuru ghashwagha kwambuyama. No yinu yoyihe yashwagha kwaNyambi. ¹³ Mukutetere ndhango mwathinda: Ya roghera kwambuyama gha raperere kwaNyambi no mutwi wendi mbadi ghana ghufiki ndi? ¹⁴ Mbadi ka muhonga kaye kathinda eshi ngeshi katughuru ghadi no huki dhodhire ne dinyatho kukwendi? ¹⁵ Mbadi ka muhonga kaye eshi ngeshi mbuyama ghadi no huki dhodhire ne dyo difumanekero dyendi ndi? Huki dhendi kwadhimupa eshi thikukavitho thendi. ¹⁶ Ene ngeshi poghadi ghana kushana kukanana yinu yi, mbadi twakara no yitenda yimwe, no mangirishe ghaNyambi temba. ¹⁷ Ene moghano marawero ghana karandako, mbadi na kumutanaghura. Pakwiya pofotji, mbadi pahasha ene paghuyi ghoghukuru. ¹⁸ Mudyango dyo kutanga, na yuvu eshi apa mweyanga pofotji mungirishe, poghadi ma kutawero mukatji kenu, no mutara ghumwe nayitawa. ¹⁹ Pakona kukara mambunga mukatji kenu, podigho eshi awa hapwa kutambura hamoneke mukatji kenu. ²⁰ Pakwiya pofotji, mbadi murarero waFumu mwakudya. ²¹ Pakudya, kehe yuno kudya yidya yagho kughutho hamwe gho kuwana yidya yagho. Ghumwe ne ndhara no ghumwe kokuterera. ²² Mbadi mwa kara no mandhugho gho kudyera no kunwena ndi? Kunyatha mwe ngirishe dhaNyambi no kufitha honyi awa ha pira yinu ndi? Yinu munye sho ni ghambe nenu? Ni mu tanaghure ndi? Mbadi sho ni yi mutanawere yi! ²³ Na wanine kwaFumu eyi na tapire kukwenu, podigho Fumu Jesusi, mughuthiku oghu ha muhetire, gha shimbire ghuroto. ²⁴ Apa gha manine kutapa matumero, gha ghuyondore no kughamba eshi, ''Eyi ne yirama yange, ayo ne yenu. Mutendange yi mukunivuruka.'' ²⁵ Mundhira dhofotji gha shimbire kopi munyima dho murarero, no gha ghambire eshi, ''Oyu kopi ne ghoghundambo ghoghupya mumanyinga ghange. Mutendange yi kehe pano mwakumunwa, mu ku ni vuruka.'' ²⁶ Kehe nako mwa kudya ghuroto ghu no kunwa kopi yu, kuna kuyuvitha yifa yaFumu kate mbo gha kegha. ²⁷ Keheyu, keho, gho kudya ghuroto endi kunwa kopi waFumu mundhira dhokupira kuroghera mbo ghana kara no murandu gho yirama nomanyinga ghaFumu. ²⁸ Ninge munu gha kukengurure thinda pakutanga, no mundhira dhi ninge gha dye kughuroto no kunwa kukopi. ²⁹ Oyu gho kudya no kunwa oku mbadi ghana kukengurura yirama yendi kudya no kunwa mapangwero kukwendi thinda. ³⁰ Yodigho eshi hengi hopapenu hana kasha no tjitju, no mwamwe ne muna kotho. ³¹ Ene ngeshi tukukengurure twathinda, mbadi sho tupwe kupangura. ³² Ene ngeshi Fumu ghana tupangura, tuna pu kuhonga, podigho eshi mbadi ha tuwane murandu pofotji no kaye. ³³ Podigho keho, mwayendha, pakwiya pofotji nomudye, mukutaterere. ³⁴ Ngeshi poghadi ghana kuyuva ndhara, ninge gha dye kudighumbo, podigho eshi apa sho mwiye pofotji mbadi yikare yo kutetera ndhango. Munyima kuyinu eyi mwa tjangire, mbo nana tapa marawero pa mbo niya.