¹ Pashirugho osho Johanes mukushi ghuye kuna kuyiyira mumburundu ya Judeya kumwe na kughamba ashi, ² "Kushighurenu, untungi wa liwiru pepi ghuna kara.'' ³ Johanesi ndje atambire muporofete Isaya opo aghambire, ashi, ''Liywi lya ghumwe kuna kukuya litunde mumburundu ashi, 'Wapayikenu Ndjira yaHompa, turenu ndjira yendi yivyukilire.''' ⁴ Johanesi kadwatanga vyuma vya huki da ngamero ntani na ruvya rwa shipapa mumbunda yendi. Ndya dendi limbonde na ushi wa muwiya. ⁵ Makura Jerusalema, naJudeya nayintje, ntani navirongo vya kundurukido mukuro wa Jordan kava yendanga ku kwendi. ⁶ Ghuye kava kushanga muMukuro wa Jordan, kumwe naku tongonona ndjo davo. ⁷ Ana ngoli ghuye opo amonine va Farisayi nava Sadukayi vavangi kuna kuya kukwendi ava kushe, ghuye aghamba navo ashi, ''Anwe vana vamayoka gha mbaroka, are atapo kukwenu marondoro ngamu vhure kushenduka ugara na lishandu lyalinene olyo lina kuyo? ⁸ Yimenu ngoli viyimwa vyaviwa vya kutjindja ukaro. ⁹ Anwe kapishi mughayare na kughamba ashi, 'Atwe twakara na Abraham shetu.' Ame kuna kumurondora kumwe nakumutantera ashi Karunga kuvhura kutura ghano mawe ghakare vana va Abrahamu. ¹⁰ Likuva va liwapayika kare vana litura kare pandandani da vitondo. Kehe shino shitondo na shimenwa shakupira kuyima viyimwa vyaviwa vakona kushitetapo kumwe naku shivukumina mumundiro. ¹¹ ''Ame kuna kumu kusha tupu muliyoyero lya mema lya kudongononapo ndjo denu. Ano ngoli ogho ngayo kunyima yande ghuye kwapitakana papande, nampili nameshi kapi nawapera kudamuna nushimbe nkaku dendi. Ghuye nga muyoya na Mpepo yakupongoka ntani na mundiro. ¹² Ghuye kuna kwaterere mpumo mulighoko lyendi yaku pumita mahangu parupare agaghunune mahangu na mungu, ghuye kupongeka muyangu wendi wamahangu mushishete. Ntani ghuye nga vhukumina mungu mumundiro wakutwera unene wakupira kuveva.'' ¹³ Makura Yesus atundu ku Galileya ayende ku Mukuro wa Jorodani kwa Johanes aka mukushe. ¹⁴ Ano ngoli Johanes amu kava, kumwe nakughamba ashi, ''Ove wawapero kunkusha ame, weni ngoli ove omo ghuvhura kuya kukwande?'' ¹⁵ Yesus alimburura kumwe na kughamba ashi, ''Renka tuviruwane ngoli, mposhi tutikitiliremo navintje vya uhungami ovyo vatjanga.'' Makura Johanes avitambura ava viruwana vikare ngoli. ¹⁶ Tupu vamana kumukusha, makura Yesus atundumo aya ghuke mumema, kwaharukako tupu, liwiru lina paturuka. Makura ghuye amono Mpepo yaKarunga kuna kusheghumukira papendi yira nkuti ayi kara papendi. ¹⁷ Kwa kuharukako tupu, liywi kuna kutunda muliwiru kuna kughamba ashi, ''Ghuno ndje Monande nahora unene. Ghuye kwayenda kumutjima wande."