¹ Nangura-ngura yayinene muliyuva lyakuhova mushivike, ghava yakuntoko , ndi vayite tughutura twa shidumba otuva wapayikire. ² Ghava wana liwe lina tindumukako. ³ Ghava ngene mo, ngoli kapi vakaruwanine mo rutu rwaHompa Jesusa. ⁴ Ghavi shoroka ashi, paruvede oro kalire ashi vana piyagana kovino, hararasi, vakafumu vaviri ghava yimana kuntere yavo muvyuma vyakuvembera. ⁵ Mpopo vagholikadi vavo vanakara naghoma makura ghava nyongeke vipara vyavo palivhu, nakughamba kuvagholikadi, '' Vinke muna kushana-shananena muntu wamonyo mukatji kavafe? ⁶ Ghuye mwato muno, ngoli ana vhumbuka! Vurukenu omu aghambire nanwe ghuye panya shimpe muGalireya, ⁷ pakughamba ashi mona muntu ghana kona kutika mumaghok ghava kandjo nakumupampara, ntani muliyuva lyaghutata ghaka vhumbuke nka.'' ⁸ Mugholikadi ghavuruka nkango dendi ⁹ nakukavyuka atunde kuntoko ntani gha timwitiri vininke navintje vino kovanya ronaghumwe ntani nava vakughupako. ¹⁰ Pano Maria magdalena, Johana, Maria vawina vayaJakop, ntani vagholikadi vamwe navo ghava katanta vininke vino kuva Apositolisi. ¹¹ Ngoli mbudi yino kwayuvikire ngwaya tupu kuva Apositoli, ntani vavo kapi vavi pulire vyavagholikadi. ¹² Ngoli shimpe Peturusa gha shapuka nakukadukira kuntoko, ntani, kushuta nakukakenga mo, gha mono vyuma vyamakeshe pantjavyo mo. Petrusa makura ghaka vyuka kumundi wendi, ghuye kunakughayadara ashi vinke vina shoroka ndi. ¹³ Mpopo tupu, vaviri mwavo ndi ndyo liyuva vayendire wakumunda walidina Emanus, oghu wakaliro ghure wa kilo dimurongo hamboghumwe kutundilira ku Jerusalema. ¹⁴ Ghava kutimwitiri vininke navintje ovyo vya shorokiro. ¹⁵ Ovi vya shorokiro ashi, vavo po ngosho vahokwa kutimwitira nakukupuraghera kumwe, Jesusa mwene ghavayere nakukayenda navo. ¹⁶ Ngoli mantjo ghavo kapi ghavulire kumudimburura. ¹⁷ Jesusa aghamba kukwavo, '' Nani vinke vino muna kutimwitiranga anwe kuna kuyenda?'' Ghava yimana mpoopo naruguvo. ¹⁸ Ghumwe wavo walidina Cleopasi, a mulimburura, '' Ove tupu wakaromo mu Jerusalema anapiro kuyiva ovi vina shorokomo mayuva ghano? ¹⁹ Jesusa aghamba kukwavo, '' Vininke munke? ghava mulimburura, '' Ovi vina hameno Jesusa wamu Nazarete, oghu akaliro muporofete, ushiri munankondo ntani nkango kushipara sha Karunga ntani kuvantu navantje, ²⁰ ntani omu vamuyitire na kumupangura vaPristeli vavakurona navapangeli vetu vamupangure dogoro mfa nakumupampara. ²¹ Ngoli atwe kwa huguvalire ashi ndje ngaka yoworo Israyeli. Mo, vyavingi mbyovi, weno lyaghutatu kutunda opo kavishoroka. ²² Ene ngoli nka, vagholikadi vamwe vamumbunga yetu vanatutetukita, opo vana kakara kuntoko ngura-ngura yayinene. ²³ Apa vana kapira kukawanamo rutu rwendi, mpo vanaya, mukughamba ashi vana kamona nka limoneko lya va Engeli ovo vana ghambo ashi ghuye ndi namwenyo ghanakara. ²⁴ Vakafumu vamwe vanakaro natwe mpo vana yendiko kuntoko, ntani vana kaviwana moomu vana vitanta vagholikadi. Ngoli kapi vana kamu mona.'' ²⁵ Jesusa aghamba kukwavo, '' O vakafumu vamavaya nadimutjimakoka mukupura mwanavintje vinya va ghambire vaPorofete! ²⁶ Nani kapi vya kalire hepero Kristusa kunyandera vininke vino, ntani nakukangena mughuyerere wendi?'' ²⁷ Makura kutamekera kwa Mosesa ntani naku vaporofete navantje, Jesusa kwava torokilire vininke vyahaminino kukwendi mumatjangwa naghantje. ²⁸ Opo vashanine kutika pamukunda vatambire, Jesusa gha kurenkita yira ghuye ghure a tambire. ²⁹ Ngoli ghava mutininiki, mukughamba, '' Kara natwe, nayone ngurova kare ntani liyuva nalyo hambara yira lina piti tupu kare.'' Makura Jesusa gha Kangena ghaka kare navo. ³⁰ Ghovi vyaya shorokiro ashi, pakushungira navo ghalye, a ghupu mboroto, ghayi tungiki, nakuyibamuna, ayi vapa. ³¹ Makura mantjo ghavo aghamahuka, nakumuyiva, kumwe nakudongonoka mumantjo ghavo. ³² Ghava kughambita vavene, '' mutjima wetu kapi ghunapi mwana umwetu, panya ghuye kuna kutu ghambita mundjira, pakutufikwira matjangwa?'' ³³ Ghava shapuka ndjoyo viri vavyuke kuJerusalema. Ava kawana ava murongo naghumwe vana pongo pamwe ntani vanya vakaliro naye, ³⁴ mukughamba, " Hompa ghana vhumbuka, mughu shiri-shiri, ghana monekere nka Simoni. ³⁵ Makura ghava timwitiri vininke vinya kavi shoroko mundjira, nomu kava dimburura Jesusa paku bamuna mboroto. ³⁶ Moomu va ghambire vininke vino, Jesusa mwene ghaya yimana mukatji kavo, ntani aghamba kukwavo, '' Mbili yikare kukwenu.'' ³⁷ Ngoli kwa tukukire ntani kwa yulire woma, ntani vavo yira kwamonine mpepo tupu. ³⁸ Jesusa aghamba kukwavo, '' vinke muna karere mumaudito? Vinke muna karere mumakupuraghero mudimutjima denu? ³⁹ Muna kumona maghoko ghande nampadi dande, Ame naghumwande. Nkwatenu mumone. Mpepo kapi yakara narutu navifupa, yira moomu muna kumona ame.'' ⁴⁰ Opo a manine kughamba vino, ghava negheda maghoko nampadi dendi. ⁴¹ Shimpe kapi vavi pulire mukonda yaruhafo, ntani kwakalire vana hafa. Jesusa aghamba kukwavo, '' munakara ko navintu vyakulya?'' ⁴² Ghava mupa karuha kantjwi yakuyota, ⁴³ ntani ghayi ghupu nakuyi lyera kumeho yavo. ⁴⁴ Aghamba kukwavo, '' Dino ndo nkango dande naghambire kukwenu opo nakalire nanwe, ame navintje vinya vatjanga muveta daMosesa nava Porofete namumaPisarome vyakona kutika mo.'' ⁴⁵ Makura ghamahura maghano ghavo, ashi vavure kukwata lighano matjangwa. ⁴⁶ Aghamba kukwavo, '' Mo vavitjanga, ashi Kristusa a hepa kunyanda ntani ngakavumbuka nka kuva fe muliyuva lyautatu. ⁴⁷ Likushighuro nalighupiropo lya ndjo ndi lyahepa kuliyawira mulidina lyendi kudimuhoko nadintje, kutamekera kuJerusalema. ⁴⁸ Ghanwe mbangi davininke vino. ⁴⁹ Kuna kuyenda nika mutumine ovi vamutwenyidira vavava. Ngoli anwe karenu mushitata nako ngava kamudwateka nkondo dakutunda kuwiru.'' ⁵⁰ Opo ghava rupwitire mughuyenya waBethany ghayerura maghoko ghendi ghavatungiki. ⁵¹ Paruvede oro ghava tungikire, ava shuvu mpo ghadamukire mughuntungi waliwiru. ⁵² Makura ghava mutongamene nakuvyuka kuJerusalema naruhafo rwarunene. ⁵³ Ntani ghava kakarerera kuntembili, vatange Karunga.