¹ Pano ruvede lifeste lyamboroto yahana vifulito rwaro pepi runa kara, eli vatwenyanga ashi Pasika. ² Vakurona vavanene navatjangi vamatjangwa kwaghayalire omu vadipagha Jesusa, mbyovishi vakalire naghutjirwe kuvantu. ³ Makura Satana ghangene mwa Judas, oghu vayitanga Isakarioti, oghu ghakaliro ghumwe wavaro nambiri. ⁴ Judas gha yendi kuvakurona vavanene nava kurona vavakavita mukukatimwitira navo omu gha yenda Jesusa kuntji amuvayitire. ⁵ Vavihafilire nakuvitambura mukumupa maliva. ⁶ Ghavipulitiri nakushana-shana mpito ndi ghamutape kukwavo mumbunga mo. ⁷ Makura liyuva lyamboroto yahana vifulito alitiki po, opo pakaliro lidjambo lyandjwighona yaPasika. ⁸ Makura Jesusa ghatumu Petrusa na Johanesi, aghamba, ''Kayendenu mukatu wapayikire ndya da Pasika, mposhi tuvure kukalya.'' ⁹ Avaghamba kukwendi; '' Kininko ghuna tushanene kukawapayikira?'' ¹⁰ Ava limburura, '' Kengenu, opo mukangena mushitata, mukafumu ghana shimbo hupa yamema mukagwanekera naye. Mukamu kwame mumundi omo akangena. ¹¹ Makura mukaghambe namwenya ndjugho, ' '' mushongi kuna ghamba koye, '' kuninko kunkondwa yavagenda, oku nikalyera pasika navakashishongero vande?'' ¹² Kwaka munegheda nkondwa yakuwiru navipuna yavyo. Mukawapayikilire moomo.'' ¹³ Makura avayendi, nakukawana navintje moomu avitantire. Makura ghavawapayiki ndya da Pasika. ¹⁴ Opo yatikire vili, gha shungiri nava Apositoli. ¹⁵ Makura aghamba kukwavo, '' Ame kani shana unene-nene kulya Pasika kumwe nanwe kumeho ngani kanyande. ¹⁶ Mpo nakughamba ngoli kukwenu, '' kapi nikayilya nka dogoro ngavintikiliremo muUntungi waKarunga.'' ¹⁷ Makura Jesusa aghupu nkinda, opo ghamanine kutapa mpandu, aghamba, '' Ghupenu yino, muyikugaunwine mwanaumwenu. ¹⁸ Moomu nakumutantera, kapi ngani kanwa nka kulinyango lyashindjembere dogoro nkoko ngaukayera Untungi wa Karunga.'' ¹⁹ Makura aghupu mboroto, opo ghamanine kutapa mpandu, ghayi bamuna, nakuyivapa, aghamba,'' Runo ndo rutu rwande, oru vana tapa murwenu. Viruwanangenu vino mukumvurukirapo.'' ²⁰ Aghupu nkinda mundjira ndjoyo nka kurukurwa murarero, Aghamba,'' Yino nkinda likukwatakano lyalipe muhonde yande, oyi yatekangero pa pwenu. ²¹ Ngoli kwatenu lighano. Liwoko lyowo akantjororo name ghana kara kuntishe kuno. ²² Mo ngoli shi Mona Muntu kuvi mupita moomu vavi ngungunyikira. Ngoli rugugho kumuntu ghunya linapitiri liyendo kuntji yendi!'' ²³ ghava tameke kukunungaura ashi ndi ghunindjepo pwavo ghavuro kurughana vyangoweyo. ²⁴ Makura moomo mukatji kavo ghamutameke dimutangu kuhamena ghare mukatji kavo ghana wapero kukara munenepo. ²⁵ Aghamba kwavo, '' Vahompa vavapagani vaKarungaghona pa pwavo, ntani ovo va karo naghunankondo pa pwavo vavo kwava twenyanga ashi varuwani virughana vya viwa. ²⁶ Ngoli kapishi vikare yira ngoli kukwenu, mulivango lya ngoli, pulitirenu wamunenepo mukatji kenu akare yira ndje mwanuke po, ntani pulitirenu ghunya wamulyo po ngudu ghakare yira ndje waku karera. ²⁷ Nani are wamunene po, ndjegho a shungirango kuntishe, ndi ndjegho a karerango? Nani kapishi ndjeghunya ashungirango kuntishe? Tara ame nakaro mukatji kenu yira ndjeghu a karerango. ²⁸ Ngoli anwe kamutwikirango name mumpanguro dande. ²⁹ Namushungidika muuntungi, nampindi yira moomu tupu vantjungidika vavava muuntungi, ³⁰ ashi muvure kunwa nakulya kuntishe yande muuntungi wande, ntani anwe ngamuka shungira kuvipuna vyauHompa mukupangura marudi ronambiri gha Israyeli. ³¹ '' Simoni, Simoni, vangarara, satana kunapura ghaku ghupe, ashi ndi ngaka kushuke yira rukokotwa. ³² Ngoli nakuraperere po, lipuro lyoye ndi lya shawa.Kuruku yakuka vyukamo muruku, ngaghu ya pameke vaghuni na vakuru voye.'' ³³ Petrus a ghamba kukwendi, ''Hompa, Ame nakurongikidiri kuyenda nove nakuntje kudorongo nakumfa.'' ³⁴ Jesusa gha limburura,'' Nakukutantera, Petrus Shikondomboro shahana kuyigha liyuva lino, kumeho ya ku ka nkanana vikando vitatu kundjiva me.'' ³⁵ Makura Jesusa a ghamba kukwavo,''Opo na mutumine mwa hana kandjatoghona, ndjato ya vihepwa, ndi vicamakaku, mpoviri vyamu piliron ndi? Ghava limburura,'' kundere ko.'' ³⁶ Makura a ghamba kukwavo, ''Ene ngoli, oghu ghana karo nakandjatoghona, gha vitambure, ntani nka ndyato yavihepwa.Oghu ana piro rufuro a ghulite shikoverero shendi a ghure ko rumwe. ³⁷ Moomu na ku mu tantera, ovyo vatjanga kuhamena ame vyakona kutikiliramo. 'kwamu varwire kumwe nava vapiro veta. 'Kovyo va pumba kuhamena ame kuna kutika mo.'' ³⁸ Makura ava ghamba ,''Hompa, kenga! marufuro maviri ghano.'' A ghamba kukwavo, ''Ghana gwana.'' ³⁹ Jesusa akayenda, yira moomu tupu kavirughananga, kundundu ya maghuywe, navakashishongero ghava mukwama. ⁴⁰ Apa vakatikire, aghamba kukwavo, '' Rapererenu mposhi mupire kungena mumasheteko.'' ⁴¹ Ghatundupo pavo kuhamena livukumo liwe, ntani a tongamene nakuraperera, ⁴² Vava, nange ashi ghuna panga, ngupe nkinda yino. Napo nawa tupu, kapishi shihoro shande, ngoli shoye shishoroke.'' ⁴³ Makura mu Engeli wamuwiru ghamumonekere, nakumupameka. ⁴⁴ Kukara murunyando, gharaperere unene-nene, ntani liyuywa lyendi ghalikara yira likuru tembwe lyahonde lina kuwero palivu. ⁴⁵ Apa a shapukire pandapero yendi, aya kuvakashishongero ntani ghaya vawana vavo vanarara, mukonda yarugugho rwavo, ⁴⁶ ghavapura, '' Vinke munararere? Rambukenu muraperere, mpo ashi mupire kungena mumasheteko.'' ⁴⁷ Ghuye po shimpe kuna kughamba, mpopo tupu, mbunga ayi moneke, na Judasi, ghumwe wavakashishongero, ghana kuvapititiro, ghaya papepi na Jesusa ghamucumite, ⁴⁸ ngoli Jesusa aghamba kukwendi, '' Judasi ove ngoli kuna kushorora ghuna kushorora Mona Muntu nalicumito?'' ⁴⁹ Makura vanya vakundurukidiro Jesusa opo vamonine ovyo vina kushoroko, ghava ghamba, '' Hompa, tutoghone mo na rufuro?'' ⁵⁰ Makura ghumwe wavo ghatoghona po mukareli ghumwe wamupristeli wamukurona, nakutetako litwi lyendi lyakukalyo. ⁵¹ Jesusa aghamba, '' Vina gwana mbyovyo!'' Ghakwata kulitwi lyendi nakumuverura. ⁵² Jesusa aghamba kuvapristeli vavakurona, kuvakurona vavakavita vantembi, ntani nakuvakurona-pongero ovo vamuyeliliro mukumu rwita, '' Anwe kuya yira kuna yere mukawidi, namarufuro navitwa? ⁵³ Opo kanikaranga kehe liyuva nanwe muntembeli, kapi mwakambikire mawoko papande. Ngoli yino ndjo vili yenu, ntani ghunankondo wa mundema.'' ⁵⁴ Nko kumukwata, vamughupepo nakumuyita kumundi wamuPristeli wakuwiru. Ngoli Petrusa ghamukwama kughurere. ⁵⁵ Kuruku yakuvankeda mundiro pakatji kalivango lyampanwiro nakushungira pamwe, Petrusa gha shungiri mukatji kavo. ⁵⁶ Mukareli-kadi ghumwe ghamumono omu ghashungilire mushite shamundiro nakukenga kuvyukilira kukwendi makura aghamba, '' Oghu mukafumu naye kakaranga.'' ⁵⁷ Ngoli Petrusa ghavi kanana, mukughamba, '' Mugholikadi, Ame kapi namuyiva.'' ⁵⁸ Muruku yakaruvede-ghona mpwali nka ghumwe amumonino, ntani aghamba, '' Nove ghumwe wavo.'' Ngoli Petrusa aghamba, '' Mukafumu, kapishi ame.'' ⁵⁹ Muruku rwahambara vili mukafumju ghumwe gha tininiki nakughamba, '' Ushiri-shiri mukafumu ghuno naye kakaranga, mbyovishi ghuye muka Galireya.'' ⁶⁰ Ngoli Petrusa aghamba, '' Mukafumu, ame kapi nakuyivashi vinke nawa-nawa ghuna kughamba.'' Paruvede ndoro ghuye kuna kughamba, shikondomboro ashi yighi. ⁶¹ Nko kupirukako, Hompa gha kenge kwaPetrusa, Petrusa ntani ghana kuvhuruka nkango daHompa, opo aghambire kwendi, '' Kumeho yakuka yigha shikondomboro namuntji ove ghuna nkanana vikando vitatu.'' ⁶² Petrusa ghaka rupuka pandje kumwe nakuka bwayamo alire. ⁶³ Makura vakafumu vanya vakungiro Jesusa ghava musempurura nakumutoghona. ⁶⁴ Ghava mufikiliri shikeshe nakumupuraghera, mukughamba,'' Porofete! ghare ghunya anakutoghono?'' ⁶⁵ Vininke vingi vaghambawire varenkaure Jesusa mwamudona, mukumu shwaghura. ⁶⁶ Tupu lya kya, vakurona vavantu ava pongo pamwe, navantje vapristeli vakuwiru navatjangi vamatjangwa. Ghava mutwara mundango ⁶⁷ nakughamba,'' Nangeshi ve Kristusa, tutantere.'' Ngoli aghamba kukwavo, '' Nange ninutantera, kapi muvipura, ⁶⁸ ntani nange nimupura, kapi mulimburura. ⁶⁹ Ngoli kutunda pano, Mona Muntu ngakashungira kuliwoko lyarulyo rwankondo daKarunga.'' ⁷⁰ Navantje ava ghamba, '' Makura ngoli ve ghuMona Karunga?'' Jesusa aghamba kwavo, '' Muna ghamba ashi ame.'' ⁷¹ Ghava ghamba, '' Vinkenka tuhepera mbangi? Vantu tuna kuyuviroko naghumwetu kutunda mukanwa kamwene.''