¹ Hompa kuna kutanta ashi: ''Pashirugho osho ngani wapukurura lirago lya Juda na Jerusalemu. ² Ngani pongayika dimuhoko nadintje makura ngani diyite mumuramba wakupangwira. Oko nko ngoli ngani kava pangwira kwanavintje evi varuwana vantu vande. Vavo kwaharaganita po vaIsraeli muvirongo vyapeke mbyo vapukita Israel, shirongo shande. ³ Vavo kwa yanikidire vakwateke ashi are vawana va nkwati. Vamati na vakadona kwavaghulita kughupika mukuvashinta kuvhinyu na vakarushonda. ⁴ Vinke munakukambadara kunduwana, anwe vaTirusi na Sidoni mudimukunda nadintje daFilisitiya? Kuna kukambadara mumfutiremo vininke ndi? ''Nange ashi mo ngoli, ame ntaantani nimu vyute ruhoko! ⁵ Anwe kwahupa siliveli nangorodo yande, mbyo mwatwara limona lyande lyalinene muntambeli denu. ⁶ Anwe kwatwara vantu vamu Juda na muJerusalemu ure nashirongo shavo, mbyo mwaka vaghulita kuVagereka. ⁷ Ano ngoli ame kuna kuvahupa ko kumavega oku mwa vaghulita. Ngani muruwana yira moomu mwavaruwana. ⁸ Nganirenka vana venu vavakadona nava vavamati ngava vaghulite kuvaJuda; ava nya makura ngava vaghulite kuvaSabiya ovo vakaro ure. Ame Hompa, ame navighambo.'' ⁹ Twarenu mudi muhoko mbudi yino ashi: 'Kuwapayikirenu vita; yetenu vakavita venu; pongayikenu vakavita venu navantje valyate! ¹⁰ Mayewo ghautwe na marufuro, namakatana namahonga shamburenu. Naghu wakupira nkondo naye arwe. ¹¹ Kwangurenu muye, anwe dimuhoko dakumaruha naghantje, pongenu mumuramba.''' Tuma Hompa mbunga ya vakavita yiva rwite. ¹² Dimuhoko di kuwapayike diye mumuramba wa kupangwira. Omo mo nganishingira ame Hompa nipangure dimuhoko dakumaruha naghantje. ¹³ Udini Karunga wavo unene; vatjorenu yira moomu vatjoranga mahangu pakukesha-kesha; va kamenu yira moomu vakamanga mandjembere mushikunino dogoro vhinyu yi yure mo.'' ¹⁴ Mayovi na mayovi mpoghali mulipangwiro lya muramba, liyuva lyaHompa pepi lina kara mumuramba wa lipangwiro. ¹⁵ Liyuva na kakwedi kuna kushovagana, ano ntungwedi kapi dina kutema nka. ¹⁶ Hompa kuna kununga pandundu ya Siyoni, liywi lyendi kuna kundunduma muJerusalemu; livhu na liwiru kuna kukankama. Ngoli ngapopera vantu vendi. ¹⁷ ''Makura Israel ngaghu yive ashi ame Hompa, Karunga ghoye. Ame kwakara kuSiyoni, ndundu yande yakupongoka. Jerusalemu ngayi kara shitata shakupongoka; vakavirongo kapi ngava shikwata nka. ¹⁸ Pashirugho osho ndundu ngava yifuka navindjembere, ngomba ngadikara kehe kundundu; mema ngagha yura mutumukuro natuntje twa Juda. Mukuro ngaghu tunda muntembeli ya Hompa, makura ngaghu nengedeke muramba wa Akasiya. ¹⁹ ''Egipite ngamu kara mburundu, ano Edomu ngamukara mpuku, morwa varwitire shirongo shaJuda na kudipaha vantu vakupira ndjo. ²⁰ Ngani tondora ava va dipayo; ngani va dongwenena po. ²¹ Ngoli Juda naJerusalemu ngayi kara po dogoro naruntje, ano ame Hompa, ngani kara pandundu yaSiyoni.''