¹ Vyakuhamena kuvitapa ovyo vana kupongayikira vantu va Karunga vamu Vagarata, nanwe viruwanenu yira momu namutantera muMbunga Kriste. ² Kehe shundaha muliyuva lyakutanga mushivike, kehe uno anahepa kupungurako ushwi wendi kutwara mwaviwanamo vyendi. Kapishi dogoro nayatiki ntani munakuvipongayika. ³ Opo nganiyatika, nganiyatuma vamwe ava mwahuguvara kumwe na ntjangwatumwa vatware vitapa vyenu ku Jerusalem. ⁴ Ntjene ngapakara hepero yakuyenda name, ndi ngavayenda name. ⁵ Nganiya kukwenu opo nganiyapita Masedoniya. Mukondashi nganiyapita mu Masedoniya. ⁶ Ntjene ngaviyawapa ndi nganiyakara nanwe shiruwo shakufu nayintje, mposhi ngamuvhure kumbatera muruyendo rwande, rwa kehe kuno nganiyenda. ⁷ Ame kapi nahoro ashi nganiyamupite tupu. Ngoli ame kuna horo nganiyakare nanwe shiruwo shashire, ntjeneshi Hompa ngampulitire. ⁸ Ano ngoli nganikara tanko mu Efesus dogoro mu Pentekost, ⁹ Mbyovyoshi kukwande mavero anagharuka unene, ntani ndjira yina wapa yakuruwana viruwana vyavinene, ngoli vanankore navo vanavhuka unene. ¹⁰ Weno opo ngaya Timoti, ngamuyamutambure mwamuwa, morwashi uye kuna kuruwana viruwana vya Hompa, kumwe name. ¹¹ Kapishi ngamuya mushentje. Ano ngoli ngamumu kwafe pa mbili ngatwikire na ndjira yakuya kukwande. Ame kuna kumutaterera ngayatike kumwe nava unyendi. ¹² Vyakuhamena kwa unyetu Apollos, ame kuna kumukorangeda unene ngaye kukwenu kumwe nava unyendi. Ano ngoli kapi anahoro ashi ngayatike ntantani weno. Nani ghuye ngayatika nangeshi, ngamanguruke. ¹³ Karenu munavangara, karenu nalipuro, karenu vakafumu, karenu nankondo. ¹⁴ Viruwana vyenu navintje munahepa kuviruwana nashihoro. ¹⁵ Mwayiva valipata lya Stefanas, mbo vakuhova kukara vaKriste mu Akaia, mbyo vakutapa muviruwana vyakukwafa vantu vakupongoka va Karunga. Ame kuna kumukorangeda vaunyande ashi, ¹⁶ kukwata kanenu kumwe navo ntani na kehe uno wakuruwana kumwe nakukwatitako kuviruwana. ¹⁷ Ame kuna hafa unene omu kaya tiki Stefanas, Fortunatus na Akayikus. Weno mpovali papande mulivega lyenu. ¹⁸ Vavo vanayatendeke monyo wande yira momo vatendeka denu. Makura,muna hepa kupakera mbili vantu vakukara weno. ¹⁹ Mbunga Kriste damu Asia vanamukundupo. Aquila na Priscilla kumwe nambunga Kriste oyo ya pongango mumundi wavo, vanamukundupo unene mwa Hompa. ²⁰ Vaunyetu navantje vanamukunditiripo. Kukunda kundenupo nashihoro shakupongoka. ²¹ Ame, Paul, natjango vino naliwoko lyande. ²² Ntjene mpwali owo adiro kuhora Hompa, ogho vamufingilira. ²³ Nkenda ya Hompa Jesus yikare nanwe. ²⁴ Shihoro shande shikare nanwe mwa Jesus Kristus. Amen.