¹ Vaunyande, kuna kumuvhurukita mbudi yaruhafo oyo namuyuvitira mbyo mwayitambura, mbyo nka mwakara mumwayo, ² Mumwayo mo ngamu kaparukira, nkene muvhura kukara mu mbudi yaruhafo oyo namuyuvitira, mposhi lipuro lyenu kapishi ngalikare lya mawoko-woko. ³ Ame kwamuronga vyamulyo ovyo nakuronga name, ashi Kristusi kwafera ndjo detu yira momu aghamba matjangwa, ⁴ Ava muvhumbiki, ntani akavhumbuka muliyuva lya utatu yira momu aghamba matjangwa. ⁵ Kristus pamuhovo kwa monikilire Petrusi, ntani aya monekere kwavo murongo nava vili; ⁶ ntani ana kuya monekera pashiruwo shimwe tupu kwavo vakupitakana mafere matano. Shingi shavo shimpe mpovali vana kuparuko, ngoli vamwe va fa. ⁷ Mpo aya monekelire James, ntani na kuva Apostoli navantje. ⁸ Opo amonekilire kuna vantje ntani ngoli ana kuya monekera name, ogho amonikiro yira ndjeghu vashampuruka ghawo mayuva shimpe kapi atikamo. ⁹ Morwa ame walikuto lyalididi unene muva Apostoli navantje. Ame kapi nawapera nikare mu Apostoli mukondashi ame kani hepekanga mbunga kriste ya Karunga. ¹⁰ Ngoli mukonda ya ufe nkenda waKarunga ame ghuno momunakara, ntani nkenda yendi kapishi yamawoko-woko. Ame kwa ruwana unene kupita kana va Apostoli navantje. Ano ngoli kapishi me, nani nkenda ya Karunga oyo nakara nayo. ¹¹ Mpo shi vikareshi ame ndi vavo, mo ngoli twayuvita mbudi ya Karunga mbyo mwayipura. ¹² Ano Kristus nkene shi kumuyuvita ashi gha vhumbuka ku ufe, weni omo vaghamba ashi livhumbuko lyavafe kwato. ¹³ Nkeneshi livhumbuko lyavafe kwato, nkwa ndi na Jesusi naye kapi avhumbuka ku ufe, ¹⁴ ano nkene Kristus kapi vamuvhumbura ku ufe, nkwandi nkango odo twayuvitanga da mawoko-woko nalipuro lyenu lya mawoko-woko. ¹⁵ Nkeneshi vyaushili vafe kapi ngava vhumbuka ku ufe, makura atwe vambangi vavimpempa vaKarunga, mukondashi atwe kughamba ashi Karunga avhumbura Jesus kuufe. Mukondashi atwe kwangambipara ashi Karunga kwavhumburu Jesus kuufe, ghuye ahana kumuvhumbura kuufe. ¹⁶ Nkene vafe kapi ngava kava vhumbura, Kristus naye kapi vamuvhumbura ku ufe. ¹⁷ Ano ngoli nkene Kristusi kapi avhumbuka ku ufe, lipuro lyenu lya mawoko-woko nani shimpe nda mwakarera mundjo denu. ¹⁸ Navo vafo mukonda ya kupura mwa Kristus, nkwandi navo vayenda mulindjonauko lyanaruntje. ¹⁹ Atwe nkene tupu kuhuguvarera Kristus ngo uno monyo wapantunda yalivhu tupu, atwe vana lihudi unene twa pitakana navantje. ²⁰ Ano ngoli ushili ngo uno ashi Kristus ndje vahova kuvhumbura ku ufe, kwa navantje ovo vafo. ²¹ Momu dakarapo mfa muudjuni morwa muntu umwe, nalivhumbuko lyavafe nalyo kwakarapo morwa muntu umwe. ²² Momu vyakara shi muruvavharo rwa Adam navantje kufa, monka tupu ngava kavatura navantje vakakare namonyo mwa Kristus. ²³ Morwa vavo kwaku kwatakana na Kristus: Ano ngoli kehe uno narufo rwendi: wakuhova varambwita ku ufe, Kristus, ntani mbovo vahamo kwa Kristus opo ngakaya. ²⁴ Ntani ngauya uhura, opo ngamana kuhanaurapo lipangero, unankondo nauntje, makura ngayatape untungi wa Karunga kwa Vashe. ²⁵ Jesusi Kristusi ndje ngapangero tupu dogoro nkoko ngakatulira vana nkore vendi kuntji ya mpadi dendi. ²⁶ Munankore ogho ngayadjonaura muruhulilira mfa. ²⁷ Matjangwa kwatanta ashi, '' Ghuye kwatura navintje kuntji yampadi dendi,'' Nkango dino, '' Vininke navintje,'' dapwa kukenita ashi kapishi naKarunga mwene ashi naye mpwalimo, ogho aturo vininke navintje kuntji ya mpadi dendi da Kristusi. ²⁸ Ntjene shi vininke vana vitapa mulipangero lya mona, makura mona naye kutapa kwagho amupo navintje. Karunga makura akare ngoli mupangeli wavininke navintje. ²⁹ Nkene ashi livhumbuko lyavafe kwato, ovo vakushira mulivango lyavafe, vinke vyakwafanga? Vafe nkene kapi ngava kavhumbuka, vinke ovyo vakarera naliyoyero lyavafe? ³⁰ Atwe ne vinke ovyo twa kareranga mumaudito kehe pano? ³¹ Vaunyande, ame kehe liyuva kwa kara mushiponga sha mfa. Ovino ushili yira momu mwaviyiva shi ame kukupandayika mumwenu, kovyo nawana kwa Jesus kristus Hompa wetu. ³² Nkeneshi ame kwarwana navikashama vya mo Efesus nahana lihuguvaro lyamonyo wa naruntje, vinke ngavi vhura ku kwafa kwande? Ano vafe nkene kapi ngava vavumbura, vishewe kuna kutanta ashi, '' tudjombwanenu na kunwa, mbyovyoshi yona ngatufa,'' ³³ Vashamupukita: Ndjoyera yayidona kuvipita nkedi dadiwa.'' ³⁴ Kororokenu! karenu mughuhungami! Kapishi muture nka waro ndjo. Mbyovyoshi vamwe mo kapi vakara naukonentu wa Karunga. Ovino kuna kuvighamba nimufite ntjoni. ³⁵ Umwe kuvhura aghambe ashi,'' Weni omo ngava kavhumbuka vafe , ntani marutu ghakufana weni ngava kara nagho.'' ³⁶ Ove ligova! mbuto oyo wakuna nkene kapi yinafu mulivhu nakumenashi. ³⁷ Opo wakunanga kapi wakunanga vimeno ovyo ngavikakaroko, ngoli mbuto vakunanga. kuvhura yikare ya Mahangu ndi yapeke. ³⁸ Ngoli Karunga ndje wakuyipa shimeno yira momu anayishanene, kwa kehe mbuto nashimeno shayo. ³⁹ Marutu naghantje kapi ghakufana. ghavantu ghapeke, ghavikorama nagho ghapeke, ghavidira nagho ghapeke nagho gha ntjwi ghapeke. ⁴⁰ Pakara nka marutu gha muliwiru na marutu ghapantunda yalivhu. Pakara maurenga gha muliwiru ntani namaurenga ghapa ntunda yalivhu. ⁴¹ Kutwedera kwaliyuva peke, kutwedera kwa kakwedi peke, ntani kutwedera kwa mbungururu peke. Ntani shite sha mbungururu nadintje dakukushuva-shuva. ⁴² Napa livhumbuko lyavafe ngoli ngapakakara. Ovyo twakunanga vya kudjonaukapo ntani vya kuvhumbuka mbyo vyakukarererapo. ⁴³ Kuvhumbika rutu rwa kupira likuto; ngarukavhumbuka rwa likuto. Kuvhumbika rutu rwakupira nkondo; ngarukavhumbuka rutu rwa nkondo.. ⁴⁴ Ntjene shi mporuli po rutu rwapa nyama, pakara nka waro rutu rwapampepo. ⁴⁵ Matjangwa kwatanta waro ashi, '' Muntu wa kuhova ndje Adam, kwa muhungire akare namonyo.'' Ngoli Adam wakuhulilira ghuye ndje Mpepo yakutapa monyo. ⁴⁶ Mpepo kapishi ndjo vashitire pakuhova nani ngoli rutu, ntani yina kuyakwama ko ngoli Mpepo. ⁴⁷ Muntu wa kuhova kwa muhungire kulivhu, lya mbundu. Ngoli muntu wauviri, Hompa ogho atundo muliwiru. ⁴⁸ Momu afanine Adam wapalivhu, vapalivhu navo monka waro vafana, Adam wa muliwiru kwa kufana nava vamuliwiru. ⁴⁹ Momu twakufana nogho atundo vahunga kulivhu monka waro ngatu kakufana nogho atundo muliwiru. ⁵⁰ Vaunyande, ovyo nakumutantera mbyovino ashi rutu rwapalivhu nakuvhurashi kupinga Untungi wa Karunga. Ntani nkwa waro vyakudjonauka naku vhurashi kupinga vya kukarererapo. ⁵¹ monenu! Ame kuna kumutanterako vihoramo ashi: Kapishi natuvantje ngatufa, ngoli natuvantje ngavatushintununa tukutjindje. ⁵² Mushirugho shashifupi tupu, yira mukukapwida kwalintjo, opo ngaru shaghara rumbendo rwa kuhulilira. Rumbendo ngarushaghara, makura ngava vhumbuka namarutu ghavo gha kukarererapo, makura ngava tushitunune ngatukutjindje. ⁵³ Mbyovyo shi rutu rwa kudjonauka vana hepa kurutjindja ngarukare rwa kupira kudjonauka, rwa kupira kukarererapo rukare rwa kukarererapo. ⁵⁴ Ano ngoli nkene rutu rwa kupira kukarererapo runa kutjindji rukare rwa kukarererapo ntani rutu rwapanyama runa kara rwapa mpepo, navintje vina shoroka kutanta ashi nkango dinatikimo odi vatjanga ashi, '' Mfa vana dimini, vana difundu,'' ⁵⁵ '' Mfa, nkondo doye kuni dinakara? mfa virwita vyoye kuni vinakatra?'' ⁵⁶ Mfa virwita vyado ndjo, ntani una nkondo wa ndjo kwa kara muveta. ⁵⁷ Kupandura kwa Karunga ogho atupo lifundo mwa Hompa wetu Jesus Kristus! ⁵⁸ Vaunyande vakuhora, karenu munakoro kapishi mukunyungaure. Karenu naupampi kehe pano naviruwana vya Hompa, mukondashi mwayiva ashi viruwana ovi mwaruwanenanga Hompa kapishi vya mawoko-woko.