¹ Kondjerenu shihoro na kutura dimutjima denu mu maushwi ghapa mpepo, unenepo ghakuyuvita nkango da Karunga. ² Owo wakughamba maraka peke kapi aghambanga navantu nani ngoli na Karunga. Mpo ashi naumweshi wakuyuva ovyo anakughamba, mukonda shi Mpepo yakupongoka ndjo yakumughambita vya mukahore-hore. ³ Ngoli wakuyuvita nkango da Karunga, kuyuvitira vantu nkango dendi da kukwafa, kukorangeda, nakushengawida. ⁴ Owo wakughamba maraka peke kukukwafa mwene, ngoli wakuyuvita nkango da Karunga kukwafa mbunga Kriste. ⁵ Ame kunamushanene mughambe maraka ghapeke-peke. Unenepo ame kuna mushanene kuyuvite nkango da Karunga. Mukondashi wakuyuvita nkango da Karunga apitakana wakughamba maraka ghapeke-peke ( Nkwandi pakare umwe afwaturure maraka mposhi atunge mbunga Kriste ntani ) ⁶ Vakwetu, ntjeneshi nganiye kukwenu nganiyaghambe maraka ghakupira kuyuvika, vinke ngavivhura kumukwafa? Kwato ovyo nganikwafa kwenu, nkwandi nighambe mamoneko, ndi na ukonentu, kuyuvita nkango da Karunga ndi kutapa marongo. ⁷ Momu mundjira yimwe tupu, monka waro nangoma dakuveta ntjumo, dahana monyo dakutapa maywi-yira ntjivo ndi shighumba-ntjene kapi vanakuyimba ashaghare maywi ghakukushuva-shuva, weni omo vayiva ashi liywi munke linakuyimbo? ⁸ Ndi ntjene rumbendo kapi runakushaghara nawa, weni omo ayiva kehe uno ashi shirugho shakukuwapayikira vita? ⁹ Nanwe nka waro ntjene amughamba maraka ghapeke ghakupira kuyuvika. Ntjene amughamba maraka ghakupira kuyuvika weni omo vayuva ovyo munaghamba? Anwe ngamughamba, ngoli kundereko wakuvikwata lighano ovyo munaghamba. ¹⁰ Mu udjuni kwakaramo maraka ghamangi, ngoli nalimwe shi lyakaro ashi kwato ovyo linakutanta. ¹¹ Ntjene kapi nakuyuva ovyo linakutanta liraka, ame kukara ntunda virongo kogho anakughambo, nogho anakughambo kukara muna virongo ku kwande. ¹² Nanwe nkashi mushikwavo. Anwe ovo munakushano ashi vamupe maushwi ghapa Mpepo, kondjenu ngavaghamupe ghamangi unene po ngogho ghakukwafa mbunga Kriste. ¹³ Ngoli wakughamba maraka ghakutumuka, ghanakona kuraperera ushwi wakufwaturura. ¹⁴ Ntjene aniraperere mumaraka ghapeke, mpepo yande ndjo yakuraperera, ngoli ndunge dande kundereko vyado. ¹⁵ Nani weni omo nivhura kuruwana? Ame nahepa kuraperera na mpepo yande, nahepa nka waro kuraperera na ndunge dande. Ame nahepa kuyimba na mpepo yande ntani nahepa kuyimba waro na ndunge dande. ¹⁶ Ano,ntjene shi aupandura Karunga mumaraka peke, weni omo aghamba owo anakudiro kukuyuvha shi "Amen" ntjene shi ghuye kapi anakuyuvha ovyo unakughamba? ¹⁷ Kuvhura utape mpandu kwa Karunga murupe rwauhunga, ngoli kapi uvhura kukwafa kehe vantu. ¹⁸ Ame kupandura Karunga wande omo naghambanga maraka peke kupitakana namuvantje. ¹⁹ Ngoli mumbunga Kriste ame kwahora kughamba nkango ntano tupu dakuyuvika mpo ashi vakurongereko vamwe, kupitakana omo nighamba nkango mayovi murongo damumaraka peke dakupira kuyuvika. ²⁰ Vaunyande, mwasha kara yira muvanuke mumaghano. Ngoli karenu yira vanuke kwavyo vyavidona. Mpo ngoli shi mu ukonentu karenu muvakurona. ²¹ Muveta kwatjangamo ashi, '' Mbunga yino ame nganiyighambita kumaraka peke, nakutunwa twa vantunda virongo. Nampili ndi ngoli shimpe kapi ngava ndjuvha''. Mo anakughamba Hompa. ²² Mpo ngoli shi, maraka peke kapishi viyivito kwavapuli, nani ngoli kwavo vapoiro kupura. Kuyuvita nkango da Karunga kapishi viyivito kwavo vadiro kupura, nani ngoli kwava puli. ²³ Ntjene shi mbunga Kriste yina pongo kumwe,vaghambe navantje maraka peke, makura paye vantu vapandje vakupira kupura, kapi ngava murenka ashi mwapurumuka ndi? ²⁴ Ngoli ntjene shi namuvantje amuyuvita nkango da Karunga makura ngayepo wakudira kupura ndi muntu wapandje owo apiro kuyiva vininke, ngavitetura navintje ovyo ngayuvha, ngakumone ashi uye munandjo. Ghuye ngavi mukora unene kumutjima kwanavintje ovyo vana ghamba. ²⁵ Makura viruwana vyendi ovyo vya horamo munmutjima wendi ngavi shoroka pa ukenu. Nganyongama atongamene Karunga. Ghuye ngaghamba ashi vya ushili Karunga mpwali mukatji kenu. ²⁶ Vaunyande, weni omo muvhura kukara? Nkene munapongo kumwe, kehe uno anahepa kukara navininke, umwe rushumo, umwe marongo, umwe maraka peke, umwe wa kufaturura maraka, umwe wakumona mamoneko. Ngoli navintje vino vina hepa vikwafe mbunga Kriste. ²⁷ Nkene ashi umwe kuna kughamba maraka peke, pakare vaviri ndi vatatu vakupe marufo gha kughamba ntani pakare umwe wakufwaturura ovyo vanaghamba. ²⁸ Ano nkene shi kwato wakufwaturura maraka, kehe uno mukatji kambongarero yambunga Kriste anahepa kumwena. Kehe umwe aghambe pentjendi kumwe na Karunga. ²⁹ Vayuviti nkango dakutunda kwa Karunga vakare vaviri ndi vatatu vakwate lighano kwavyo vanaghamba. ³⁰ Ano ngoli nkene mpwali ogho ana shungiro mbunga amone limoneko, ogho ana kughambo ghamweneko. ³¹ Kupenu maruvede namuvantje na marufo ghaku yuvita nkango da Karunga mposhi navantje vakurongerepo vawane makorangedo. ³² Mpepo ya muporofete muporofete mwene ndje wa kuyipangera. ³³ Mbyovyo shi mwa Karunga kapi mwahepa mapiyagano, ngoli kwahepa mpora.Yira momu mwakara mumbunga Kriste yavantu vakupongoka vaKarunga. ³⁴ Vakamali vana hepa kumwena mumbunga Kriste denu. Mukondashi kapi vavapulitira shi vaghambe. Nani ngoli,vavo valimburuke,yira momo yatanta veta. ³⁵ Ntjeneshi mpovili vyo vanahoro kukuronga,vapure vakafumu vavo mumandi. Mukonda shi lishwaghu lyalinene ntjeneshi mukamali aghamba mumbunga Kriste. ³⁶ Nkango daKarunga penu davarekera ndi? Ndi kukwenu mpentjako tupu daya? ³⁷ Kehe uno anakukumono ashi uye muporofete ndi akara na maushwi ghapa mpepo, ayive ashi ovino nakumutjangera marawiro gha Karunga. ³⁸ Ntjene shi mpwali ogho ana kupiro kuvidimburura vino, naye nakumu dimburura shi. ³⁹ Vaunyande, mpo ngoli shi kondjenupo unene mukuyuvita nkango da Karunga, ntani nakushweneka shi kehe uno wa kughamba maraka peke. ⁴⁰ Ngoli navintje muna hepa kuviruwana pa nkedi yayiwa nka vikare mulikukwamo.