¹ Munahepa kumonena kukwande, Ame kuhonena kwa Kristusi. ² Ame kumufumadeka unene mukondashi anwe kumvhuruka muvininke navintje. Ame kumufumadeka mukondashi mwakwaterera marongo yira momunagha muronga. ³ Ngoli ame kuna mushanene mukwate lighano ashi Kristus ndje mutwe wakehe uno mukafumu, ntani mukafumu ndje mutwe wa kehe uno mugholikadi ntani Karunga ndje mutwe wa Kristus. ⁴ Kehe uno mukafumu ana kukanderero ndi ayuvhite nkango da Karunga uye kuna dwata likoli kumutwe wendi kushwaukita mutwe wendi, mutwe wendi Kristusi. ⁵ Kehe uno mukamali wa Kukanderera ndi wa kuyuvita nkango da Karunga ahana kudwata shituku kumutwe wendi, kushwaukita mutwe wendi, mukafumu. Vya ngoli kukufana tupu namukamali ogho vana kurura huki mumutwe. ⁶ Nkeneshi mukamuli kapi ana dwata shituku ku mutwe, ana hepa kuteta huki dendi difupipe. Ano ngoli nkeneshi kuyitira lishwaghu mukamali mukuteta huki dendi mukukurura mutwe, hasha adwate shituku kumutwe wendi. ⁷ Mukafumu nakudwatashi likoli kumutwe wendi, mukondashi uye ndje shishwi na uyerere wa Karunga. Ngoli mukamali kuneyeda lifumano lya mukafumu. ⁸ Mbyo ngoli shi mukafumu kapi atunda kurutu rwa mukamali. Nane ngoli mukamali kwa tunda kurutu rwa mukafumu. ⁹ Ntani mukafumu kapi vamushitilire mukonda ya mukamali. Ano ngoli mukamali ndje vashitire morwa mukafumu. ¹⁰ Mpo ngoli ashi mukamali ana hepa kukara nashiyivito sha unankondo kumutwe wendi, mukonda yava Engeli. ¹¹ Nampiri ngoli, mwa Hompa, Kapi mwakara likugaunuko lya mukamali na mukafumu ndi mukafumu namukamali. ¹² Momu tupu vyakara ashi mukamali kwatunda mwa mukafumu, mukafumu naye kwatundanga mwamukamali. Ene ngoli vininke navintje kutunda kwa Karunga. ¹³ Tokerenu naumwenu: Vyahungama kwamukamali mukuraperera kwaKarunga ahana shituku kumutwe wendi ndi? ¹⁴ Nampili kuvishitwa kapi mwakurongerangako ashi mukafumu nkene akara nahuki dadire, kumuyitira lishwaghu ndi? ¹⁵ Ngoli vishitwa kumuronga ashi mukamali nkene akara nahuki dadire, kuyita lifumano kukwendi? Mpo ngoli ashi huki dadire kwadimupa ashi difike mutwe wendi. ¹⁶ Ano ngoli nkeneshi mpovali vanakukanano vino, atwe kapi twa karanka waro nankedi dapeke, ndi nampili mumbunga Kriste da Karunga momu. ¹⁷ Kuhamena kumapukururo ghano ghana kukwamoko, kapi nivhura kumupandayika. Opo mwayanga muponge kumwe, kapi mwaponganga mukare mu ukaro wauwa, ngoli mu ukaro wa udona. ¹⁸ Pamuhovo, nayuvha ashi opo mwayanga muponge kumwe mumbunga kriste mungereka, kwakaranga nadimutangu mukatji kenu, kuruha rumwe name navipura. ¹⁹ Mbyovyo shi ushili mwapera kukara makutavaghano, mposhi valimburuki mukatji kenu vashoroke. ²⁰ Ano kapishi nkene munapongo kumwe, makura ashi murarero wa Hompa muna kulya. ²¹ Mbyovoshi opo mwalyanga, kehe uno kulya ndya damwene kumeho va unyendi valye ndya davo. Umwe po ndjara ano umwe po anakorwa. ²² Nani kapi mwakara namandi ghakulyera kumwe nakunwena mo ndi? Ndi anwe kushwaura mbunga Kriste ya Karunga na kufita ntjoni ovo vapiro ndya ndi? Vinke nivhura kughamba kukwenu? kunahoro ashi nimupandayike ndi? Kapi nivhura kumupandayikira kwa vino! ²³ Mbyovyo shi ovyo nawana kwa Hompa mbyo nka name namuyuvita ashi, Hompa Jesus, matiku ogho vamurapotire, kwaghupire mboroto. ²⁴ Atapa mpandu kwa vashe, ayibamaura aghamba ashi,'' Ghupenu mulye oru ndo rutu rwande vana kumutapera. Munahepa kuruwana vino mumvhuru kirangepo.'' ²⁵ Mushi kwavo aghupu nkinda opo vamanine kulya, ayidamuna atapa mpandu kuvashe aghamba ashi, '' Nkinda yino ligwanekero lyalipe lya muhonde yande. Ruwanenu vino kehe pano opo muna kuyinwa, mumvhuru kirangepo ame.'' ²⁶ Mpo ngoli shi kehe pano muna kulya mboroto yino nakunwa ku nkinda yino, muna hepa kuyuvita mfa da Hompa dogoro nkoko ngakayera. ²⁷ Mpo ngoli shi, kehe uno ana kulyo kumboroto ndi anwe munkinda ya Hompa pa nkedi yayidona uye kutura ndjo ya rutu na honde yaHompa. ²⁸ Muntu ahove kukukonakona mwene pamuhovo, ntani ana kulya kumboroto na kunwa nkinda yino. ²⁹ Mbyo vyo shi, kehe uno ana kulyo nakunwa pankedi yayidona uye ahana kuhangura rutu rwa Hompa na ndya dakukukarera ogho kukulyera na kukunwena lipanguro lya mwene. ³⁰ Mbyo muna kara shingi shenu kwato nkondo ntani kuka kuvera-vera ntani vamwe vanawere muturo. ³¹ Ano nkene tukukona-kona naumwetu nawa-nawa ndi kapi ngavatupangura nka waro. ³² Ano ngoli nkene tupu atupangura Hompa, atwe kukara naukaro wauwa, mposhi kapishi ngava katupangure kumwe na udjuni. ³³ Mpo ngoli shi vaunyande, nkene kuna kuponga kumwe muya lye, muna hepa kukutaterera-taterera. ³⁴ Ogho anakuyuvho ndjara alye kumundi, mposhi opo muyaponga kapishi muya kare mumpanguro. Ano vyakuhamena kuvininke ovyo mwatjanga, nganiya mupa ndjenditito davyo opo nganiya.