¹ Munsita yilya kwene ayalondezi yizile kuli Yesu nga yatile ,'' Aweni wuno umukalamba muwumwene wakupela ?'' ² Yesu wamile umwana umunono, ngawawalanjizge, ³ nukuvwanga ukuti, '' Umolimo nkhutikuli mwemwe , nanthi mutakusenuka ukuti muye ngati utwana utunono, mutalitela mwinjile umwene wakupela munzila yiliyonsi. ⁴ Apano, wensi wino akwiyisya ngati umwana wino umunono umukalamba sana muwumwene wakupela . ⁵ Wensi wino akupochelela umwana umunono ngati wino umwizina lyane akumphochelela nene. ⁶ Kweni nanthi wumwi akulenjesya wumwi uwayana yano ayanono yano yasuwila muli nene ukutala imilandu, chingaya ningo kuli weliwe ukuti ichiliwe ichikalamba chinyepwe umusingo yakwe , nga nukuti akasumbilwe pansi pali yemba . ⁷ '' Umukosi kunsi umulandu wavyakutamya ivivule! Muno ichakulondwa sana ukuti ivyakutamya vivyo vize, kweni umukosi kuli wino ivyakutamya vikwizila mwenemo! ⁸ Nanthi ikasa lyako nanthi itamba lyako likukupanjisya ukuti uwonone , liputule nukulisumba . Amuno chiliningo ukuti winjile muwumi wemulemale ukusya ukuti usumbilwe mumoto uli namakasa yayili nanthi amakulu yayili. ⁹ Nanthi ilinso lyako likupanjisya ukuti wonone , lifwamphule nukulisumba . Muno chiliningo ukuti muwumi nilinso lyonga kulusya ukuti usumbilwe mumoto uli naminso wonsi. ¹⁰ Mulolechesye ukuti mutakusula wensi umunono. Muno nkhuti kuli mwemwe ukuti kupela kuli angelo yano insita yonsi yakulolechesya kuminso kuli Tata wino ali kupela .'' ¹¹ Muno umwana wa munthu wizile ukuzapususya wilya wino waponzile . ¹² Mukwelenganya chani ? Nanhi wumwi ali ning'onzi umwanda wonga nga apano yonga yiponge , wuzge asizisya amakumi yasano nayanayi nazisano nazinayi (99) pamwamba nukuyalonda yonga yino yiponzile? ¹³ Nanthi wayizana , umolimo nkhui kuli mwemwe , akasechela sana pali yoliyo ukusya zilya zino zisyazile kumwamba . ¹⁴ Mumukwene , sukulonda kwekwe Tata wino ali kupela ukuti wenga uwa yanono yano achule . ¹⁵ ''Nanthi umuzo wakononela , yanga ukamuwuzge chino wakononela , pano muli mwenga . Nanthi wakuvwichisya , muliya ponga numuzo wiyo . ¹⁶ Kweni nanthi atakuvwichisya , senda wenga nanthi yayili mupite nawo ukuti pamulomo wakwe yakamboni yayili nanthi yatatu izwi lyonsi yingamanyikwa . ¹⁷ Nga nanthi wakana ukuti awuvwichisye, lwalya chino chilipo kung'anda yamapepo . Nanthi wakana nupya ukuvwichisya ukung'anda yamapepo , musye aye kuli wewe ngati uwakunzi nanthi ngati akasonchesya wamisonkho . ¹⁸ Ichendi nkhuti kuli mwemwe, chilichonsi chino mwachinyepa pansi pansi yino chilinyepwa nupya ukupela , nachino mwachisapula pansi yapansi yino chilisapulwa nupya ukupela . ¹⁹ Nupya nkhuti kuli mwemwe , nanthi yayili yakwe mwemwe yuvwana pali chilichonsi chino yawuzichisya , chilichitwz kuli woliwo umwizina lyakwe tata wino ali kupela . ²⁰ Muno pano yayili nathi yatatu yakongine umwizina lyane, papa kwekwe apano indi pakasi pawo .'' ²¹ Apano Peteli wizile nukuti kuli Yesu,'' Mwene , kanga kano umuto wane anganononela nukuti ningamutetela? Mphaka kasano nakayili ?'' ²² Yesu watili kuli weliwe , '' Nthakunena kasano nakayili, kweni mphaka amakumi yasano nayayili yayepo yasano nayayili. ²³ Alino umwene wakupela wulingine sile namwene wumwi wuno walondanga asengule ichuma chakwe nuwanchito wakwe. ²⁴ Lino watalika ukusengula , uwanchito wumwi yamulesile kuli weliwe wuno wali nimphiya zgakwe umwanda (10000). ²⁵ Kweni umulandu atali ninzila yiliyonsi iyakuti angawezezga , bwanawakwe walamwile ukuti akazwe , ponga numuchi wakwe nayana akwe nachonsi chino walinji nacho , nganukuti yalipile . ²⁶ Ngalino uwanchito waponyile pansi , nukumufukamila , nukuti, 'Bwana , fwila uluse , nga nimayika vwonsi .' ²⁷ Ngalino bwana wakwe lino walemwa nichitima, wamulechizge nukimutetela inkhongole yakwe. ²⁸ Kweni uwanchito wilya wafumile panzi nukuzana umuze uwanchito, wino nawe wali ninkhongole yakwe izimbi lyonga(100) denarii. Wamulenile, nukumulema kuchigolomilo, nukuti, ' Lipa vino ulunavyo vyakwe nene.' ²⁹ ''Kweni umuze wilya waponyile pansi nukulambilizga , ukuti,' Fwila uluse , nimalipa.' ³⁰ Kweni uwanchito wakutalika wakanyile . Alino , wayile nukuyamusumbila mung'anda yaminyololo mphaka pano wiza wayika vino ali navyo vyakwe weliwe . ³¹ Kweni lino umuze uwanchito walola chino chachitikwe , yazungwike sana . Yizile nukuzamuwuzga bwana wawo pali chonsi chino chachitikwe . ³² ''Apano bwana wakwe uwawanchito wilya wamwamile nukuti kuli weliwe , ' we wewanchito umuyipe , nakutetile inkhongole zgane zgonsi umulandu wandambilizizge. ³³ Nge utayanga nuluse nuwanchito umuzo, ngati vino nali nuluse nawewe ?' ³⁴ Bwana wakwe wasosile sana nukumutwala kuyayinvi mphaka pano wiza walipa vino wali navyo. ³⁵ Avino Tata wane alichita kuli mwemwe nanthi mutakutetela awuzo ukufuma mumwenzo winu.''