¹ Makura ngurangura zonene vapristeli wovanene kumwe nomasimbi novalirongi womatjangwa nosigongi mudima somasimbi tavatura po etokoro. Eyi vana mana kupandeka Yesusi, tava mu twara, va ka mu tambeka Piratusa. ² Makura Piratusa ta mu pura asi,'' nani yove o Hompa go vaJuda? makura gwina ta limburura asi,''nyove ono kuyitanta.'' ³ Vapristeli wovanene tava mu retere po mausima gokumuhamena gomanzi. ⁴ Kutunda opo Piratusa ta mu pura hena asi, ''ove nokulimburura si yuma? ko tara si maumbangi ngesi gokukuhamena agavana kureta po.'' ⁵ Nye kutunda opo Yesusi neisi hena ga limbwilire, dogoro Piratusa ta tetukire mo. ⁶ Piratusa nkenye apa mosipito sopaska kwa yikire kumangurura nkwate zimwe, zeezi vana mu hundire. ⁷ Pwa kere gumwe edina lyendi Barabasa, ogu ga kere modorongo novaruretesandjorongani vakwawo, ogu ga dipagere muntu mondjorongani zawo. ⁸ Makura mbunga tazi zogomoka, va mu hundire, a va ninkire moomu mwanare. ⁹ Kutunda opo Piratusa ta va pura asi, ''Muna hana asi ni mu mangwilire ogu Hompa go vaJuda ndi?'' ¹⁰ Morwa ga divire asi vapristeli wovanene kwa mu mu reterere morwamfuda. ¹¹ Nye kutunda opu vapristeli wovanene tava zeda mbunga zi hundire asi a va mangwilire Barabasa. ¹² Piratusa ta va limburura hena asi, ''yisinke eyi muna hara ni mu ruganene ogu omutumbura asi Hompa go vaJuda?'' ¹³ Vena tava zogomoka hena asi, ''Mu pampara kosilivindakano!'' ¹⁴ Piratusa ta va pura asi, ''Udona musinke ga rugana?'' Nye tava zogomoka unene asi, '' Mu pampara kosilivindakana.'' ¹⁵ Ano morwakuhara Piratusa kufa mbunga nonkenga, yiyo nye ga va mangwilire Barabasa. Eyi ga mene kutoonesa Yesusi nonongora, ta mu gava va ka mu pampare kosilivindakano. ¹⁶ Kutunda opo vakwayita tava twara Yesusi keharango lyomonda, eli lya kere erombe lyomupangeli Pitatusa. ¹⁷ Makura tava zigida vakwayita navanye va ponge kumwe. Makura tava mu dwareke erwakani lyegeha ntani vana ganga nkata zowega va zi mu ture komutwe. ¹⁸ Makura tava tameke kumumorora asi, '' Moro, Hompa go vaJuda!'' ¹⁹ Ntani vana mu toona noruu komutwe oku tava mu fizire oku tava tunongora, va mu fumadeke. ²⁰ Eyi va mana kumuzora ngoso, tava mu hutura ngoso, tava mu hutura olyo erwakani lyegeha, va mu dwareke yikoverero yamwene, makura tava mu gusa po va mu tware va ka mu pampare kosilivindakano. ²¹ Vakwayita hena kwa sininikire Simoni gomo Kirene, ogu va gwanekerere nendi, age ta tundu komapye, (giha Arekisandeli naRufusi), a simbire Yesusi silivindakano sendi. ²² Kutunda opo tava mu twara kevango lya Gorogata ( kuninka asi ''Evege lyoyikora''). ²³ Makura tava mu pe vhinyu zokuvhonga nomira asi a mwe, nye age kapi ga zi tambwire. ²⁴ Eyi va mana ngoso kumupampara kosilivindakano, tava ligavere nye yikoverero yendi ponkedi zafungu-fungu. ²⁵ Vili kwa kere zautatu, apa va mu pamparere kosilivindakano. ²⁶ Sitjangwa sousima wena sa mu kere keguru lyendi, kwa si tjenge asi, '' Hompa go vaJuda''. ²⁷ Awo hena kwa mu pamparere kumwe novamahaka vavali, gumwe korulyo rwendi, ano ogu mukwawo korumoho rwendi. ²⁸ Matjangwa makura taga sikilire mo aga aga tanta asi, Kwa mu varwira kovanausima,' ²⁹ Varupitanzira kwa mu swawire unene, tava puku nomutwe dawo oku tava tanta asi, ''Hee! ove ogu goguzungurura ntembeli o zi tunge momazuva gatatu tupu, ³⁰ Lipopera sa nye nyamoge o ko kosilivindakano, o turuke ko!'' ³¹ Novapristeli wovanene novalirongi womatjangwa nawo ngosikwawo va mu zorere oku tava litantere vene navene asi, '' Ani vakwawo ntani a popera, nye mwene nokuvhura si kulipopera! ³² Kristusa, Hompa gwa Israeli a turuke ko nye no kosilivindakano, tu yi tare, ntani pura.'' Navaava va mu pamparerera nendi, nawo tava mu swaura. ³³ Eyi za sikire vili zomutwekatji, pevhu mudima tapa wiza ekurundema dogoro nokovili zautatu kositenguko. ³⁴ Moyiha yovili zautatu Yesusi makura ta zigire nezwi, Iyenene asi: Eli, Eli lama Sabaktani?'' kuninka asi, '' Karunga gwange, Karunga gwange, Karunga gwange, yisinke yokusigilira nge?'' ³⁵ Ano vamwe avha va sikamene po pokuyizuvha eyi, tava tanta asi, '' Komu tara si, Eliya ana kuzigida.'' ³⁶ Gumwe ta duka a ka zwide sisampo novhinyu zoururu, ta si tura koruu asi mu nwise, ta tanta hena asi, tankotu tare nsene asi Eliya na wiza, a ya mu turure ko.'' ³⁷ Kutunda opo Yesusi ta zigire nezwi lyenene, makura nare gwa tenda. ³⁸ Va tare ko, emukene lyokuteta ntembeli monda lina tauka pavali kutunda kegururu dogoro pevhu. ³⁹ Mupitisili govakwayita efere, ogu ga mu sikamenene komeho, apa ga mu mwene omu guna kupwa mo, ta zigire asi, ''Yosili nani munwa Karunga ga kere.'' ⁴⁰ Pwa kere hena vakadi, avha va yi litarerere ure. Pwava kwa kere po Mariya Mangadarena ( na Mariya zinya Jakopogona naJosesi) , naSarome. ⁴¹ Ava va mu kweme oku tava mu kerere age moGalireya, nosinzi Sovakadi vamwe, ava va zire kumwe nendi ko Jerusarema. ⁴² Apa lya gombokere, tapa wiza munasigongi gumwe gekuto, Josefa gomoAremateya ogu ga ndindilire nage unutngi waKarunga. Kwa kere ezuva lyokuhova kutanta asi ezuva kyokuhova keSabata. ⁴³ Makura tagu mu dama a ze kwa Piratusa a ka hundire simpu sa Yesusi. ⁴⁴ Nye Piratusa kwa tetukire pokuzuvha asi nare ana fu. Makura ta zigida mupitisili govakwayita efere a ya mu pure asi nare ana fu ndi ngapi? ⁴⁵ Piratusa eyi ga zuvha komupitisili govakwayita efere asi Yesusi ana fu; makura ta gava simpu sendi kwa Josefa. ⁴⁶ Josefa makura ta randa ekehe lyezera, ta gusa simpu, ta si dingire mekehe lyezera ta si tura montako ezi va tjokwera memanya. Makura ta sindumwine ko emumanya kevero lyontonko. ⁴⁷ Mariya Mangadarena naMariya, zinya Josesi awo kuna kutara apa vana kumurangeka.