1
Nambano kombunda jovina mbi mba muna ovaengri vane ava kurama kozohuki ine zehi, ava tiza ozombepo ine zehi kutja ombepo aiha singire kombanda jehi, poo kokuvare, poo komuti auhe.
2
Nu ami mba muna omujengeri uarue ama rondo okuza ku kutja ejuva, aena otjihako tja Mukuru omunamuinjo. Nu eje ua ravaera neraka enene kovaengeri vane imba mba perue oku hihamisa ehi, nokuvare, amatja:
3
''Amu ngunda ama mu hihamisa ehi, poo okuvare, poo omiti, nga tji tua tuapo ovihako po vipara vio ovakarere va Mukuru uetu.
4
Nu mba zuvire otjivarero tja imba mba hakerue, omajovi esere nomirongo vine na jane, mba hakerue okuza momihoko avihe vio vazandu va Isiraera:
5
Okuza momuhoko ua Juda mua hakerue omajovi omurongo na jevari. Okuza momuhoko ua Rupena mua hakerue omajovi omurongo na jevari. Okuza momuhoko ua Ngata mua hakerue omajovi omurongo na jevari.
6
Okuza momuhoko ua Ashera mua hakerue omajovi omurongo na jevari. Okuza momuhoko ua Nafutari mua hakerue omajovi omurongo na jevari. Okuza momuhoko ua Manase mua hakerue omajovi omurongo na jevari.
7
Okuza momuhoko ua Simiona mua hakerue omajovi omurongo na jevari, Okuza momuhoko ua Revi mua hakerue omajovi omurongo na jevari, Okuza momuhoko ua Isakera mua hakerue omajovi omurongo na jevari,
8
Okuza momuhoko ua Sepurona mua hakerue omajovi omurongo na jevari, Okuza momuhoko ua Joosefa mua hakerue omajovi omurongo na jevari nu Okuza momuhoko ua Mbendjamina mua hakerue omajovi omurongo na jevari.
9
Kombunda jovina mbi mba tara, nu tara, otjimbumba otjinene tjo tjivarero tji tji hina ku urikua ijomundu, okuza moviuana avihe, nomihoko, novandu, nomaraka, tja kuramene pomurungu uotjihavero tjouhona, na pomurungu uo Ndjona. Nu vazarere ozombanda ozombapa ozonde, novitavi viomavare momake uao.
10
Nu ovo va ravaerere neraka enene amavetja: ''Ondjamo ku Mukuru uetu ngua havera kotjihavero tjouhona na ko Ndjona!''
11
Nu ovaengeri avehe va koverere otjihavero tjouhona, novanene, novinamuinjo mbio vine, nu va uira pehi pomurungu uotjihavero tjouhona, ave rikotamene ku Mukuru,
12
Amavetja, ''Amen! ondangero, Oujere, nounongo, nomajandjero uondangi, nondjozikiro, nomasa, noukukutu ngarire ovia Mukuru uetu, aruhe ngaaruhe. Amen!''
13
Nu umue uovanene uendji purire amatja, Imba oouani, mba huikikua ozombanda ozonde ozombapa, nu ovo va za pi?''
14
Nu ami mbatja nai ku je, ''Mutengua, ove mo tjiua, Nu eje uatja nai ku ami, ''Imba ovo imba mbu mave zu mombamisiro indjonene.Nu ovo va koha ozombanda zao inda ozonde nu ave ze jepaerisa mombindu jo Ndjona.
15
Nambano opu va kuramena pomurungu uotjihavero tjouhona tja Mukuru. notji verikotamena Kuje omutenja noutuku mondemberi Je. Nu ingui ngua havera kotjihavero tjouhona ma kutjire o tenda Je kombanda jao.
16
Ovo kanaa ve uhuara amave tondjara rukuao, poo oku tonjota rukuao.Nu ejuva kari na ku tona kombanda jao, poo oku tomutenja poo epiu kaani.
17
Orondu o Ndjona ndji ri mokati kotjihavero tjouhona mai ve risa, nu Ai ve hongorere kotuharui tuomeja omanamuinjo, nu Mukuru ma piena omahoze ajehe momeho uao.''