Ekondua oritja murongonambari
1
Nu pa munika o tjihimise o tjinene mejuru; o mukaendu ngua zarere ejuva, no mueze auri kehi jo zombaze ze, no tjikrone tjo zonjose o murongo na mbari ko tjiuru tje.
2
Nu eje otja tjari o tjingundi, ija urisiua ijo zongama, no mihihamo vio mbandukiro.
3
Nu o tjihimise o tjikuao tja munika mejuru: Nu tara! o tjitjupamuriro o tjinene o tjiserandu, a tjina o viuru hambombari, no zonja o murongo, no vikrone hambombari ko viuru via tjo.
4
Nu o mutjira ua tjo ua nanena o rupa rumue mu tutatu ruo zonjose mejuru nu aze umbua kombanda jehi.Nu o tjitjupamuriro tja kuramene pomurungu o mukaendu ngua ri popezu noku panduka, kutja eje tja panduka, tji rie o kanatje ke.
5
Nu eje ua pandukire o muna, o muatje o muzandu, ngua sere oku je ku honapara kombanda jo viuana no nguinja jo tjitenda. Nu omuatje ue ua hakanenua kombanda ku Mukuru, ko tjihavero Tje tjo uhona,
6
nu o mukaendu ua taurire mo kuti o ngaango, Mukuru pemu tunina oruveze, kutja a takamisiue ingo o majuva ejovi no masere jevari no mirongo hamboumue.
7
Nambano pa hangere o vita Mejuru; Mikaera no vaengeri ve ama ve ruisa o tjitjupamuriro, nu o tjitjupamuriro no vaengeri vatjo uina ve ve ruisire.
8
Nunguari otjitjupamuriro katjari no masa uoku tona, nu kape uhuarere ama pe kara oruveze rue no ovaengeri ve Mejuru .
9
Nu o tjitjupamuriro itjo tjinene--indji onjoka onguru, ndji isaneua o Mudiaboli, na Saatana, ndji pukisa o uje auhe--ja nakerua pehi kombanda jehi, ojo pueena o vaengeri vajo.
10
Nu ami mba zuvire eraka enene Mejuru: ''Nambano kueja o ndjamo, no masa no uhonapare ua Mukuru uetu, No uvara ua Kriste Ue.
11
Nu ovo ve mu taara no mbindu jo Ndjona nembo ro mahongononeno uao, nu ovo kave suverere o minjo viao nga ko ndiro.
12
Opu mua soku joroka, ene majuru na imba mba tura muuo! Ouee ko vature vo kombanda jehi na mo kuvare, orondu o mudiaboli ueje kuene! No mazenge o manene, tjinga ama tjiua kutja una o karuveze o kasupi.
13
Nu o tjitjupamuriro tji tja muna kutja tja nakerua kombanda jehi, tja ramangere o mukaendu ingui ngua pandukire o muatje o muzandu.
14
Nunguari uaperue o vivava vivari, vio rukoze indui o runene, kutja a tukire ko ruveze ndua tuninua je mokuti o ngaango. Indui jari oruveze ku maka takamisiua, o ruveze, no tuveze no hinga jo ruveze-- kokure no murungu uo njoka.
15
Nu o njoka ja umbire o meja oku za mo tjinjo tjajo tjimuna ondondu kutja I tjite kutja a pupue ijo mupupo.
16
Nu ehi ra vatera o mukaendu.Nu ehi ra paturura o tjinjo tjaro nu ari nina ondondu indji o mudiaboli mbua umba oku za mo tjinjo tje.
17
Nu o tjitjupamuriro tja pindikiririre o mukaendu nu otji tja kumuka oku ka ruisa indji o ndui je ndja seuako, imba mbe takamisa o matuako ua Mukuru nu mbe na o mahongononeno ua Jesu Kristu.
18
Nu otjitjupamuriro tja kuramene po muheke uo kuvare.