Ekondua Oritjamurongonaumue
1
Nu oruu ndua sana kokati okasaneke rua peua ami. Nu eraerua, ''Sekama nu ka varure ondemberi ja Mukuru, nezuko rombunguhiro, na imba mbe rikotamenena mu jo.
2
Nunguari orupanda indui o ruopendje nondemberi orikende na ro, o ru varura, orondu oruo rua jandjua kovoviuana. Nu ovo mave jeku tukutura otjihuro otjijapuke nozombaze omieze omirongo vine na vivari.
3
Nu ami meeku jandja omasa kovahongonone vandje vevari, nu mave profeta omajuva ejovi nomasere jevari nomirongo hamboumue, ava zara ozombanda zomakutu.
4
Imba ovahongonone imba, omberi omiti vivari viomininga, novikurameno vivari viomarambe, mbia kurama pomurungu ua
Mukuru uehi.
5
Tji pena ngu ma vanga oku ve hihamisa, omuriro u pita motjinjo tjao, nu auseseta ovanavita na uo. Nu auhe ngu ma vanga oku ve hihamisa ua soku ta momuano mbui.
6
Imba ovahongonone imba vena ouvara uoku jezera ejuru, kutja ombura aiha jenene oku roka momajuva uomaprofetero uao. Nu vena omasa kombanda jomeja oku je tjitukisa ombindu, noku tona ehi notjiuonga atjihe potuingi, otja pombango ja uo.
7
Nu tji va mana omahongononeno uao, otjipuka tji matji jeku za motjiretoto matji jeku hanga ovita kuena vo. Atji ve taara nu atji ve zepa.
8
Nu otutu tuao matu kara morupanda ruotjihuro ihi otjotjinene, (mombepo tji tji isaneua Sondoma na Engipte), Omuhona uao ka papererua kotjikoroise.
9
Nu omajuva jetatu no hinga ovandu tjiva, nomihoko, nomaraka, noviuana mavi jeku muna otutu tuao. Nu ovo kavena ku jandjera kutja ve tuue momajendo.
10
Nu imba mba tura kombanda jehi mave njandere vo nave joroka tjinene. Nu ave hindirasana ovijandjeua, motjimbe tjokutja ovaprofete imba ovevari mba va hihamisire ovature vokombanda jehi.
11
Nu kombunda uomajuva jetatu nohinga, ombepo jomuinjo oku za ku Mukuru mai hiti mu uo nu ave kurama kozombaze za uo. Nu omburuma onene mai raukiririre kombanda ja imba mbe ve munu.
12
Nu ovo mave zuu eraka enene oku za ke juru ama ri tja nai ku uo, ''Indjeje nguno!'' Nu ovo mave rondo kejuru motjikamba,ngunda ovanavita va uo a mave ve tarere.
13
Nu mo iri ndjo mape kara ko omanjinganjingiro omanene uehi, nu orupa rumue mo murongo ro tjihuro arire tji ruau. Nu uovandu omajovi hambombari maje tu momanjinganjingiro nga, nu imba mba hupu mave uruma nu ave jandja oujere ku Mukuru Ue juru.
14
Otjiuonga otjitjavari tja kapita. Nu tara! otjiuonga otjitjatatu matji ja mohakahana.
15
Nu omuengeri outjahambombari ua tona ohiva je, nu pa kara omaraka omanene mejuru ngu ja etja, Omauhonapare uouje jarire oua Muhona uetu na Kriste Ue, nu Eje ma honopara aruhe nga aruhe.''
16
Nu ovanene imba omirongo vivari na vane mba haamene po vihavero vio vio uvara po uripo ua Mukuru, va ua ondurumika nu ave rikotamene ku Mukuru.
17
Ama ve tja, ''Matu tja okuhepa ku Ove, arikana Muhona Mukuru Omunamasaehe, ngu uri ko, ngu ua ri ko, nu ngu mo ja,*** orondu ove ua toora omasa uoje omanene nu o honopara.
18
Nu oviuana vie urire nomazenge, nu omazenge Uoje je ja. Nu oruveze rueja roku pangura ovati na Ove oku jandja otjisuta kovakarere voje ovaprofete, no vajapuke va Mukuru, na ku imba mbena ondira kena roje, kovatiti na kovanene.Oruveze rueja roku njona imba mbe njona ehi.''
19
Nu ondemberi ja Mukuru me Juru ja jezururua nu otjikesa tjo nduvasaneno Je tjamunika mondemberi Je. Nu pa kara otutjeno, nomaraka, nomitutumo, nomanjinganjingiro uehi, nozombaue ozonene zombura.