¹ Paulus o mupandekua ua Jesu Kriste, na Timoteus, o mukuetu, ku Filemon o musuverua nu o muungure pamue na ete, ² Na ku Apia o musuverua, na ku Arkipus o musorondate pueena ete, na ko kereka ndji rim o ndjiuo joje: ³ O tjari ku ene no hange oku za ku Mukuru Tate uetu, na ku Muhona Jesu Kriste. ⁴ Mbi tja ndangi ku Mukuru uandje aruhe, ame ku zemburuka mo zongumbiro zandje, ⁵ Tjinga mbi kara po ku zuva o hunga no rusuvero ruoje no ngamburiro ndji u najo ku Muhona Jesu na ko vakambure avehe, ⁶ Kutja o ruuano ruoje mo ngamburiro ru ungurire mo meuriro uo ndjiviro jo tjiungura atjihe o tjiua mu ove mu Kriste Jesu. ⁷ Orondu ete tu na o ndjoroka o nene no mazeuparisiro o hunga no rusuvero ruoje, o mitima vio vakambure tjinga a via muna o masuviririro mu ove, mukuetu. ⁸ Okutja nangarire mbi na o uvande mu Kriste oku ku rakiza oku tjita itji tji tja puira oku tjitua, ⁹ Mena ro rusuvero otji me ningire, ngu mbiri tjimuna Paulus, o murumendu uo zombura o zengi nu nambano uina o mupandekua ua Jesu Kriste. ¹⁰ Meku ningire o hunga no muatje uandje Onesimus, ngu mba kuatera mo mapando uandje, ¹¹ Rukuru ngu ha ri o munandengu ku ove, nunguari nambano o munandengu ku oven a ku ami; ¹² Ngu mba hindi ku ove rukuao, o kutja ove opu ua soku mu jakura, okutja, imbui o mutima uandje: ¹³ Ami ngu mba zerire oku mu tizira imba pueena ami, kutja eje e ndji karere po ruveze ruoje mo mapando uo Mbuze o Mbua, ¹⁴ Nunguari hi vangere oku tjita o tjina nokuhina maitaverero uoje, kutja o mbatero joje ai ha rire ojo ninikizire, nunguari i ze mo ndero joje. ¹⁵ Orondu ngahino eje ua hanikire kueena ove o karuveze uriri, kutja u mu jakurire o ngaaruhe. ¹⁶ Nambano ae heri o mukarere, nunguari kombanda jo mukarere, ae ri o mukambure o musuverua, tjinene ku ami, nunguari tjinene oku kapita ku ove, apejevari, mo njama na mu Muhona. ¹⁷ Tji u ndji vara otja o muungure pueena ove, mu jakura tji tjo ndji jakura. ¹⁸ Nu tje ku zundira mu tjimue, poo the na o ndjo joje, i varera ku ami. ¹⁹ Ami, Paulus mab tjanga neke randje, ami me sutu; nangarire hina ku hepa oku zemburukisa kutja ove o muini una o ndjo jandje ja imbui o muinjo uoje o uini. ²⁰ Ii, mukuetu, ndji tjitira o mbatero ndji mu Muhona: eta o masuviririro mo mutima uandje mu Muhona. ²¹ Otja tji mbina o ndjiviro ndja jenena jo nduviro joje, mbe ku tjangera ame tjiua kutja ove mo je ku tjita oku kapita imba pu mba ningira. ²² Nunguari rukuao ndji tunina o mara: tjinga me itavere kutja mena ro zongumbiro zenu me je ku kotorua ku ene. ²³ Epapras, o mukamburua pueena ami mu Kriste Jesu, ue ku minike. ²⁴ Markus, Aristarkus, Demas, Lukas, o vaungure va pueena ami va minike uina. ²⁵ O tjari tjo Muhona uetu Jesu Kriste nga tji kare pueena o mbepo joje. Amen.