Ekondua oritjamurongo na hamboumue
1
Nu e sabata tjira kapita, Maria Magatarene na Maria inaa Jakobasa na Saruma va randere ovinuke oviua kutja ve ka sopore orutu rua Jesu navio.
2
Nu muhuka omunene, me juva inde tenga rotjiveke, veja pejendo ejuva tjija ri piti.
3
Novo va hungirire kumue nu avetja, ''Ouani ngu me ke tukunguzurira eue okuri isapo pomuvero uejendo?''
4
Nu ovo tjiva jera omeho, va muna kutja eue rakunguzurua ra isapeua, orondu oro rari enene tjinene.
5
Nu ovo tjiva hita mejendo, va muna omurumendu omutandona, ngua zarere ombanda ombapa onde, aa haamene kokunene, novo ave uruma.
6
Neje ua tjere kuvo, ''Amu uruma. Ene mamu paha Jesu ua Nasareta, ngua papererue kotjikoroise. Eje ua penduka, kepo imba. Tareje oruveze pu vari a vemu rarisa.
7
Nunguari kaendee, ka raereje ovahongeua Ve na Petrusa, kutja ''Eje ue muhongorere ko Gararea. Nu ingo oku mamu kemu muna otja tje mu raerere.''''
8
Nu ovo va pita mo hakahana nave tupuka okuza pejendo, orondu ovo ija vezezera nu tjandji va temua. Nu kavena tjiva hungira kuena umue nangarire, orondu tjandji va uruma.
9
Rukuru omuhuka omunene metenga rotjiveke, tjaza no kupenduka, ua munika rutenga ku Maria Magaterena ma nakerere pendje ozondemone hambombari.
10
Neje ua kaenda nu aka raera imba mbari puena Je, mbari moruhoze ama ve riri.
11
Nu ovo, tjiva zuva kutja u nomuinjo, nu ua munikua ije, kave kamburire ko.
12
Nu komunda ja nai Eje ua munika mosaneno jarue kuvevari vao, ama ve kaenda amave rianga mokuti.
13
Nu ovo vaja nu ave ka hepura itji kovavakuao, nunguari ovo nakuvo uina kave kamburiro ko.
14
Jesu kombunda ja nai, ua munika ku imba omurongo na umue, ava haama periro, Neje ue ve hungirira okuhina ngamburiro kuao no mitima viao omi kukutu mena rokutja kave itaverere imba mbe Mu muna tjaza noku penduka.
15
Neje uatja kuvo, ''Tuendeje mouje auhe nu zuvariseje ombuze ombua koviutua avihe.
16
Nu ingui ngua itavere nu a papitisiua ma jamua, nu ingui ngu hina ku itavera ma varua omunandjo.
17
Nu ovisanekero imbi mavi kongorere imba mbe kambura: Mena Randje mave nakere ozondemone pendje. Maveje ku hungira mo maraka omape.
18
Maveje ku toora ozonjoka no make uao, nu tjiva nu otjina atjihe otjizepe, kanaa tjive hihamisa ko.Maveje ku jambeka omake kovavere, novo mave veruka.''
19
Nu Muhona'Jesu tjaza noku hungira kuena vo, Eje ua toorerua kombanda Kejuru nu aka haama kokunene kua Mukuru.
20
Nu ovahongeua Ve va kaenda nu ave ka zuvarisa akuhe, nu Muhona Ama ungura puena vo, Ama kongorerisa ovisanekero Kembo, oku zeuparisa ro.***