¹ Takamiseje kutja amuha tjiti ovitjitua vienu vio tjari po murungu uo vandu kutja mu munikue ivo: orondu tji mua tjiti nao kanaa mu munu ondjambi okuza ku Iho nguri mejuru. ² Okutja tji mo tjiti ovitjitua vio tjari o tono ohiva po murungu uoje tjimuna ovanatjavivi tji ve tjita mozo sinagog na mo mivanda, kutja ve tangue ijo vandu. Tjiri, Ami metja nai kuene, ondjambi jao vei muna hapo aihe. ³ Nunguari tjimo tjiti ovitjitua vio tjari, eke roje rokumoho aritjiua kutja indo rokunene mari ungura tjike: ⁴ Kutja ovitjitua vioje vio tjari vikare mohamunika: Nu Iho ngu muna mohamunika Omuini mee ku kupa ondjambi joje porutjandja. ⁵ Tji mamu kumbu amu tjiti otjo vanatjavivi: mokutja ovo va suvera okukumba a vakurama mo zosinagog na mo matanaukiro uo mivanda kutja ovandu ve vemune. Tjiri, Ami metja nai kuene, ondjambi jao veimuna. ⁶ Nunguari ove tji mo kumbu, hita mo katuuo koje, nu tjiuazu no jezera omuvero, kumba ku iho nguri mohamunika; Nu Iho ngu muna mohamunika Omuini mee ku kupa ondjambi joje porutjandja. ⁷ Nunguari tji mo kumbu, o uondjorora tjinene tjimuna ovanavisenginina: orondu ovo ve tjangovasi mave zuvakerua mena ro ku hungira tjinene. ⁸ Nunguari ene amu kara otjao: orondu Iho utjiua ovina avihe mbi mu hepa ngunda a mu hije Mu ningira. ⁹ Nene opumuaso ku kumba mo muano mbui: Tate uetu ngu u ri mejuru, Ena roje ngari japurue. ¹⁰ Ouhona uoje ngau je. Ombango joje ngai tjitue na kombanda jehi otja mejuru. ¹¹ Tupao mejuva indi omboroto jetu jaaruhe. ¹² Nu tu jesira ozondjo zetu, otja ete tjimatu jesire ovanandjo naete ¹³ Nu otu nanene mo marorero, nunguari kutura ete kouvi: Orondu ouhona ouoje, nomasa, noujere aruhe ngaaruhe, Amen. ¹⁴ Orondu tjimamu jesire ovandu ozongatukiro zao: Iho mejuru Eje uina meku jesire. ¹⁵ Nunguari tjiuhina ku jesira ovandu ozongatukiro zao Iho Eje uina kena kuku jesira ozongatukiro zoje. ¹⁶ Nu rukuao tjimue ritjaere ko vikuria a mu njingisisa omirungu vienu kondjenda tjimuna ovanatjavivi tji ve tjita: mokutja ovo ve kuhisa omirungu viao kutja ve munike ko vandu kutja veritjaere kovikuria. Tjiri, Ami metja nai kuene, ondjambi jao veimuna. ¹⁷ Nunguari ene tji mueritjaere ko vikuria, rihuee omaze moviuru mu rikohee momirungu; ¹⁸ Kutja a muha munika ko vandu kutja mue ritjaere ko vikuria, nunguari mu munike kuiho nguri mo hamunika: Nu Iho ngu muna mohamunika Omuini mee ku kupa ondjambi joje porutjandja. ¹⁹ Amuri puikire ovihuze kombanda jehi, ozohua muzeria nomureru a u zunda, no marunga muje teja nae hiti nae vaka: ²⁰ Nunguari ripuikiree ovihuze mejuru, ozohua ku ze hari nomureru ku u ha zunda, nomarunga kuje ha teja a e hiti, kuje ha vaka. ²¹ Orondu ingui ku kuna ovihuze vioje, omutima uoje oku u kara. ²² Ondjerera jo rutu ruoje eho: okutja indie ho roje tjiriri naua, orutu ruoje aruhe maru ura ondjerera. ²³ Nu nguari eho roje tji ri nouvi, orutu ruoje aruhe maru ura ondorera; okutja nu indji ondjerera ndjiri move tjija rire ondorera, ondorera ndjo tjandji itapi! ²⁴ Kapena mundu nguma jenene oku ungurira ovahona vevari: orondu maso ku njengua ingo umue na suvere ingo mukuao; poo a tenge ingo umue na tengurura ingo mukuao. Kanaa mu jenene oku rira ovakarere va Mukuru no vo vimariva. ²⁵ Opu mezu okutja nai kuene, amu rikende no hupo jenu, kutja ma muri tjike poo ma munu tjike; poo no tutu tuenu kutja mamu zara tjike. Tjii o hupo kai na ndengu povikuria, nu orutu karu na ndengu pomuzaro are? ²⁶ Taree ko zondera mo mbepo: ozo kaze kunu nu kaze teja, nu kaze uongere mo zondjiuo zo mbuiko: nunguari Iho nguri mejuru u zekora. Nu ene kamuna ndengu okuze kapita are? ²⁷ Nouani mokati kenu mokurikenda kue ngu ma jenene okuueza oure ue nangarire katiti? ²⁸ Onguae tji mu rikenda no mituaro? Kaitji mu tara ozongara zozonjanga mokuti, kutja ze hapa vi. Ozo kaze ungura ouzeu nu kaze zengi otusepa mumue: ²⁹ Nunguari metja nai kuene, nangarire Solomona moujere ue auhe kena pa huikikirue otja imue jazo. ³⁰ Nambano Mukuru tje zareka ehozu ro kuti pupetambo, ndi karapo ndino nu muhuka ari umbua mezuko, kamaa zareke ene okukapita nao, ouene vonangamburiro okatiti? ³¹ Okutja a murikende, amutja, matu ri tjike? poo, ma tunu tjike? poo, matu zara tjike? ³² Orondu ovina mbi avihe ovanavisenginina ombive paha: nu Iho mejuru utjiua kutja ovina avihe mu vi hepa. ³³ Nunguari rutenga paheje ouhona ua Mukuru nousemba ue; nene ma mu uezirua imbi avihe. ³⁴ Okutja amu rikende na muhuka: orondu muhuka ri no merikendero uaro orini. Ejuva arihe rino mauzeu uaro nge rijenena.