¹ Judas, o mukarere ua Jesu Kristu, nu o muangu ua Jakova, ku imba mba isaneua, ovasuverua mu Mukuru ingui Tate, imba mbu va takamisirua Jesu Kristu: ² O tjari, no hange no rusuvero nga vi uezirue kuene. ³ Vasuverua, ami tjinga a mba karere no urizemburuka tjinene uoku mu tjangera o hunga no ndjamo ja avehe, otji pa kara o hepero, kutja mbi mu tjangere mbi mu rumbirire oku pirukira no masa o ngamburiro ndja jandjerue ko vajapuke po rumue. ⁴ Orondu o varumendu vo rive va njongera mo mo vineja, imba oku za ku rukuru mba tjangererue ko mbanguriro. Ovo o varumendu mbe hina Mukuru mbe jepisira o tjari tja Mukuru ko zonduma nde hina matjaerero, nu ama ve patana Muhona ingui erike, Mukuru, ingui o Muhona uetu Jesu Kristu. ⁵ Nunguari mbe zeri oku mu zemburukisa- nangarire kutja ene muna pu mua tjivirue o vina mbi, kutja Muhona ua jamene ovandu oku za kehi ra Egypt, kuzambo ua njonene imba mbe ha itaverere ko. ⁶ Na imba o vaengeri mbe ha takamisire o ruveze ruao indui o rutenga, nunguari mba zapere po ruveze ruo maturiro uavo, Mukuru Eje ueve tizira mo mapando uaaruhe kehi jo ndorera nga ko mbanguriro je Juva indi enene. ⁷ Tjimuna o Sondoma no Gomora no vihuro o ngondoroka na vio, vie ri jandjere o vini ko turaro tuo runde, noku kongorera omararasaneno jarue. Nu ovo veri otjo tjisanekero tja imba mbe ihamisiua mo mbanguriro jo muriro uaaruhe. ⁸ Nu mo muano o tjingeuo, tjiri, imba o varote mba otji ve tunda o njama javio. Nu ave njengura o mauvara, ave jamburura o viutua vio ujere. ⁹ Nunguari na Mikael o muengeri o hongora, tja pirukiririre o munauvi, o hunga no rurova rua Mose, kenaa pa rorere oku jeta o mbanguriro jo ndjambu kuje, nunguari ua tjere, "Muhona nge ku kandaize". ¹⁰ Nunguari imba ve tukana o hunga no vina mbi ve hina ku tjiua: nunguari o vina mbi ve tjiua hapo, otja tjimuna o vipuka mbi hina zondunge, ovina mbi ombi ve ri tunda o veni mu vio. ¹¹ Ouee ku vo! Ovo tjinga a va toora o ndjira ja Kain, nu ave rijandja o veni ko ngatukiro ja Balaam jo tjisuta, nu ave rinjono o veni mo zombata za Kora. ¹² Imba o vandu o vavi vo ndova mo mikandi vienu vio rusuvero, tji ma ve ri o mukandi pueena ene noku hina ndira; Ovarise mbe ri risa oveni. Ovo o vikamba mbi hina meja mbi hingirua akuhe ijo vivepo; o miti mbi ha tuako o vihape mo ruteni, mbia koka tuvari, mbia zukurua no mize. ¹³ O zongazona o vindandi zo kuvare, nde huka esuzu ro honi ja zo o zeni; o zonjose nde singauka uriri nda puikirua o u zorozu uo ndorera ngaaruhe. ¹⁴ Nu Enok uina ingui o utjahambombari oku za ku Adam ua profetere ku imba indi tja tjere, Tareje Muhona me ja no majovi jovi ja imba o vajapuke. ¹⁵ Nu meja oku tjita o mbanguriro ku avehe. Uina meja oku kandaiza o varunde avehe o hunga no vitjitua viao avihe vio urunde, mbi va tjitire mo urunde, no hunga no vina avihe o vizeu o varunde mbi va hungirire o hunga na Je. ¹⁶ Imba o vaunaune, mbe uhuara ama ve vara o zondjo, mbe kaenda otja ko zonduma zao ozombi. Nu o vinjo viao vi hongonona o vina o viritongamise, ve hungira o vina o viua o hunga no vandu kutja ve mune o ndjambi. ¹⁷ Nunguari ene, vasuverua, zemburukeje o mambo inga nga hungirirue ijo vaapostolo vo Muhona uetu Jesu Kristu. ¹⁸ Ovo tjinga a ve mu raerere kutja, "mo majuva uo maandero ma ku je ku kara o vajamburure mbu mave je ku kaenda mo zonduma zao zo urunde." ¹⁹ Imba ovo imba mbe jeta okuhanika , ovandu vo uje, mbe hina Mbepo o Ndjapuke. ²⁰ Nunguari ene, vasuverua, ri zeuparisee oveni mo ngamburiro jenu indji o ndjapuke oku kapita, ama mu kumbu mo Mbepo o Ndjapuke. ²¹ Ritakamisireje o veni mo rusuvero rua Mukuru, nu mu undje o Tjari tja Muhona uetu Jesu Kristu tji tji tuara ko muinjo uaaruhe. ²² Tjariparereje imba mbe ha itavere. ²³ Nunguari tjiva jamee no ku ve hakana oku za mo muriro, ku tjiva kareje no tjari pamue no ndira, ama mu njengua na indji o mbanda ndja tundua ijo njama. ²⁴ Nambano ku ingui ngu jenena oku mu takamisa mo ku puitara noku mu zika po murungu uo ujere Ue nokuhina tjipo no ndjoroka ndji hina ku jenena oku serekarerua; ²⁵ Ku Mukuru erike ingui o Mujame uetu mu Jesu Kristu o Muhona uetu, nga rire o ujere no maukombandambanda, no maunaneno, no masa no uvara, mo zo iri azehe, mu nai na mo ngaaruhe. Amen.