¹ Kuzambo Pilatus otja toora Jesu nu E Mu renge ozogora. ² Ovasorondate va zenga ekori rouhona ro makuija, nave tua ro ko tjiuru Tje, nave Mu huikike ombanda o pepuri, ³ Nave tja, Minikua! Mbara jo Vajuuta. Nu ve Mu tonene otupiu. ⁴ Nu Pilatus ua pita pendje rukuao, na tja kuvo, Tareje, Ami me Mu pitisa pendje kuene kutja mu mune kutja, ami hina pu me munu ondjo mu Je. ⁵ Nu Jesu otja pita pendje aa tuako ekori rouhona romakuija no mbanda o pepuri. Nu Pilatus ua tja ku vo, Tareje, o Murumendu eje ngui! ⁶ Ovapristeri ovanene no vaungure vo veta tji ve Mu muna otjiva urira kombanda, amave tja, Mu papera kotjikoroise! Mu papera kotjikoroise. Pilatus ua tja kuvo, Ene Mu tooreje mu ke Mu papere kotjikoroise, orondu Ami hina pu me munu ondjo mu Je. ⁷ Ovajuuta otji ve mu zira, Ete tuna oveta, nu otja koveta jetu uaso kuta orondu Eje Tje ri isapo Omuna ua Mukuru. ⁸ Nu Pilatus tja zuva omambo inga, eje ua uruma oku kapita. ⁹ Eje ua hita rukuao mondjiuo jo mbanguriro, na tja ku Jesu, Ove Ua za pi? Nu Jesu kena zirira nde mu pa. ¹⁰ Nu Pilatus otja tja ku Je, Kona ku hungira kuena ami? Kona ku tjiua kutja mbi na ouvara uoku ku papera kotjikoroise nu mbi na ousemba uoku ku kutura? ¹¹ Jesu Ua zira, Ove ko tj kara nouvara kombanda Jandje, andaku kau jandjerue kove okuza kombanda. Nunguari ingui ngue Ndji jandja kove u na ourunde mbua kapita. ¹² Okuza imba, Pilatus ua pahere oku Mu kutura. Nunguari Ovajuuta va urira kombanda, amave tja, Tji ua kutura omurumendu ngui okutja ka ove epanga romukesare. Auhe ngu me riungura ombara ma pirura omukesare. ¹³ Nu Pilatus tja zuva omambo nga, otja eta Jesu pmurungu na haama kotjihavero tjo mbanguriro, poruveze ndu isaneua, Orupare Ruomaue, nunguari Motjiheperi o Gabata. ¹⁴ Nu jari omeritunino Uomarurumino, mangara moiri oitja hamboumue. Eje otja tja ko Vajuuta, Tareje, Ombara je nu. ¹⁵ Nunguari ovo va urira kombanda, Nga jende! Nga jende! Mu papera kotjikoroise! Pilatus ua tja kuvo, Hi papere Ombara jenu kotjikoroise? Ovapristeri ovanene ave ziri, Katu na mbara pendje Nomukesare. ¹⁶ Kuzambo eje otje Mu jandja kuvo oku ka paperua kotjikoroise. Novo va toora jesu nave Mu tuara. ¹⁷ Nu Eje ua kaenda aa toora otjikoroise Tje, oku jenda kona ku ku isaneua oruveze ruo tjikongo tjo tjiuru, Motjiheperi pup e isaneua Golgota, ¹⁸ Ku ve ke Mu papera kotjikoroise, no varumendu vevari ovakuao, momikuma avije vari, Jesu ae ri pokati. ¹⁹ Nu Pilatus ua tjiuru tjo mambo tji tji tja, JESU UA NASARETA OMBARA JO VAJUUTA, ne tjitua kotjikoroise. ²⁰ Otjiuru tjo mambo itji tja resiua ijo Vajuuta ovengi, orondu pona Jesu pa papererua kotjikoroise pari popezu notjihuro, notjo tja tjangerue mo Tjiheperi, no Tjihirika, no Tjilatina. ²¹ Nu o vapristeri o vanene vo Vajuuta otji va tja nai ku Pilatus, Otjanga, Ombara jo Vajuuta, nunguari kutja Eje ua tjere, Ouami Ombara jo Vajuuta. ²² Pilatus ua zira, Tji mba tjanga, mba tjanga. ²³ Nu tji vaza noku zepz Jesu, Ovasorondate va toorere ozombanda Ze, nave ze hana po tune, kutja omusorondate auhe a toore okarumbembera kemue, nombanda indjo jo kombanda indjo nde uina. Nu ombanda ondjo nde jo kombanda kajari no mupambo, ja zengirue o homokera okuza kombanda nga kehi. ²⁴ Novo otji va tja nai mokati kavo oveni, A tu i taura, nunguari nga tu ji umbire ozohanga, tu mune kutja mai rire ojani ( kutja omatjangua je jenenisiue inga nge tja, va hana omituaro Viandje mokati kao, nave umbire ombanda Jandje ozohanga. Ovina mbi via tjitua ijo Vasorondate. ²⁵ Nu ina ua kuramene mene ro tjkoroise tja Jesu, nomuangu ua ina, Maria omukazendu ua Cleopas, na Maria Magdalena. ²⁶ Nu Jesu tja muna ina, nomuhongeua ingui ngua suverere, ava kurama mene, Eje Ua tja nai ku ina, Mukazendu, tara, o muna uo je! ²⁷ Kuzambo atja nai ko muhongeua, Tara njoko! Okuza moiri ndjo o muhongeua ingui otje mu tuara konganda je omuini. ²⁸ Kombunda ja itji, Jesu tjinga ija tjiua kutja ovina avihe via tjitua, kutja omatjangua je jenenisiue, otja tja, Mba to njota. ²⁹ Nambano pa zikirue otjitjuma tji tje urire o vinika, novo ve urisire ohore no vinika, nave i tua ko ruu, nave i jerere kotjinjo Tje. ³⁰ Nu Jesu tja za noku jakura o vinika, otja tja, Tja tjitua, tja enene, Na pete otjiuru Tje Na jandja Ombepo Je. ³¹ No Vajuuta, mokutja jari ejuva ro meritunino uo Marurumino, ve rijarikana ku Pilatus, kutja, ve tejeue omarama, nu ve isapeue, kutja otutu a tu ha kara kovikoroise mesabata. ³² No Vasorondate otji ve ja nave teja omarama ua ingui omutenga, na ingo mukuao ngua papererue puena Je. ³³ Nunguari tji ve ja ku Jesu, nave munu kutja ua tu hapo, kave tejere omarama Ue. ³⁴ Nunguari umue uo vasorondate ua tuera Jesu nenga morupati, nu tjimanga ape piti ombindu nomeja. ³⁵ Nu ingui ngua muna ua hatoira tji, u ouhatoi ue ouatjiri. Nu matjiua kutja ma hungire ouatjiri, kutja ene mu itavere. ³⁶ Orondu ovina mbi via tjitirua kutja omatjangua je jenenisiue, Kapena etupa mu Je ndi mari tejeua. ³⁷ Nu rukuao omatjangua omakuao je tja, Mava je ku tara mu Je, ingui ngu va tuera. ³⁸ Nu kombunda ja imbi Josef ua Arimatea, eje uina nguari o muhongeua ua Jesu, nunguari movineja orondu tji ja titira o Vajuuta, ua ningira ku Pilatus kutja e mu jandjere oku tuara orutu rua Jesu. Pilatus ue mu jandjera. Eje otje ja na toora orutu rua Jesu. ³⁹ Nu pe ja rukuao Nikodemus, ingui rutenga ngue ere ku Jesu outuku, na jeterere mangara ozo kilograma omirongo vitatu zo vinuke mbia hovekua mumue. ⁴⁰ Novo otji va toora orutu rua Jesu, nu aver u manga mozonguju muena o vinuke, otja ko muano uo ku paka kuo Vajuuta. ⁴¹ Nambano pona pa papererua kotjikoroise pa ri o tjikunino, nu mo tjikunino mua ri ombongo ombe, mu mu hina mua rarisirue omundu. ⁴² Otji va rarisa Jesu mu jo, orondu ra ri ejuva ro Meritunino ro Vajuuta, no mbongo jar i popezu.