1
Jesu Ua hungirire omambo inga, nu A rire tja jere omeho Ue Kejuru Na tja, Tate, oiri je ja, Jerisa Omuna Uoje, kutja Omuna Uoje uina E Ku jerise.
2
Otja tji Ue mupa ouvara kombanda jonjama aihe, kutja A jandje omuinjo uaaruhe ku avehe Mbu Ue Mu pa.
3
Nomuinjo uaaruhe ouo mbui, okutja ve tjiue Ove Mukuru uatjiri erike, na Jesu Kriste, ngu ua hinda.
4
Ami Mbe Ku jerisa mouje. Ami Mba mana otjiungura tji Ue Ndjipa okuungura.
5
Nu nambano, Arikana Tate, Ndjesa Mbi kare noujere puena Ove, imbui oujere Mbu Mbar i nao puena Ove ngunda ouje au hija kara po.
6
Ami Mba tjiukisa ena Roje kovandu imba mbu Ue Ndji pa okuza mouje. Ovo vari Ovoje, nu Ove Ue ve jandja ku Ami, nu ovo va takamisa Embo Roje.
7
Nambano ovo va tjiua kutja ovina ngamua avihe, mbi Ue Ndji pere, viaza Kove.
8
Orondu Ami Mbe vepa Omambo inga ngu Ue Ndji pa, novo ve je jakura, nu va tjiua katjiri kutja Ami Mba za Move. Novo va itavera kutja Ove Ue Ndji hinda.
9
Ami Me kumbire vo. Ami Hina ku kumbira ouje, nunguari imba Mbu Ue Ndji pa, orondu ovo Ovoje.
10
Avehe Vandje Ovoje nu Ovoje Ovandje; nu Ami Me jerisiua muvo.
11
Nu nambano Ami Hi tjiri mouje, nunguari imba veri mouje, nu Ami Me ja Kove. Tate Omujapuke, Ve takamisa mena Roje imba mbu Ue Ndji pa kutja ve rire umue tjimuna ete tji turi.
12
Ngunda A mbari puena vo mouje, Mbe ve takamisire mena Roje. Imba Mbu Ue Ndji pa Mba takamisa, nu kapena umue ngua pandjara, pendje nomuna uombandjarero, kutja omatjangua je jenenisiue.
13
Nu nambano Me ja Kove, novina mbi Me hungire mouje kutja ve kare nomeurisiro uondjoroka Jandje muvo.
14
Ami Mbe ve pa Embo Roje, nouje ue ve njengua mokutja ovo kavouje, otja Ami tji Mbi heri ououje.
15
Hina ku kumba kutja U ve tore U ve isamo mouje, nunguari kutja U ve takamise mo Munauvi.
16
Ovo ka vouje otja Ami tji Mbi heri ououje.
17
Ve Japura mouatjiri Uoje. Embo Roje ouatjiri.
18
Otja tji Ue Ndji hinda mouje, Ami uina otji Mbe ve hinda mouje.
19
Nu Ami Me rijapura motjimbe tjao, kutja ovo uina ve japurue mo Uatjiri.
20
Nu Hina ku kumbira imba peke, nunguari uina imba mbu mave je ku itavera mu Ami, mena rembo rao,
21
Kutja avehe ve rire umue, otja Ove Tate tji u ri mu Ami, na Ami Move, kutja ovo uina ve rire umue mu Ete, kutja ouje u itavere kutja Ove Ue Ndji hinda.
22
Noujere Mbu Ue Ndji pere, Ami Mbe ve pa, kutja ve rire umue, tjimuna tji tu ri umue:
23
Ami muvo, na Ove mu Ami, kutja ve kongomonenue mu umue, nokutja ouje u tjiue kutja Ove Ue Ndji hinda, nu Ue ve suvera otja tji Ue Ndji suvera.
24
Tate, Me zeri uina imba mbu Ue Ndji pa kutja ve kare puena Ami pu Mbi ri, kutja ve mune oujere Uandje mbu Ue Ndji pa; orondu Ove Ue Ndji suverere komurungu uomazikiro uouje.
25
Tate Omusemba, tjiri ouje kau ku tjivirue, nunguari Ami Mbe Ku tjivirue, nu imba va tjiua kutja Ove Ue Ndji hinda.
26
Ami Mba tjiukisa ena Roje kuvo, nu Me ri tjiukisa, kutja orusuvero ndu Ue Ndji suvera naro rukare muvo, na Ami muvo.