¹ Ovina mbi Mba hungire ku ene kutja amu ha putarisiua. ² Maveje ku mu ramba mozosinagoge. Ii oruveze ma ru ja, auhe ngu ma zepa ene ndu meje ku tjangovasi ma ungurire Mukuru ³ Novina mbi mave je ku vi tjita ku ene, orondu kave tjivirue Tate, na Ami uina. ⁴ Nunguari ovina mbi Mbe mu raere kutja oruveze nduo tji rue ja mu zemburuke kutja Mbe mu raerere ohunga navio. ⁵ Nunguari Ami nai Me i ku ingui ngue Ndji hinda, nu kapena umue uenu ngu Me Ndji pura, ⁶ Mo i pi? Nunguari mokutja Mba hungire ovina mbi ku ene, oruhoze rue ura momutima uenu. ⁷ Nunguari Me mu raere ouatjiri, okokuua ku ene kutja Ami mbi kaende; orondu Ami tji Mbi ha ire, Omuvatere kena ku ja ku ene. Nunguari tji Mbai, Ami Me mu hindi ku ene. ⁸ Nu Eje Tje ja, Eje Me je ku vera ouje ohunga nouvi, nohunga nousemba, nohunga nombanguriro: ⁹ Ohunga nouvi mokutja ovo kava itaverere mu Ami; ¹⁰ Ohunga nousemba mokutja Me i ku Tate, nu kamuna ku uhuara ama mu Ndji munu; ¹¹ Ohunga nombanguriro mokutja okavara kouje ka pangurua. ¹² Nu ngunda Mbi na ovina ovingi oku hungira ku ene, nunguari nai kamuna ku viura. ¹³ Nunguari Eje, Ombepo jo Uatjiri, Tje ja, Me mu nanene mouatjiri auhe: Orondu Kena ku je ku rihungirira, nunguari atjihe Tja zuu, itjo otji Ma hungire. Nu Me je ku mu hepurira ovina mbi mavi ja. ¹⁴ Eje ma hivirike Ami, orondu Eje Ma jakura mo Viandje, Na hepura vio ku ene. ¹⁵ Ovina avihe ingui Tate Mbie navio o Viandje, opu Mba tjere, eje ma toora mo Viandje, Na hepura vio ku ene. ¹⁶ Mokaruveze okasupi kamuna ku Ndji muna; nu rukuao mokaruveze okasupi, mamu Ndji munu orondu Me i ku ingui Tate. ¹⁷ Nu tjiva vo vahongeua Ve va hejasanene nai, Itji otjikuae tji Ma hungire ku ete, Mokaruveze okasupi, kamuna ku Ndji muna; nu rukuao mokaruveze okasupi, mamu Ndji munu, nokutja, Orondu Me i ku ingui Tate. ¹⁸ Novo otji va tja, Itji otjikuae tji ma hungire, mokaruveze okasupi? Ka tuna ku zuva mbi Ma hungire. ¹⁹ Nu Jesu Ua tjivirue kutja ovo Mave zeri oku Mu pura, Na tja kuvo, Mamu paha omazirira umue momukuao, ohunga na itji, mokutja Mba tja, Mokaruveze okasupi, nu kamuna ku Ndji muna; nu rukuao mokaruveze okasupi, nu mamu Ndji munu. ²⁰ Tjiri, tjiri, Metja nai ku ene, kutja mamu riri na mu imbi, nunguari ouje ma u joroka. Nu ene mamu kara noruhoze, nunguari oruhoze ruenu maru tanaurirua ko ndjoroka. ²¹ Omukazendu tje ri mozongama u kara noruhoze, orondu tjanje oiri je je ja. Nunguari tja panduka okanatje, ke tji zemburuka omihihamo tjinga e joroka kutja omundu ua kuatua mouje. ²² Nene nai otji mu noruhoze. Nunguari Me mu munu rukuao nu omitima vienu mavi joroka, nondjoroka jenu kapena mundu ngu Me i toora. ²³ Mejuva ndo kamuna tji mamu Ndji pura. Tjiri, tjiri, Me tja nai ku ene, Atjihe tji mua ningire Tate mena Randje, Eje Me mupu tjo. ²⁴ Ene ngamba kamuja ningira otjina mena Randje; Ningireje nu mamu jakura kutja ondjoroka jenu I urisiue. ²⁵ Ovina mbi Ami mba hungira kuena ene movisasanekero. Nunguari oruveze ma ruja ndu Mbi Hina ku uhuara a Me hungire kuena ene novisasanekero, nu Ndji Me je ku mu raisira ingui Tate ongahukiro. ²⁶ Mejuva ndo mamu je ku ningira mena Randje; nu Hina kutja Me je ku mu kumbira ku ingui Tate, ²⁷ Orondu ingui Tate omuini Ue mu suvera, motjimbe tjokutja ene mue Ndji suvera, nu mua itavera kutja Ami Mba za ku Mukuru. ²⁸ Mba za ku ingui Tate, nu Mbe ja mouje. Nu rukuao Me jesa ouje nu Ei ku ingui Tate. ²⁹ Ovahongeua Ve va tja nai ku Je, Tara nambano mohungire ongahukiro, nu Ko na ku hungira novisasanekero. ³⁰ Nambano matu tjiua kutja U tjiua ovina avihe, nu kona kuhepa oku purua i omundu. Nopu matuzu oku itavera kutja Ove Ua za ku Mukuru. ³¹ Jesu Ue ve pura, Nambano mamu itavere? ³² Tareje, Oruveze maru ja, ii nu rue ja nai, ndu mamu je ku pizurua, omundu auhe kovina vie omuini, na mu je ku Ndjesa peke. ³³ Ovina mbi Mba hungire kuena ene kutja mu Ami mu kare nohange. Mouje mamu kara nombamisiro, nunguari vandipareje, orondu Ami mba taara ouje.