¹ Ouami omuvite uatjiri, nu Tate Eje omuungure uehi. ² Otjitavi atjihe mu Ami tji tji hina ku jeta ovihape Eje U tji isapo. Nu atjihe tji matji jeta ovihape Eje U tji pumbura kutja tji jete ovihape ovingi oku kapita. ³ Nambano ouene ovakohoke mena rembo ndi mba hungira kuena ene. ⁴ Tureje mu Ami, na Ami mu ene. Otja tjitavi tji tji ha jenene oku jeta ovihape kutjo otjini, andu tji tja kara momuvite, ene uina otji u hina ku jeta ovihape pendje na Ami. ⁵ Ouami omuvite, ouene ovitavi. Ingui ngu ma kara mu Ami, na Ami mu je, ingui ongu ma jeta ovihape ovingi; orondu pendje na Ami kamuna tji mamu ungura. ⁶ Auhe ngu hina ku kara mu Ami, eje ma imbirahiua otja otjitavi na kukuta. Novo ve uonga nave umbu vio momuriro, novio avi njosiua. ⁷ Ene tji mua kara mu Ami nu omambo Uandje aje kara mu ene, mamu ingire tji mamu paha, na mu tjitirua tjo. ⁸ Mu itji Tate omu ma jerisiua, ene tji mua jeta ovihape ovingi, mu nao otji mamu rire ovahongeua Vandje. ⁹ Otja Tate Tje Ndji suvera, Ami otji Mbe mu suvera; kareje morusuvero Ruandje. ¹⁰ Tji mua takamisa omatuako Uandje, mamu kara morusuvero Ruandje, otja Ami tji Mba takamisa omatuako Ua Tate, nu E kara morusuvero Rue. ¹¹ Ovina mbi Mba hungire kuena ene, kutja ondjoroka Jandje i kare mu ene, nu kutja ondjoroka jenu i urisiue. ¹² Indi etuako Randje, kutja mu suverasane tjimuna Ami tji Mbe mu suvera. ¹³ Kapena umue nguna orusuvero orunene oku kapita indui, kutja omundu a jandjere omuinjo ue omapanga ue. ¹⁴ Ouene omapanga Uandje, tji mua tjiti atjihe tji Me mu pangura. ¹⁵ Okuza mba Hina ku uhuara Ame mu isana ovakarere, orondu omukarere ka tjiua omuhona ue Tje ungura. Nunguari Mbe mu isana omapanga orondu ovina avihe Mbi Mba zuva mu Tate, Mbe vi tjiukisa ku ene. ¹⁶ Ene kamu Ndji toororere nunguari Ami Mbe mu toorora nu E mu ziki kutja mu jende nu mu jete ovihape mbi mavi karerere, kutja atjihe tji mua ningire ku Tate mena Randje, Eje E tjijandje ku ene. ¹⁷ Ovina mbi Me pangura ene, kutja mu suverasane ¹⁸ Ouje tji mau mu njengua, muaso ku tjiua kutja ouo ua njengua Ami ngunda au hija njengua ene. ¹⁹ Andaku ouene ovouje, ouje mau suvere ovauo ouini. Nunguari mokutja kauene ovouje, nunguary Ami Mbe mu toorora mouje, ouje otji mau mu njengua. ²⁰ Zemburukeje embo ndi Mbe mu raera, Omukarere ka kapitire omuhona ue. Tji ve Ndji tatumisa mave tatumisa ene uina. Tji va takamisa Embo Randje, mave takamisa orenu uina. ²¹ Nunguari ovina mbi avihe maveje ku vi tjita ku ene mena Randje, orondu kave tjiua ingui ngue Ndji hinda. ²² Andaku Hi jere nu E hungire kuena vo, andaku kavena uvi; nunguari nambano kave tji tjina zeva roku kara mouvi. ²³ Ingui ngu me Ndji njengua u njengua Tate uina. ²⁴ Andaku Hi ungurire mokati kao ovingura mbi hina via ungurirue ijo mundu uarue, andaku kavena uvi. Nunguari nambano ovo va muna nave tondo Ami na Tate. ²⁵ Nunguari imbi via kara po kutja embo ri jenenisiue indi nda tjngua moveta jao, ovo ve ndji tonda noku hina zeva. ²⁶ Nunguari ingui Omuvatere tje ja, ngu Ma je ku hinda okuza ku Tate, nguri Ombepo jo Uatjiri, ngu ma zu ku Tate, Eje me je ku hatoirira Ami. ²⁷ Nu ene uina mamu je ku jandja ouhatoi, orondu ene mua kara puena Ami okuza kombutiro.