¹ Nambano komurungu uo mukandi uo Marurumino, Jesu tja tjiua kutja oiri Je jokupita mouje mbui okujenda ku Ihe jeja, otja tja suverere imba Ove omuini mouje, Eje Ue ve suvera nga komaandero. ² Nu eriro romapeta tji re ja komaandero, nu Omunauvi tjandje ua tuamo hapo momutima ua Judas Iskariot, omuna ua Simon , oku ke Mu horora, ³ Jesu ama tjiua kutja ingui Tate Ua jandjere ovina ahihe momake Ue, nokutja Eje uaza ku Mukuru nu ma jaruka ku Mukuru, ⁴ Eje ua sekama periro romapeta, Na tua ozombanda Ze potjikoro, Na toora o tauro,Ne rimanga na jo. ⁵ Kombunda ja nao, Eje otja tirira omeja motjijaha, na utu oku koha ozombaze zovahongeua Ve, noku ze piena no taoro Ndje rimangere. ⁶ Ne Eje tjeja pu Simon Petrusa. Nu Petrusa ua tja ku Je, Muhona, mo koho ozombaze zandje? ⁷ Jesu Ua zira Na tja ku je, Itji tji Me ungura nai, ene ngunda kamuna ku tji tjiua, nunguari mamu je ku tji pangununa kombunda. ⁸ Petrusa Ua tja ku Je, Ove konoo koho ko ozombaze zandje. Jesu Ue mu zira, Tji Mbi hina ku ku koha, ove kona rupe mu Ami. ⁹ Simon Petrusa ua tja ku Je, Muhona, kazombaze. ¹⁰ Jesu Ua tja ku je, Ingui ngue rikoho kena hepero pendje joku koha ozombaze ze orondu eje omukohoke auhe. Nu ouene ovakohoke, nunguari kauene amuhe. ¹¹ Orondu Eje i ja tjiua kutja ouani ngu me je ku Mu horora, Eje opaza okutja, kauene ovakohoke amuhe. ¹² Tjaza noku koha ozombaze zao, Na zara ozombanda Ze, na haama pehi, Eje otja tja nai kuvo, Mamu tjiua kutja Mba ungura tjike kuene? ¹³ Mu Ndji isana Muhonge, na Muhona, nu mu heja osemba, orondu OUAMI. ¹⁴ Nu Ami, Omuhonge, nu Omuhona uenu, otja tji Mba koho ozombaze zenu ene uina kohasaneje ozombaze. ¹⁵ Orondu Ame Mbe mu pe otjisanekero, kutja ene mu tjite otja tji Mba tjiti kuene. ¹⁶ Tjiri, tjiri Me tja nai kuene, Omukarere ka kapitire omuhona ue, nu momuano otjingeuo ingui ngua hindua ka kapitire ingui ngue mu hinda. ¹⁷ Tji mamu tjiua ovina imbi ouene ovaningandu tji mue vi tjiti. ¹⁸ hina ku hungira ohunga na ene amuhe; Me tjiua imba mbu Mba toorora; Nunguari kutja omatjangua je jenenisiue, ingui ngu ma ri omboroto puena Ami ue Ndji jerere otjipande tje. ¹⁹ Okuza imba Me mu raere ngunda atji hija kara po, kutja tji tjazu noku tjitua mu tjiue kutja OUAMI. ²⁰ Tjiri, tjiri Me tja nai ku ene, Ingui ngu ma jakura auhe ngu ma hindi ma jakura Ami. Nu ingui ngu ma jakura Ami ma jakura Ingi ngue Ndji hinda. ²¹ Jesu tja za noku hungira nai Ua zunganisiua mombepo, Na hngonona, Na tja, Tjiri, tjiri, Me tja nai ku ene, kutja umue uenu Me Ndji horora. ²² Nu ovahongeua, otji va tarasana amave ripura kutja ma heje une. ²³ Nunguari pa ri umue uovahongeua, ingui ngua suverere, ngua rarere mekoro ra Jesu. ²⁴ Simon Petrusa, otje mu nanga, kutja a pure kutja, marire une ngu ma hungire ohunga naje. ²⁵ Nu eje aa rara morukoro rua Jesu, ua tja ku Je, Muhona ouani? ²⁶ Jesu Ua zira, Eje ingui ngu Me mupe okatjaive tji Mba zu noku ke tjaveka. Nu tjazu noku ke tjaveka Eje Ue ke jandja ku Judas Iskariot, omuna ua Simon. ²⁷ Nu Judas tjaza noku toora okatjaive Saatana ua hita mu je. Nu Jesu otja tja nai ku je, Itji tji mo ungura, ungura tjimanga. ²⁸ Nunguari ka pa ri na umue ua imba mbar i potjitihe ngua tjivirue kutja onguae tje mu heja nao. ²⁹ Orondu tjiva ve ripura kutja, motjimbe tjokutja Judas ua ri nondjatu jovimariva, Jesu otje mu heja kutja, randa imbi mbi matu hepa momukandi; poo kutja nga jandje otjina kovahepe. ³⁰ Neje tjaza noku jakura okatjaive komboroto, ua pita tjimanga. Nu jari ongurova. ³¹ Neje tja za noku pita Jesu otja tja, Nambano Omuna uo Mundu ma jerisiua nu Mukuru ma jerisiua mu Je. ³² Nu Mukuru tji ma jerisiua mu Je, Mukuru uina Me Mu jerisa mu Je omuini, nu Me Mu jerisa mohakahana. ³³ Vanatje outiti, Ami Mbiri puena ene okaruveze okasupi. Mamu je ku Ndji paha; notja tji Mba ha ko Vajuuta, ingui ku Me i ene kamuna ku jenena oku ja, nai Me tja nao kuene. ³⁴ Me mupe etuako epe, kutja mu suverasane. Otja tji Mbe mu suverere, otji muaso ku kara norusuvero auhe ko mukuao. ³⁵ Mu itji avehe maveje ku tjiua kutja ouene ovahongeua Vandje, tji muna orusuvero umue ko mukuao. ³⁶ Simon Petrusa ua tja nai ku Je, Muhona Ove mo i pi? Jesu Ue mu zira, Ami ku mei kamuna ku jenena oku Ndji kongorera nai, nunguari mamu je ku Ndji kongorera kombunda. ³⁷ Petrusa ua tja ku Je, Muhona, onguae tjimbi hina ku jenena oku ku kongorera nai? Ami Me jandjere Ove omuinjo uandje. ³⁸ Jesu Ue mu zira, Ove mo jandjere Ami omuinjo uo je? Tjiri, tjiri, Me tja nai kove, Ohunguriva kaina ku vandara, nga tji ue Ndji ripatana potutatu.