¹ James, o mukarere ua Mururu, no uo Muhona uetu jesu Kriste, ko mihoko imbio murongo na vivari mbia rimbarera pendje, Minikuee: ² Vakuetu, varee avihe otja o ndjoroka, tji mamu uire mo marorero pekepeke, ³ Ama mu tjiua kutja o marorero uo ngamburiro jenu je tjita kutja mu kare no muretima. ⁴ Nunguari jandjeree o muretima oku mana o tjiungura tjao o tji puise, kutja mu jenene oku rira o vapue, nu mba manuka, mbe hina tji ve hepa. ⁵ Nunguari tji pena umue uenu ngu hepa o unongo, eje nga ningire ku Mukuru, ngu jandja ku avehe uriri, nokuhina mberero, nu ma u jandjeua ku je. ⁶ Nunguari eje nga ningirire mo ngamburiro, ae hina ku ivaiva mu tjimue. Orondu ingui ngu ivaiva uri tjimuna o zzongazona zo muronga, mbu hingua noku takua ijo mbepo. ⁷ Orondu o mundu ingo ngee ripua kutja ma jakura tjimue oku za ku Mukuru; ⁸ Eje tjinga ae ri o mundu uo uripura o tjikapevari, ngu hina ngurameno mo zondjira ze azehe. ⁹ O mukambure o musiona nga joroke mo majerero ue, ¹⁰ Nu ingui o mutumbe mo maheruriro ue, eje tjinga ama koka tjimuna o ngara je hozu. ¹¹ Orondu e juva tjinga a ra utu oku ronda no mutenja mbu mau njosa, ri kukutisa e hozu nu o ngara jar o a i uire pehi, nu o uua uo muhapo ua jo au zengi: Mo muano o tjingeuo o mutumbe otji ma zengire mo miano vie. ¹² O munandaja o mundu ngu zara o marorero, orondu eje tja zu noku tona, eje ma munu e kori ro utoni ro muinjo, indi Mukuru nda kuizika ku imba mbe mu suvera. ¹³ Ape ningi o mundu tji ma rorua ngua tja, “Ami me rorua i Mukuru. Mukuru tjinga ae ha rorua ijo uvi, nu The ha roro nangarire umue. ¹⁴ Nunguari auhe u rorua tja nanenua kuarue ijo zonduma ze o muini nu a ze mu orereke. ¹⁵ Nu o zonduma tji za zu noku jacana ze kuata o uvi: Nu o uvi tji ua zu noku kura nga tji ua jenene u kuata o ndiro. ¹⁶ A mu puka vakuetu o vasuverua. ¹⁷ O tjijandjeua atjihe o tjiua, no tjijandjeua atjihe tji tja puisiua tji za kombanda, nu tji rauka oku za ku ingui Ihe uo zondjerera, ingui ngu hina matanaukiro poo o tjizire tjo mavingurukiro. ¹⁸ Eje ue tu kuata mo mbango Je o muini Nembo ro uatjiri, kutja ete tu kare tjimuna o vihape Vie o vitenga oku za mu imbi avihe mbia uta. ¹⁹ Nu vakuetu o vasuverua, opu tua soku hakahana oku zuva, oku jenda katiti oku hungira, oku jenda katiti oku pindika. ²⁰ Orondu o mazenge uo mundu ka je ungurire o usemba ua Mukuru. ²¹ Opu mua soku umba ko tjikoro o ndova aihe, no ma tananeno ajehe uo uvi, amu jakura mo merisusuparisiro Embo indi nda kunua, ndi ma ri jenene oku jama o minjo vienu. ²² Nunguari rireje o vatjite ve Mbo, nu amu rire o vazuve uriri, nu a mu ripukisa o veni. ²³ Orondu auhe ngu ri o muzuve ue Mbo, ae he ri o mu tjite ua ro, u asana ko mundu ngu ma tara o murungu ue mo tjiritarero: ²⁴ Orondu eje u ri muna, nu a kaenda, nu tjimanga a zembi kutja ua ri vi. ²⁵ Nunguari auhe ngu ma tara mo veta o mbua jo ngutukiro, nu a kara mu jo, ingui tjinga ae he ri o muzuve ngu zemba, nunguari o mutjite uo viungura, ma serua o ndaja mu itji tji ma tjiti. ²⁶ Nu tjimuna umue mokati kenu ngu me rivara kutja o munaukambure, nu aha uorere eraka re, nunguari a pukisa o mutima ue o muini, o ukambure uo mundu ngui o mungandjo. ²⁷ O ukambure o ukohoke mbu ha tundakere po murungu ua Mukuru nu nguri Tate, ouo imbui, oku varura o zoseua no vahepundu mo mihihamo viao, no mundu oku ritjevera o muini nokuhina tjipo tji tja za mo uje.