¹ Vanatje, jozikeje o vakuate venu mu Muhona, orondu tji ku ri o usemba nai. ² Jozika iho na njoko (ndiri e tuako etenga ndina o makuizikiro), ³ Kutja u kare no mbuiro no muinjo o mure kombanda jehi. ⁴ Nu ene varumendu o vakuate, amu rimengere oku handjisa o vanatje venu, nunguari ve kurisireje mo mahongero no maronga ua Muhona. ⁵ Vakarere kareje no nduviro no ndira no mazezerero uo mutima uenu auhe ko vahona venu otja ko muhingo uo njama, tjimuna ku Kriste; ⁶ Amu ungurire oku munika, tjimuna mbu mamu ri tjatisa ko vandu, nunguari otja o vakarere va Kriste, mbu mave tjiti o mbango ja Mukuru oku za mo mutima, ⁷ Amamu ungura otja o vakarere mbena o ndando o mbua, tjimuna mbu mu hina ku ungurira o vandu nunguari mbu mam ungurire Muhona, ⁸ Amamu tjiua kutja o tjiungura atjihe o tjiua o mundu tji ma tjiti, eje me je ku tji jakurira o ndjambi oku za ku Mukuru, nangarire kutja o mukarere poo o mukutuke. ⁹ Ene vahona, tjiteje o vina o tjingevio kuvo, amamu ritjaere ko mbeze, amamu tjiua kutja o Muhona uenu uina uri Mejuru, nu kamuna ngarera mu Je. ¹⁰ Tjo maandero, vakuetu, zeupareje mu Muhona na mo unene uo masa Ue. ¹¹ Ripanganeje no muzaro uo vita auhe ua Mukuru, kutja mu jenene oku pirukira o matjendje aehe uo Munauvi. ¹² Orondu ka tu kondjo kueena o mbindu no njama, nunguari kueena o mauhonapare, kueena o mauvara, kueena o vanane vo ndorera jo uje mbui, kueena o maurunde uo mo mbepo mo tuveze tuo majuru. ¹³ Opu mua soku ripangana no muzaro uo vita auhe ua Mukuru, kutja mu jenene oku piruka mejuva to uvi, nu tji mua zu noku tjita avihe, mu kare kaseka. ¹⁴ Opu mua soku kara kaseka a mua pata ekuamo ro uatjiri mo vikondambunda, amua tuako o tjipereke tjo uatjiri mo viari, ¹⁵ Nu ko zombaze zenu amua tuako o meritunino uo Mbuze o Mbua jo hange. ¹⁶ Nu kombanda ja imbi avihe a mua toora o ruvao ruo ngamburiro, ndu mamu jenene oku zemisa na ruo o viku vio muriro avihe vio murunde. ¹⁷ Nu tuakeje ekori ro tjitenda ro ndjamo, nengaruvio ro mbepo, ndi ri Embo ra Mukuru, ¹⁸ Amamu kumbu aruhe no ngumbiro aihe no maningiriro aehe mo Mbepo, amamu kara katumba aruhe ku itji o tjina tji no muretima auhe no maningiriro ngu mamu kumbire o vajapuke avehe. ¹⁹ Ndji kumbireje uina, kutja o manjamukuriro je jandjeue ku ami, kutja mbi paturure o tjinjo tjandje no uvande oku tjiukisa o tjiundikua tjo Mbuze o Mbua, ²⁰ Motjimbe tjajo tji mba ririra o mukuramene po ngua pandekua, kutja mu jo mbi hungire no uvande, otja tji mba soku hungira. ²¹ Nunguari kutja mu tjiue ohunga na ami, nokutja mbi ri vi, Tikikas o mukuetu o musuverua no mukarere o mutakame mu Muhona meje ku mu tjivisa o vina avihe, ²² Ngu mba hindire kuene indi e zeva ndi, kutja mu jenene oku tjiua o hunga na ete nu a huhumine o mitima vienu. ²³ O hange ko vakuetu, no rusuvero pueeno ngamburiro, oku za ku Mukuru ingui Tate na ku ingui Muhona Jesu Kriste. ²⁴ O tjari nga tji kare pueena imba avehe mba suvera o Muhona uetu Jesu Kriste katjiri.