¹ Nu nambano otja tjinga atu na o tjiungura tjo ukarere tji, tjinga a tua tjariparerua, o tji tu ha urua. ² Nunguari tua imbirahi o vitjitua ahihe o vihorekua vio honi, katu kaneda mo vineja, poo oku ungurisa embo ra Mukuru mo matiku, nunguari tu ri ungurisa oku raisa o uatjiri ama tu ritjiukisa otja o vasemba ko urizemburuka uo vandu avehe po murungu ua Mukuru. ³ Nunguari uina o mbuze o mbua jetu tji ja undikua, ja undikua ku imba mbu mave pandjara, ⁴ Mu imba ingui mukuru uo uje mbui ma potuparisa o zondunge za imba mba mbe ha itavere ko, kutja o majerero uo Mbuze jo Ujere ua Kriste, Eje ngu ri o tjiperendero tja Mukuru, ai ha jere kombanda jao. ⁵ Orondu ete katu rizuvarisa o veni, nunguari Kriste jesu kutja o Muhona, nokutja ete oveni ouete o vakarere venu motjimbe tja Jesu. ⁶ Orondu Mukuru ngua tjere, O ndjerera nga jere oku za mondorera, o ngua jera mo mitima vietu ok utu pa o majerero uo ndjiviro jo ujere ua Mukuru mo murungu ua Jesu Kriste. ⁷ Nunguari tuno mbuikiro jo vihuze mbi mo vitjuma viehi, kutja o masorero uo masa je rire o ua Mukuru, nu aje ha rire o uetu. ⁸ Ete kondjisiua minda avihe nu katu, nunguari katu tukuturirua moukoto; tu temisiua nunguari katu jaraara; ⁹ Tu tatumisiua, nunguari katu imbirahirue; tu vandua pehi, nunguari katu hahauka; ¹⁰ Ama tu tjindi o ndiro ja Muhona Jesu aruhe mo rutu, kutja o muinjo ua Jesu u tjiukisiue o ukahu mo rutu ruetu. ¹¹ Orondu ete mbu tu no muinjo tu jandjeua ko ndiro aruhe mena ra Jesu, kutja o muinjo ua Jesu u raisiue mo njama jetu ndji hina muinjo uaaruhe. ¹² Okutja o ndiro opu i ugura muete, nu o muinjo au ungura muene. ¹³ Nu ete jtinga atu no mbepo o tjingejo jo ngamburiro, otja tji pa tjangua, “Ami mba itavera opu mba za oku hungira,” ete uina tua itavera op utu za oku hungira, ¹⁴ No ndjiviro jokutja Ingua ngua pendurire Jesu me tu pendura uina mu Jesu, nu E tu kuramisa puena ene po murungu Ue. ¹⁵ Orondu ovina avihe via tjitirua ene, kutja motjimbe tjo tjari tji tja takavarisiua tji mo mbosiro jo ndangi jo vandu o vengi i takavarere ko ujere ua Mukuru. ¹⁶ Opu tu za oku hina ku urua, nunguari tjiri o mundu uetu uo pendje tji ma zundaka, ingui uo mo ukoto u peparisiua ejuva nejuva. ¹⁷ Orondu o mbamisiro jetu o mbupu, ndjiri ojo karuveze o kasupi, i tu ungurira o ujere o uzeu o uua tjinene oku kapita, ¹⁸ Ete tjinga atu ha tara ko vina mbi mbi munika, nunguari ku imbi mbi ha munika: orondu ovina mbi mbi munika o vio ruveze o rusupi uriri, nunguari ovina mbi mbi ha munika vi vikarerera aruhe nga aruhe.