¹ O vakarere avehe mberi kehi jo ndatumisire ngave vare o vahona vao o vanandengu jo ku peua o ndjozikiro aihe.Ngave tjite itji okutja ena ra Mukuru no mahongero Ue aje ha jambururua. ² Nu imba mbe na o vahona o vakambure, ave ve njengura mo kutja o vakambure o vakuao. Nunguari, ngave ve karere oku kapita. Orondu imba mbu mave kotokerua otjisuta mo tjiungura tjo ukarere o vatakame no vasuverua. Honga nu u ronge o vina mbi. ³ Tji pena umue ngu ma hongo o mahongero uarue nu tje hina ku itaverasana no mambo inga uo uatjiri uo Muhona uetu Jesu Kristu noku honga o mahongero otja ko umukuru, ⁴ eje ue ritongamisa ae hina tje tjiua. Nu eje ua vera o maivaiviro no zombata zo mambo nge jeta eruru, no mananasaneno, no mahazeraka, oma unauninasaneno uo uvi, ⁵ no virua mbi ha janda pokati ko vandu vo zondunge nda zundara. Mba pandjara o uatjiri nu mbe tanguaasi o umukuru o ndjira jo ku kara no vimariva ovingi. ⁶ Nunguari o umukuru pueena oku jakura noku suvisiua mu itji o mundu tje na tjo o utumbe o unene. ⁷ Orondu katuna tji tua jeterera mo uje, nu katuna oku tuaerera tjimue pendje. ⁸ Nu, nanguari ete ngatu haamisiue ominjo ijo vikuria no mituaro. ⁹ Nunguari imba mbe zera o rutumbo ve uira mo marorero, mo nguehe. Ve uira mo zonduma o zengi zo ujova nde ihamisa, na mu atjihe tji tji uisira o vengi mo mazundakero no mbandjarero. ¹⁰ Orondu o masuverero uo vimariva o ngeri o muze uo maurunde ajehe. Ovandu tjiva mbu va nanukiririrue ko va humburuka ko ngamburiro nu ave rituere o veni no mihihamo o mingi. ¹¹ Nunguari ove, mukarere ua Mukuru, taura u tire o vina mbi. Kongorera o usemba, o umukuru, o utakame, o rusuvero, o muretima, no utarazu uo mutima. ¹² Ruaa o tjirua o tjiua tjo ngamburiro. Kakatera ko muinjo uaaruhe, ove ku ua isanenua, nu ove mbui ku ua jandja o mahongononeno o maua po murungu uo zohatoi o zengi. ¹³ Meku rakiza po murungu ua Mukuru, ngu jandja o muinjo ko vina avihe, na Kristu Jesu, ngua hongonona po murungu ua Ponteusa Pirate nu a jandja omambo omaua, ¹⁴ kutja u takamise e rakiza nokuhina tjipo nga kejuva o Muhona uetu Jesu Kristu ndi ma munika. ¹⁵ Mukuru meje ku raisa o kuja kua Christu mo ruveze tji rua jenene: Mukuru, o Munauvara erike, o Mbara ngua zikama no Muhona ngu nana. ¹⁶ Eje erike ngu ha koka nu ngua tura mo ndjerera o mundu ndje hina ku jenena oku riama ko. Kapena o mundu ngu me mu munu poo ngu ma jenene oku mu muna. ku Je nga rire o ndjozikiro no masa uaaruhe. Amen. ¹⁷ Ronga imba mba tumba mo uje mbui kutja ave he ritongamisa, poo oku zika o maundjiro uao mo rutumbo ndu hina mazikameno. Nunguari, nga ve tue omaundjiro uao mu Mukuru. Eje Utupa outupe auhe uo uatjiri kutja tu viare muuo. ¹⁸ Vetia oku ungura o uua, oku tumba mo viungura o viua, no ku jandja pamue noku hanasana. ¹⁹ Orondu mo ku tjita nao mave ripuikire ko omazikameno o masemba mo ruveze ndu ma ru ja, kutja ve kambure ko muinjo uaaruhe. ²⁰ Arikana Timoteusa, takamisa itji tji tja tuua mo ndejeverero joje, amo rijepisa ko mahungiriro o mungandjo uo viporoporo, no zombata nde isaneua o ndjiviro jo maunongo. ²¹ Ovandu tjiva ave hongonona ovina mbi nu a ve jepe mo ngamburiro. Otjari nga tjikare puena ove.