¹ Nu ami, vakuetu, hije pe uru oku hungira kuena ene otja o vandu vo mbepo, nunguari mba hungira kuena ene otja ko vandu vo njama, otja ko unatje mu Kriste. ² Ami mbe mu hira o maihi, nu hi mu risire o vikuria o vikukutu, orondu ene tjandji ngunda kamuja jenena oku vi ria, nu uina ngamba ka mu ja jenena. ³ Orondu ngunda mu ri mo njama. Orondu tjeri kutja ngunda muna o masasa, no mananasaneno no mahanikiro mokati kenu, ka muri mo njama, nu ka mu kaenda otja ko muhingo uo undu? ⁴ Orondu ngunda umue a ma tja o uami o ua Paulus; nu o mukuao a ma tja o uami o ua Apolos; ka uene o vo njama are? ⁵ Nambano ingui Paulus o uani, nu ingui Apolos o uani, nanguari a ve ri o vakarere mbe mu jeta ko ngamburiro, otja imba Muhona pa jandja ku auhe ua vo? ⁶ Ami mba kuna, Apolos a hire; nunguari Mukuru ua jandja o manjomokero. ⁷ Okutja ingui ngu ma kunu otje he ri o tjina, poo ingui ngu ma hire, nunguari Mukuru ngu ma njomona Eje o munahepero. ⁸ Nambano ingui ngu ma kunu na ingui ngu ma hire ovo o mundu umue, nu auhe ma jakura o tjisuta tje otja ko tjiungura tje. ⁹ Orondu o uete o vaungure va pamue va Mukuru: nu ene ouene o tjikunino tja Mukuru, o ndjiuo ja Mukuru. ¹⁰ Otja ko tjari tja Mukuru tji tja jandjeua ku ami, otja o mutunge ua katjoruhonga, ami mba jara o mazikiro, nu uarue a tungire kombanda ja uo. Nunguari o mundu auhe nga tjevere kutja ma tungu vi kombanda ja uo. ¹¹ Orondu kapena mazikiro uarue ngu maje zikua pendje na inga nga zikua, ngeri Jesu Kriste. ¹² Nambano o mundu auhe tja tungu o ngoldo, poo o silveri, poo o maue o mahuze, poo ehozu poo o vipuite kombanda uo mazikiro nga; ¹³ O tjiungura tjo mundu auhe matji je ku tjiukisiua: orondu ejuva ma ri je ku tji horora, otjo tjinga ama tji je ku tvandururua ijo muriro; nu o muriro mau je ku nongonona o tjiungura tja auhe kutja o tjikuae. ¹⁴ Nu o tjiungura tja auhe tja tunga puuo tji tja zikama, eje ma jakura o tjisuta. ¹⁵ Nunguari o tjiungura tja kaani auhe tji tja njoseua, eje ma pandjarerua. Nunguari eje o muini ma jamua, tjimuna ngua jamua no muriro. ¹⁶ Kamuna ku tjiua kutja o uene o ndemberi ja Mukuru, no kutja o Mbepo ja Mukuru ja tura mu ene? ¹⁷ Auhe ngua tunda o ndemberi ja Mukuru, Mukuru Me mu njono. Orondu o ndemberi ja Mukuru, ene ndji mu ri jo, o ndjapuke. ¹⁸ Ape ningi o mundu ngu me ri pukisa. Tjipena umue mokati kenu ngu ngara ajo o nongo mo uje mbui, eje nga rire ejova kutja a rire o nongo. ¹⁹ Orondu ounongo uo uje mbui o ujova ku Mukuru; orondu pa tjangua, “Eje ma pata o zonongo mo vineja viazo ozeni.” ²⁰ Nu rukuao, “Muhona u tjiua o uripura uo zonongo, kutja ouo o mungandjo.” ²¹ Otji pe ha sere oku kara o mundu ngu me rihivi no vandu; Orondu o vina avihe o vienu, ²² Kutja o Paulus, poo o Apolos, poo o Kefas, poo o uje, poo o hupo, poo o ndiro, poo o vina mbi ri ko, poo o vina mbi ma vi ja; avihe o vienu; ²³ Nu o uene o va Kriste, nu Kriste o ua Mukuru.