1
Nu vakuetu, me hongonona kuene ombuze ombua, ndji mba zuvarisire kuene, nu uina ndji mua jakura, nu mu mua zikama;
2
Ombuze oMbua mu mu muna omatakamisiro uina, ene tji mamu kakatere kembo ndi mba zuvarisa muene, andu ene tji mua itaverere omungandjo.
3
Orondu ami mba jandja kuene rutengatenga itji ami uina tji mba jakura, kutja Kriste ua tira omauve uetu, otja ko matjangua;
4
No kutja Eje ua pakua, no kutja Eje ua penduka rukuao mejuva oritjatatu otja ko matjangua;
5
No kutja Eje ua munikua i Kefas, kuzambo I imba omurongo na vevari.
6
Nu kuzambo Eje ua munikua ijo vakambure mbari kombanda jo masere jetano mo ire imue, o uingi vao mbe riko nga kejuva ndinondi, nunguari tjiva va rara uina.
7
Kombunda ja nao ua munikua i James; kuzambo a munikua iimba ovaapostele avehe.
8
Nu kombunda jao avehe ua munikua i jami uina, otja umue ngua kuatua pendje no ruveze rue.
9
Orondu o uami ngu mbiri o muhinandengu po vaapostele avehe, nu hi puiririrue oku isaneua o muapostele, mena ro kutja ami ije tatumisa o kereka.
10
Nunguari motjari tja Mukuru o uami ngu mbi ri, no tjari Tje ku ami katji karere noku hina tjisuta, nunguari mba ungura tjinene oku ve kapita avehe; nunguari ka ami nu otjari tja Mukuru tji tjiri mu ami.
11
Nu nangarire ouami poo ovo, tu zuvarisa tji, nu ene otji mua itavera.
12
Nunguari Kriste Tje zuvaririsiua kutja ua pendurua mo vati,onguae tjive muene tji ve tja kapena mbendukiro mo vati?
13
Nunguari tji pe hina mbendukiro mo vati, okutja Kriste uina ka pendurirue.
14
Nu Kriste Tje ha pendururue, okutja omazuvarisiro uetu omungandjo, nu ongamburiro jenu uina omungandjo.
15
Nu uina ete ma tu munika otja ovanavizeze moku hongonona Mukuru, tjinga tu hongonona ohunga na Mukuru kutja Eje Ua pendura Kriste; nunguari Ngue ha pendurire, ovati tji ve ha pendurua.
16
Orondu ovati tji ve ha pendurua, okutja Kriste ka pendurirue.
17
Nu Kriste Tje ha pendurirue, okutja ongamburiro jenu ojo ujova; ene ngunda mu rim omauve uenu.
18
Nu naimba mba rara mu Kriste uina okutja otji va pandjara.
19
Nunguari mo hupo ndji tjeri kutja o uete uriri mbu tuna omaundjiro mu Kriste, mokati ko vandu avehe o uete mbu tua hangauka oku kapita avehe.
20
Nunguari nambano Kriste ua pendurua mo vati, nu Eje ua rira otjihape otjitenga tja imba mba rara.
21
Orondu otja indji ondiro tjija tuurungira mo mundu, ombendukiro mo vati uina ja tuurungira mo Mundu.
22
Orondu otja mu Adam avehe tji ve koka, mo muano otjingeuo mu Kriste avehe mave ungurua ovanamuinjo.
23
Nunguari omundu auhe otja ko urveze rua; Kriste otjihape otjitenga, kuzambo imba ova Kriste Eje tji Me ja.
24
Kuzambo ko maandero, tji ma jandja o uhona ku Mukuru, okutja ingui Tate; tji ma jandeke o unane auhe, no uvara auhe no masa.
25
Orondu osamba kutja Eje a nane nga tji Ma tua ovanavita Ve avehe kehi jo zombaze Ze.
26
Omunavita uo maandero oku jandekua ondiro.
27
Orondu Eje Ua tua ovina avihe kehi jo zombaze Ze. Nunguari Eje tji matja ovina avihe via tuua kehi jo zombaze Ze, pa raisiua po rutjandja kutja kapena ku heja Ingui ngua tua ovina avihe kehi Je.
28
Nunguari ovina avihe tji via tuua kehi jo uvara Ue, Ingui oMuna oMuini uina otji ma kara kehi jo uvara ua Ingui ngua tua ovina avihe kehi jo uvara Ue, kutja Mukuru a rire atjihe mu avihe.
29
Poo maveje ku tjita vi, imba mbe papitisirua ovati? Nu ovati tji ve ha pendurua kaparukaze, onguae tjiri ovo tji ve papitisirua ovati?
30
Onguae ete uina tji tu kara mo umba o ire aihe?
31
Mbi ta ejuva nejuva, mo ndjoroka jenu ndji mbi naja mu Kriste Jesu oMuhona uetu.
32
Tjeri kutja otja omundu, mba ruisa ovipuka ko Ephesus, mape ndji kotorere tjike ovati tji ve hina ku pendurua? “Nga tu rie nu tu nue orondu muhuka matu koka.”
33
Amu pukisiua; otuuano otuvi tu zunda ovikaro oviua.
34
Kareje katumba mo usemba, nu amu katuka ko; orondu tjiva kave tjiua Mukuru. Me hungire tji oku mu zepaisa ohoni.
35
Nunguari umue ma tja, O vati ve pendurua vi, nu ve penduka no rutu ndu ri vi?
36
Jova ove, tji ua kunu ka tji kara no muinjo andu tji tja koka.
37
Nu itji tji ua kunu, ko kunu o rutu inui ndu maru je ku kara po, nunguari ondui uriri (rumue jo vikokotua poo jo vikunua ovikuao),
38
Nunguari Mukuru u ipa orutu otja tji pa tjata ku Je, nu ku aihe jo zondui orutu ruajo o ini.
39
Nu onjama aihe ka njama ndja sana; nunguari pena onjama imue jo vandu, nonjama jarue jo vipuka, na jarue jo mahundju, na jarue jo zondera.
40
Pena uina otutu tuo majuru no tutu tuo uje. Nunguari o ujere ua ituo tuo majuru i jarue, no ja i tuo tuo uje i jarue;
41
Pena o ujere uejuve, ape kara oujere o ukuao uo mueze, no u jere oukuao uo zonjose; orondu onjose imue ja hanika kueena onjose onguao mo ujere.
42
Ombendukiro mo vati uina iri nao. Tji kunua mo uzundare na tji pendurua mo u hazundare.
43
Ru kunua moku hina ndjozikiro, natji pendurua mo u jere; ru kunua mo ungundi na ru pendurua mo masa;
44
Ru kunua a ru ri oruo undu, ru pendurua orutu ruo mbepo. Pena orutu ruo undu, nu pena orutu ruo mbepo
45
Nu otja tji pa tjangua, Omundu omutenga Adam ua rira otjihupe otjinamuinjo, Adam Ingui omu seinina ua ri oMbepo ndji jandja omuijo.
46
Nunguari kape tengere itjo otjo mbepo, nunguari itjo tjo undu; kombunda otji peja ijto tjo mbepo.
47
Omundu omutenga ua zire mehi, o uehi; oMundu o utjavari uari Muhona ngua za Mejuru.
48
Otja ingui omundu uehi, uina otjeri imba ovehi. Nu otja ingui oMundu ue juru, uina otje ri imba ove juru.
49
Nu otja indi tji tua zarere no saneno jo mundu uehi, uina otji matu je ku zara no saneno jo Mundu Uejuru.
50
Nu me tja nai, vakuetu, onjama no mbindu ka vina ku rumata ko o uhona ua Mukuru, poo omazundarero oku rumata ko mahazundarero.
51
Tareje me hungire otjiundikua ku ene; ka tuna ku rara atuhe, nunguari matu tanaurua.
52
Mo ruveze orusupi, mo mbapaiziro jeho, po hiva indjo ja maandero. Orondu ohiva mai tono, nu ovati mave pendurirua mo mahazundarero, nu atuhe matu tanaurua.
53
Orondu omazundarero nga ja soku zara omahazundarero, nu orondu rutu indui orute ndui rua soku zara oku hata.
54
Nunguari inga omazundarero tji maje zara omahazundarero, no rutu orute tji maru zara omuinjo uaaruhe, indino otji ma ku je ku jenenisiua itji tji tja tjangua, “ Ondiro ja niniua mo utoni.
55
Ndiro omasa uo je je pi? Tjovakoke o utoni uoje upi?
56
Omasa uo ndiro o uvi, nu omasa uo uvi oVeta.
57
Nunguari okuhepa ku Mukuru ngu tupa o utoni mo Muhona uetu Jesu Kriste.
58
Vakuetu ovasuverua, opu mua soku kukuta, amu hina ku njinganjinga, aruhe amamu rijandja ko tjiungura tja Muhona, amamu tjiua kutja oku ungura kuenu kaku na ku hepa ko otjisuta mu Muhona.