¹ Nangarire tji me hungire no maraka uo vandu no uo vaengeri, nu tji mbi hina rusuvero, ami tjandje mbiri otja ohiva ndji mai pose poo ondiuo ndji mai tono. ² Nu nangarire tji mbina otjijandjeua tjoku profeta, nu e pangununa oviundikua avihe no ndjiviro aihe; nu nangarire tji mbina ongamburiro aihe, ndji mai jenene oku vingurura ozondundu, nu ambi hina rusuvero, ka ami otjina. ³ Nu nangarire tji mba jandja o uini uandje auhe oku risa ovasiona, nu nangarire tji mba jandjao rutu ruandje oku njoseua, nu ambi hina rusuvero, kapena tji matji ndji kotokere. ⁴ Orusuvero ru na omutima o mure, ru na o unjanutima; orusuvero ka ru neruru, ka ru rivara, ka ru ritongamisa; ⁵ Ka ru ritjindi mo ndjira jo uhazendu, ka ru ripaha ku ro oruini, ru joroka mo uatjiri, ka ru pindikisiua po uriri, ka ru ripura o uvi. ⁶ Orusuvero ka ru kara no ndjoroka mo uhasemba, nunguari ru joroka mo uatjiri, ⁷ Ru kutjira ovina avihe ngumumu, ru itavera ovina avihe, runa omaundjiro mo vina avihe, ru nanena ovina avihe. ⁸ Orusuvero ka ru janda. Nunguari tji pena omaprofetero, ouo mae janda; tji pena o maraka, ouo mae muinisiua; tji pena ondjiviro, ojo mai jandekua. ⁹ Orondu tu tjiua ohinga, nu tu profeta ohinga; ¹⁰ Nunguari itji tji tja puisiua tji tje ja, itji tji tjiri otjihinga matji jandekua. ¹¹ Tji mbari okanatje ije hungire otjo kanatje, ije pangununa otjo kanatje, nu ije ripura otjo kanatje. Nu tji mbaza noku rira omurumendu, mba hanika no vina vio unatje. ¹² Orondu nai ka tu munu naua, tu muina mo tjiritarero, nunguari imbo matu je ku tarasana omurungu no murungu. Nai mbi tjiua ohinga, nunguari imbo meje ku tjiua oku ura, tjimuna ami uina tji mbi tjiukua oku ura. ¹³ Nu nambano ongamburiro, no maundjiro no rusuvero, imbi ovitatu mbi mavi karerere, nunguari otjinenenene puvio orusuvero.