¹ Rireje ovahorere ku ami, otja ami uina tji mbi horera ku Kriste. ² Nunguari me mu tanga, vakuetu, kutja mu ndji zemburuka mo vina avihe, nu mua takamisa omahongero otja tji mbe je jandja ku ene. ³ Nu me vanga kutja mu tjiue kutja otjiuru tjo murumendu auhe oKriste; nu otjiuru tjo mukaendu omurumendu; nu otjiuru tja Kriste oMukuru. ⁴ No murumendu auhe tjima kumbu poo oku profeta a a kutjire otjiuru tje ma tengurura otjiuru tje. ⁵ Nunguari omukaendu auhe tji ma kumbu poo oku profeta no tjiuru tji tji ha kutjirirue ma tengurura otjiuru tje; orondu pa sana na tja kururua ozondjise. ⁶ Orondu omukaendu tje ri uhungu, nga te oku kondua ozondjise uina. Nunguari tjeri otjizepaisahoni omukaendu oku kondua ozondjise poo oku kururua otjiuru, eje nga kutjirue otjiuru. ⁷ Orondu omurumendu tjiri ka sere oku kutjira otjiuru tje, orondu eje o saneno no ujere ua Mukuru. Nunguari omukaendu o ujere uo murumendu. ⁸ Omurumendu tjinga ae ha zire mo mukaendu, no mukaendu tja za mo murumendu. ⁹ Nu uina omurumendu tje ha utirirue omukaendu nunguari omukaendu tja tungirua omurumendu. ¹⁰ Omukaendu opa puira oku kara no uvara mo tjiuru tje, mena ro vaengeri. ¹¹ Nunguari mu Muhona omukaendu ka hanikire kuena omurumendu nu omurumendu ka hanikire kuena omukaendu. ¹² Orondu otja omukaendu tjeri o uo murumendu, mo muano otjingeuo omurumendu ua pitira mo mukaendu; nunguari ovina avihe ovia Mukuru. ¹³ Pangureje mokati kenu oveni: okokuua omukaendu oku kumba ku Mukuru uhungu? ¹⁴ Na indji ongaro ja hapo ka I hongo kutja omurumendu oku hapisa ozondjise ozonde, otjizepaisa honi ku je. ¹⁵ Nunguari omukaendu tjena ozondjise ozonde, o ujere ku je; orondu ozondjise za jandjeua kuje po ruveze ruo tjikutjire ¹⁶ Nunguari tji pena auhe ngu ma ngara ma patina, ete katuna ngaro ndjiri nao, na inda ozokereka za Mukuru uina. ¹⁷ Nunguari moku mu rakiza nai, hina ku mu tanga, orondu kamu uongarere o uua, nunguari mu uongarera omazundiro. ¹⁸ Orondu rutengatenga, mbi zuva kutja tji mua uoronganene pamue mo kereka, pena omahanikiro mokati kenu, nu munda mue me itavere tji. ¹⁹ Orondu mua soku kara no mahongero nga epa mokati kenu kutja ovatoororua mokati kenu ve munikisiue. ²⁰ Okutja ene tji mua uongarere pamue po ruveze rumue, tjandje ka ku ria oMariro oMajapuke ua Muhona. ²¹ Orondu mo ku ria auhe uenu u toora otjiriro tje rutenga; nu umue a seua nondjara umue aa purukisiua ijo mavinu. ²² Tjii ene hapo kamuna zondjiuo mu mua soku rira no ku nua? Poo mua njengura okereka ja Muhona nu mu zepaisa ovasiona ohoni? Hi tjevi ku ene? Hi mu tangere itji? Hina ku mu tanga. ²³ Orondu ami mba jakura ku Muhona itji ami uina tjimba jandja ku ene, Kutja Muhona Jesu mo utuku imbui mbua hororua nao ua toora omboroto; ²⁴ Nu tjaza noku jandja ondangi, Ue i kojora, natja, “Kambureje, riee, indui orutu Ruandje, ndua tejerua ene, itji ungureje oku zemburuka ami.” ²⁵ Mo muano otjingeuo ua toora ekopi, kombunda je riro, amatja, “Ekopi ndi oNgutasaneno Ombe mo mbindu Jandje; tjitee nai, aruhe tji ma mu nu ro, oku Ndji zemburuka. ²⁶ Orondu aruhe tji mamu ri omboroto ndji noku nua ekopi ndi, mu hongonona ondiro ja Muhona nga Eje tji me ja. ²⁷ Okutja auhe ngu ma ri omboroto ndji, noku nua ekopi ndji ra Muhona mo muano mbu heri omusemba, otji ma tura ondjo jo rutu no mbindu ja Muhona. ²⁸ Nunguari omunduauhe nge ri kondonone, nu arire tja ri ko mboroto, noku nua ke kopi ndo. ²⁹ Orondu ingui ngu ma ri noku nua mo muano mbu heri omusemba, ma ri noku nuina omberero kombanda je omuini, eje tjinga ae hina ku pangununa orutu rua Muhona. ³⁰ Mena ra itji, ovengi mokati kenu va ngundipara, noku vera, no vengi va rara. ³¹ Orondu ete tji tue ripangura oveni katuna ku pangurua. ³² Nunguari tji tua pangurua matu verua i Muhona, kutja atu ha pangurirua onjoneno pueena o uje. ³³ Okutja vakuetu, tji mua uoronganene oku ria undjasaneje. ³⁴ Nunguari umue tja to ndjara, eje nga rie ko nganda, kutja amu ha uoronganenene ombanguriro jo manjoneno pamue. Imbi mbia seua po mee ku vi tuapo naua tji mbe ja.