¹ A neli o nyiko a mai no ma maneno a Davida_Davida o mwana Jese, o mulume no piwa yonene e likute, oyo no wesiwa a mathi kwa Mulimu wa Jakobo, oye o kwaye a membo no ku tobala a Isilaele e kala o kwaye. ² E mepo tha Minya moyo tha ambaula na kwange, na lii lyaye lyekala pa lulimi lyange. ³ O Mulimu wa Isilaele no amba, e liwe lya Isilaele no liambaula o kwange. Oyo busa na ku kena kwanu, oyo busa mu umowa wa Mulimu. ⁴ Mwaku feka na liseli lya masiku siku weti e liwa lyo lisila, a masiku siku no mbula mabui, o mwonyi o upya wo umena mu litunga weti liseli no kamwe lyo liesa mu manyima no nbula. ⁵ Niti, kandi a nange kali wetini ngeya kao poso thaMulimu? Kandi ka itenda o wonyi nombula o ku pwa kao nange , ku laula na ku tisetha mu manthila oshe? Kandi ka iketha e puluso thange kao naku manena ku tenda omu ni saelela? ⁶ Kono a nombula oku luka mwa feka weti mingunguya no ku yumbiwa, kakuli ko thi twesa ku chiiwa ku wanekiwa pa mweya na makaa a munu kao. ⁷ O munu oyu ikwata a swanela kuku tusisa sikuwo kapa kalunda ka mwondo. Ya swanela ku tumbekeliwa apa ina lala.'' ⁸ A onyiko a mathina no alume no andume a Davida. Joshebu. Bashebeti no ku Takemoni, neli yo mueteleli no alume no andume. No ipaa alume 800 mu mu lwelo umweya. ⁹ Ku tunda oye mono kwikala Eliazare o mwana Dodai no ku Akoka, oyo neli yo mweya no piluka no watu no alume no andume. Mwanekala na Davida apa na lwisa a Mafilisita awo na kuwana pamweya muku shaba endwa, na po a lume a Isilaele ne tuka ku ku thika mu manyima. ¹⁰ Eliazare no imana na ku lwisa a Mafilisita kupitela apo e likaa lyaye no likwangela naku lamatela pa mukwale. Minya moyo no leta a Maislaele ku koma yo nene mwelyo liwa. E ita no itwesa ku ku thika kendi apo Eliazare, ku manisa ku koma kuno yotha na ku fekula a malutu. ¹¹ Ku tunda oye noku wiya Sama o mwana Agee, no ku Harari. A Mafilisita mwana ku waena pamweya mu silwa no makunde, na ita keo ya ituka kwi yapa. ¹² Kono Sama keo o imana pa kachi no silwa na ku ku lwanela. No ipaa a Mafilisita, na Minya moyo keo oa letala ku koma. ¹³ A atu kuma masole a kutha pa makumi matu na shelumuka kutha kwa Davida munako no kutulo, pepi na liwe lya Adulami. E ita no Mafiisita mono itenda mafulo mu mulonga wa Refaimi. ¹⁴ Mwetho nako Davida mwana ikala omu e yapelanga, mu liwe, kuno a Mafilisita ana tende a Mafulo mu Betelehema. ¹⁵ Davida mwana saela meyu na kwamba ngao, '' Nga kwe kala munu oyu nipa ku meyu a kunwa nomu mu lisima lili pa Betelehema, e lisima elyo lili kunyonga no selo no lilapa!'' ¹⁶ Keo alume awo atu no andume a mbatula mu kachi no ita no Mafilisita na uka beta a meyu mu lisima lya Betelehema, e lisima no pa selo no lilapa. Na shimba ao meyu na kwa leta kwa Davida, kono no kana kwanwa. Kono keo, oa mwaela kwa Minya moyo. ¹⁷ Keo o amba ngao, '' Minya moyo, ikalekule nange, ngao ni tende eyi no ngeya. Na twesa kunwa o unyinga no anu awo ana paka o upilo woo mu utata?'' Keo o kana kwa nwa.Eyi mono itendiwa kwa ndume awo atu. ¹⁸ Abishai, o mina Joabi na mwana Zeruya, neli yo kapitao noawo a atu. Pa nako thi mweya no lwa na mwondo waye kulwa na alume a kutha pa mianda thi atu na kwa ipaa. Mwana ambiwanga yonene pa mweya na masole o matu. ¹⁹ Ka ngao yono kupiluka yono kutuma ku pita na a atu kao? Mwana tendiwa yo kapitao woo. Shiwangeyo, oku tuma kwaye no kwimwa ku ku yelela na masole o atu. ²⁰ O mukwaye neli Benaya o tunda ku Kabizeele o mwana Jehoyada, o ndwalume no tenda ama maketho a mangi. Mwana ipaa ana no alume aili a Ariele no ku Moabi. No ingena kame mu musima na uka ipaa onde kuno yo iona. ²¹ Keo no ipaa o mulume o munene no Muegepita. O Muegepita mwana kwatela lyonga mu likaa lyaye, kono Benaya no mulwisa na mulamu. No muyangela e lyonga mu likaa lyaye na kumu mwipaisa e lyonga lyaye. ²² Benaya o mwanaJehoyada yono tenda ama makatho awo, na kuwiya ku limukeliwa pa mweya na a ndwalume awo a atu. ²³ Mwana kutekiwa yonene ku pita a masole no makumi matu, kono no imwa ku nenepisiwa yonene wetini a ndwalume a atu. Davida keo o mupilula mwendisi noa no ku mulonda. ²⁴ A makumi matu no masole e kala ao alume a tatama; Azaele o mina Joabi, na Elikanani o mwana Dodo no ku Betelehema, ²⁵ na Sama no ku Harodo, na Elika no ku Harodo, ²⁶ na Helezi no ku Palati, na Ira o mwana Ikeshi no ku Tekoa, ²⁷ Abiezere noku Anatota, na Mebunai noku Hushati, ²⁸ na Zahamani noku Akoka, na Maharai noku Netofa, ²⁹ Na Helebi o mwana Baana, oyu noku Netofa, na Itai o mwana Ribai noku Gibea no ana Benjamine, ³⁰ na Benaya noku Piratoni, na Hedai noku mawelu welu a Gaashi, ³¹ na Abi-aliboni noku Aribati, na Azimaveti noku Barikumu, ³² na Eliaba noku Shaaliboni, na ana Jasheni, na Jonatani , ³³ Na Sama o mwana Harari, na Akiami o mwana Shamari noku Harari, ³⁴ na Helifeleti o mwana Akasihabai o mwana no munu noku Maakati, na Eliami o mwana Akitofele noku Gilo, ³⁵ Na Hezerai noku Karimeli, na Paami noku Aribi, ³⁶ Na Igali o mwana Natani noku Zoba, na Bani noku Gadi, ³⁷ Na Zeieki no Muamoni, na Nahari noku Beeroti, oyo no shimbanga e ilwiso ya Joabi o mwana Zeruya, ³⁸ Na Ira noku Itira, na Garebi o Muhiti, ³⁹ Na uria no Muhiti. Oshe kwa waneka atha pa makumi matu na mutanu na ili.