¹ Akitofele keo o ambela Abisalomi ngao, '' Oni teneke ni kete alume akutha pa 12,000, kame moni nanuka naku chitha Davida pelo o usiku. ² Moniya o kwaye kuno yo na oyoka na ku tama mataa kame mo ni mwi yapisa na simowa mowa. Anu ali naye mwe tuka, kame mo ni lwisa o Mulena ambu. ³ Moni ka usa anu oshe o kwoye wetini oyu no ku lamiwa yoka wiya kwa mukwanthu waye, na anu oshe mwekala mu kotho mushi thoye.'' ⁴ Eyo Akitofele na amba no iwapelisa Abisalomi na akulu oshe a Isilaele. ⁵ Abisalomi keo o amba ngao, ''Cwale, kwisaniwe Hushai no Muarikite,kame, kame tu limuke ngao apa ike ya ambaula.'' ⁶ Apa Ashai neya kwa Abisalomi, Abisalomi no tonola o kwaye eyo Akitofele na amba na kwipula Hushai ngao, ''To tende eyo Akitofele a namba ndi? Aiba ndi nje, otwambele eyo swanela ku tweletha.'' ⁷ Hushai keo o ambela Abisalome ngao, '' Ekeletho Akitofele anapu thino nako ko thili siwana kao.'' ⁸ Hushai no eketha ngao, ''Wa limuka iwenu na anu aye nga alume a mataa, kame ana lwana, kame aku feka na bere oyu na yangeliwa anaye mu lyuwa.Iwenu mulume wa ndwa, pelo kalala na ita o usiku kao. ⁹ O mone, pa thino nako ona kwolama mu likwina kapa mu sibaka saso. Mo ku tendala ngao apa amweya no alume ayi paiwa ku makalelo no ku lwisiwa, yoshe oyu yuba mwanmba ngao,' E kothi tha tendala mu kachi no masole a kon'ela Abisalomi.' ¹⁰ Keo shiwa o masole no ku tiya e michima, awo no ku feka e michima weti ande, mweyapa kakuli Isilaele yoshe a limuka ngao iwenu mulume wa mataa,na alume ali naye nowo a mataa. ¹¹ Na mi eletha ngao Isilaele a swanela ku kuwaena o koye,ku tunda kwa Dani ku twala kwa Beeresheba, a piluke angi weti mushekela noku liwate, na kuli mwatha ku ndwa mu umweya wenu. ¹² Keo mo tumu kumba koshe oku aka waniwa, kame mo tumu fekela weti mume wo ungwela pashi. Ko tu tamba ku siya shiwa omweya kwa anu aye kao, kapa oye yon'ene, yo yoya. ¹³ Aiba ndi Davida mwa kwolama mu munthi, keo Isilaele yoshe mwa leta miala mwowo munthi na ku u kokela mu lyambai, ku pitela ngao shiwa liwe linyonyo ko litamba ku waniwamo kao.'' ¹⁴ Abisalomi na alume a Isilaele keo a amba ngao, '' E keletho tha Hushai o Muariki the kala siwana ku pita tha Akitofele.'' Minya moyo yona itanisa o ku kaniwa kwa keletho tha Akitofele nga kwi kale kothi kwa Abisalomi. ¹⁵ Hushai keo o ambela Zadoki na Abiatare ama mapolofita ngao, '' Akitofele mwa na elethe Abisalomi na akulu a Isilaele mwowo mwikaelo, kono name mo ina elethe kame mu mwikaelo wawo. ¹⁶ Kona kuli, onyangupe oka tonwele Davida; oka mwambele ngao, kana ka tenda mafulo o usiku pa lyupukelo nomuno no mu liyungu, kono nga upukele mushambwaliya, kapa Mulena mwa komiwa pamweya na anu aye oshe a ali naye.'' ¹⁷ Aka Jonatani na Akimaazi mwana ikala pa lisima lya Eni -Rogel. O musizana no mupika keo o awiyela nakwa ambela eyo aswanela ku limuka, kakuli ka lukela ku ku paka mutata kao kuno a moniwanga e ngena mu munthi.E lin'usa apa no likuma, keo natha na uka mbela Mulena Davida. ¹⁸ Kono o ndumbana keo o amona mwetho nako na uka ambela Abisalomi. Jonatani na Akimaazi na nyangupa na ku wiya ku nthuwo thoyo mulume mu Bahurimi, oyo nokwata e lisima no kunong'a mu lilapa lyae, omo na shelumukela. ¹⁹ O Mukatha oyo mulume keo o shimba o muko no pa lisima na ku ufeka pa lkwina no liisima, na ku kokelapo e nona, kona kuli njeko shiwa omweya oyu no limuka ngao Jonatani na Akimaazi ekala mu lisima. ²⁰ Alume a Abisalomi keo awiya kwoyo mukathi kwetho nthuwo na kuwiya kwamba ngao, ''Kandi Akimaazi na Jonatani kupi?'' Oyo mukathi keo o atonwela ngao, ''Ana upuka e lyambai.'' Mu manyima no kutha na ku topela koshe nje kwa wana, na ku thika ku Jerusalema. ²¹ Mono ku tendala ngao mu manyima oo kutha Jonatani na Akimaazi na tunda mu lisima. Natha ku ka tonwela Mulena Davida;ku mwambela ngao,''O imane o nyangupe oka upuke e lyambai kakuli Akitofele ona twese ku kupa etho keletho. ²² ''Davida keo o imana na anu aye oshe, na uka upuka Jordani. A masiku siku lyo litwa njeko shiwa o mweya oyu no kwanga kupuka Jordani. ²³ Apa Akitofele na mona ngao e keletho thaye no thimwa ku kon'eliwa, no thina pa mbongolo waye na ku ku thika ku nthuwo thaye. No ka luksa siwana e nthuwo thaye na ukwi paa yofochi. Keo ofa na ku mu funda mu likwina lya yaye. ²⁴ Davida keo o wiya ku kuma mu Mahanaimi. Abisalomi oye, keo o upuka Jordani, oye na alume oshe a Isilaele ne kala naye. ²⁵ Abisalomi mwana paka Amasa kwendisa e ita kupita Joabi.Amasa neli mwana Itira no Muisilaele, oyo no ikala na Abigaili, o mwana no kaombeli wa Nahasha na mina Zeruya, o inawa Joabi. ²⁶ Keo a Maisilaele na Abisalomi awo keo atenda mafulo mu litunga lya Giliadi. ²⁷ Mono kwi kala ngao apa Davida neya mu Mahanaimi, Shobi o mwana Nahashi no ku Raba o Muamoni, na Makiri o mwana Amiele noku Lodebari na Barizilai, no Mugiliadi mwana tunda ku Rogelimi, ²⁸ mwana leta misheme na mapai, tu tuwo na mapoto, na uloto, na lukonga,na unga, makunde, na likope lya ku shenga, ²⁹ uki, na mathi a silileli, na ngu, na mawe a ku kamba ngao Davida na anu aye ngalye. A alume mwanamba ngao, ''Anu anafu nthala, ku kwanga, na kufa liwila muno mu liyungu.''