¹ Ja̧'hua̧nö̧ ja̧'a̧ profeta Hageo'inä̧ ja̧'hua̧ta̧nö̧ profeta Iddo i̧tti̧ Zacarias'inä̧, Israel ttö̧ja̧ ttö̧ana̧hua̧ Dios iminä̧ hueäjita'anö̧ jiähuinä̧tö̧ Judios ttö̧ja̧rö̧ Juda ötahuiyänä kacuä̧tö̧rö̧'i̧nä̧. ² Zolatiel i̧tti̧ Zorobabel'inä, ja̧'hua̧ta̧nö̧ Josadac i̧tti̧ Jesua'inä ä̧rä̧mä̧cuä̧hui̧pö̧ pä'äjita'anö Dios i̧jo̧de aditinätö̧ Jerusalén ötahuiyänä ja̧'hua̧ta̧nö̧ Dios umuhuäyotö profetatö̧'i̧nä̧ ppä'ädinätö̧. ³ Ja̧u̧nu̧ pä̧nä̧ aje ji̧jȩ ötahuiyä ru̧hua̧ Tatnai, ja̧'hua̧ta̧nö̧ Sectar-Boznai'inä juayabo ahuaruhuä'i̧nä̧ jahuätörö 'chähuiö pä'inä̧tö̧, ¿Di jä̧ttö̧ ucuturu huȩyu̧tu̧ hueähuä Dios i̧jo̧de'inä, ötahuiyä ttoecuäbä'inä cuaditätucua pä'ö hueäjimä? ⁴ Jua'a yabonö ucuocu pä'inä̧tö̧ ¿Titö pönä jä̧ttö̧ cuaditätucua pä'ö hue'äjätömä tti̧mi̧ tö̧huo̧ja̧ pä'ätöjä? ⁵ Tö̧ä̧nä̧hua̧ Diosmä jahuätö mu̧o̧sa̧tö̧ judio ttö̧ja̧nä̧ to̧pä̧ri̧nö̧ ja̧'hua̧nö̧ ja̧'a̧ttö̧ ttaboiyotömä pi̧yȩ topinä̧tö̧ ttadita'anä, ja'huätömä ru̧hua̧rö̧ pi̧yȩ huȩnȩ cuiyäru isojänä huȩyu̧tu̧ huetta pä'inätö̧ ru̧hua̧ Dario u̧huo̧ja̧ pä'ö. ⁶ Pojä ja̧'a̧ cuiyäru isojä Eufrates aje ji̧jȩ ru̧hua̧ Tatenai ja̧'hua̧ta̧nö̧ Sectar-Boznai'inä jua yabo ahuäruhuärö'inä ru̧hua̧ Dariorö huettinojämä. ⁷ Cuiyäru isojämä pa̧'a̧nö̧ huȩyu̧tu̧ hue'inä̧tö̧ ru̧hua̧ Dariorö: "huȩnȩ juiyönä cui̧ja̧'a̧ topö teähuätöjä. ⁸ Judá ötahuiyära'a topötihuäji huȩnȩ taditähuä̧ ja̧'a̧ttö̧ ¡ru̧hua̧! ucuru cu̧huo̧ja̧ pä'ätöjä̧ ja̧'hua̧nö̧ ja̧'a̧ttö̧ Dios böo ijode pä'äjita'anö ttadita'a topätöjä isodemä inähuiyä bäreuttö 'ca̧tö̧, ja̧'hua̧ta̧nö̧ jäyänämä dau adiyättö ttoepö aditätö ja̧'hua̧nö̧ ja̧'a̧ttö̧ tta̧'cua̧pö̧nö̧ ye'ecunänö ttadita'attö ya'acutä juruhuächiätö. ⁹ Ja̧'hua̧nö̧ ja̧'a̧ttö̧ ujutumä mu̧o̧sa̧tö̧rö̧ jäepö ä̧ju̧cuä̧jä̧tö̧jä̧ ¿Di jä̧ttö̧ ucuturu huȩyu̧tu̧ hueähuä Dios ijode'inä ötahuiyä ttoecuäbä'inä cuaditätucua pä'ö hueäjimä? ¹⁰ Juene o'comenä jua'a aditätö ttöruhuotö ttimi'inä cu̧huo̧ju̧nä̧ huȩyu̧tu̧ hueta pä'ö jä'epäjätöjä. ¹¹ Jahuätömä pa̧'a̧nö̧ adätö pä̧ttä̧ju̧jä̧ ujutumä mo̧ro̧jä̧'i̧nä̧, pi̧jä̧'i̧nä̧ ru̧hua̧ Dios umuhuäyotöjä̧ ja̧'hua̧nö̧ ja̧'a̧ttö̧ ujutumä pä'äjita'anö aditätöjä. Täbocutä ttaditinode jinode Israel ttu̧ru̧hua̧ aditinode jinode. ¹² Ja̧u̧nu̧ o'ca'a tä̧do̧tö̧mi̧nä̧ Dios a'ca jo̧mȩttö̧ suronä jȩtto̧mȩnä̧ babilonia rȩjȩ ru̧hua̧ Nabucodonosor umunä iyö ujuninäu̧, ja̧u̧mä̧ Dios ijode'inä ppari'icu surojoepinö, ja̧'hua̧ta̧nö̧ ötahuiyä'inä ttö̧ja̧rö̧'i̧nä̧ i̧rȩjä̧ra̧'a̧cu̧ huettö jȩä̧cuä̧huä̧ ttö̧ja̧ jö̧nä̧tä̧ ȩpi̧nä̧u̧ Babilonia rȩjȩra̧'a̧cu̧. ¹³ Ja̧'hua̧nö̧ ji̧nö̧ o'ca'a Babilonia rȩjȩ ru̧hua̧ Ciro ä̧cuo̧mȩnä̧ uruhuo ö'ämä̧di̧nö̧ a̧'ȩnä̧ chutä ru̧hua̧ Ciro hueähuä huȩyu̧tu̧ iyö hueinö pä'äjita'anö Dios ijode ttadita pä'ö. ¹⁴ Ja̧'hua̧ta̧nö̧ ru̧hua̧ Ciromä korojuäittö'inä oro o̧'ta̧hui̧yä̧ttö̧'i̧nä̧ plata o̧tta̧hui̧yä̧ttö̧'i̧nä̧ ppä'ädinö Nabucodonosor Jerusalén, ötahuiyära̧'a̧ttö̧ Dios i̧jode jacuä ka̧cu̧ rä'epicu ö̧ä̧nä̧huo̧tö̧ ttö̧jo̧dȩnä̧ doädö u̧ju̧ni̧nö̧'i̧nä̧ ru̧hua̧ Ciromä Babilonia ttö̧ja̧ ttö̧ä̧na̧hua̧tö̧ tti̧jode jacuättö räepicu chutä u̧mu̧huä̧ya̧ ippeye ru̧hua̧ pä'iönä ujunä̧jä̧cu̧ Sesbasarö iyinö. ¹⁵ Ja̧u̧ iyö pä'inö a̧ja̧ pi̧yȩ o̧tta̧hui̧yä̧mä̧ Jerusalén ötahuiyära̧'a̧ Dios ijode ttaditode jacuä kö̧nä̧ji̧. ¹⁶ Ja̧'hua̧nö̧ ja̧'a̧ttö̧ ru̧hua̧ Sesbasarmä Jerusalén ötahuiyära̧'a̧cu̧ ichö ja̧u̧ ro̧u̧ jähuä doädo kö̧ni̧nö̧ Dios i̧jodenä. Podemä ja̧u̧nu̧tä̧ päiönä kä̧mä̧nö̧ ttaditina'amä jitäbö ji̧nä̧ jo̧mȩnö̧ päiönä cädäcuähuoca'a. ¹⁷ Jitämä ru̧hua̧ cuesehuä̧ru̧nä̧ ju̧ttö̧mä̧ cumuhuäyotörö täbo cuiyärumä ttösä huei isopäiönä ru̧hua̧ Ciro huȩyu̧cuä̧ huȩnȩ iyö hueina̧ja̧ pä'ö juode Dios ijode ttadita pä'ö Jerusalén ötahuiyä isopäiönä ja̧'hua̧nö̧ ju̧ttö̧mä̧ ru̧hua̧ ucu cuamöcuädö cui̧huȩnȩ tä̧ju̧cua̧ pä'ätöjä.